CAUNG: KHIN" 14
Byu Qe: Ra" Makhyang: Mashab: Khyo
(Davi Peim: Ru)
1 Ko:pyad' qe wa- Mao"So mana ga: yao: bam yao" nhag' lam: khug mae ta" na: ako".
Yao: bam alhab' wa akyang magai: ra" byugo qe ngad mung: gyai qu" gyaug qu" ca' ra" mau" kad' ako". Jo: ru kad' ru khag' mana.
2 Mao"So wa Pha,jhi" bo: ru khag' na: laug?-
Yao: re caung:pa" ru khag' na: laug?- ga: myao nae" qhid' mae" mug:khaung mae" myid gaung xao su byu qere qu" na: ra".
3 Ngadqere: yao: bam alhab' khyonghung: nghung" lo" vako" ra".
Yao: bam alhab' wa dakhyo: za: magai ngad: ako". Yao: bam mae" dayaug re: din:man" ru makad' ngad: ako". Dayaug za: lhao" re: mabo ngad: ra".
4 Asang wa- yao: bam maba ko" ru laug? Ce: makhyang" mau" kad' mo, alhab' maba mabeim: ko" ru laug, ga: myid yang:- yao: bam wa nga" byumyu" qere lhad' zo: mung: kao so' khau: ako".
Yao: bam wa ngore khonhae" re: akyu" mamho' ko" ngad: ra"- ga: ta" ra".
5 Ngadqere: Mao"So wa yao" mho dao: gyo: mo, we' daga" na mung:
makhyang: mo, wa gyaug: din: li" genae".
6 Makhyang" ra" mau" kad' mo, wa nhag' lam: nyham: khyo" ra" mo, myid: yaung: to" ra" khyo jham re kaung: kag' byid' ako".
Ngadqere: Asang wa yao: bam: gug: gam khyo ngad: ra".
7 Ziun mae" Israel byu qe: aung doe, khyo thug' li" qa: we"- ein: ngo lhaung" taung" myid:.
Asang wa yao" byumyu" qere dalhang dam: na: dai nhao: ra" au: re Israel byumyu" qe khonho" ngaui bau: genae" i?