CAUNG: KHIN" 139
Mao"So: Nho: Jab Byang" Ra" Laba Lajhao We' Gun Caung Byid' Ra" Khyo
(Do, lo" au: mae" Davi nho: nghaui" caung:)
1 Asang we"- nao ngore ca: qu" mung: ngore ba byid' ra".
2 Nao wa ngo kad' ru alhab' re ba byid' ra".
Nao wa ngo myid: ru alhab' re gyai va" mae" ba: gyo: byid' ra".
3 Ngo mau" zaui" na: laug- thang: na: laug ga" rure- nao myao byid' ra".
Ngo sab' lab: ru alhab' re nao ba: ra".
4 Ngo majhau shi:mae" lhao" re:-
ngo pe" ta" ke' nae" rure nao bin: ba: to: gau ngad: ra".
5 Nao wa nga" avai: ayae gam: sho' mae na: ra".
Nao wa ni" qam: so' yang- ngore lhang" kham" to" ra".
6 Nao ngore ba: ru wa gyai yao: no, sho' ngad: ra".
Aiwa ngo ba: gyo" ru tho' lai sho' ngad: ra".
7 Ngo wa nao mae" khai: khyo qo" phao nae" i?
Ni" qhid' kheim: mae" khai: khyo qo" phao: lo" nae" i?
8 Mug: khaung khyo ngo do, lo" re nao wa ai: mae na: jo, nae".
Movo: mug: mae ngo lang" jo; re nao ai: mae na nae" ngad: ra".
9 Ba thug' shad' mae" lai: ye: sho' dao" lo" mung:-
mangad: lao"- ba vao shad' mae" va" thao" jo, qo mae ngo ye:na: jo, ngadqere:
10 Nao wa ngore khyo qhid' au: she nae"
qhid' mae" ai: mae na: jo, lao: nae".
Nao wa ngore bao" nae" qhid' mae" ai: mae na lao: nae".
11 Ngo re nyham" to: la, ein: mug: cad' re ngo qo" mho' ra".
Mangad: lao" nga" lhang" gam: mae mug: bo" re myi" boe" lo" wa, ein: ngo qo" mho' ra".
12 Ngadqere: mug:cad' lao" re: ni" qhid' mae" no, sang: kyid mangad: ngad: ra".
Myi" wa na" we' dakhyo: bao: jo; ra". Mug: cad' we' mug: bo" wa ni" qhid' mae" wa dakhyo: za: ngad: ako".
13 Nao wa nga" gaung dau khao: ngo" re phan" to: byid' ra".
Nao wa nga" myhi" aung mae ngore xo' zham: to: byid' ra".
14 Nao wa gyaug phug' tho' yaug we' nao kad' gu: alhab' gyai mug' pho: ngad: ruyang
nao re ngo caung:khin" ra". Aire nga" nhag' lam: alhab' yang ba: ra".
15 Nga" sho:qug: jham wa akhyao kad' to" ru qhug' mung:-
nga" myhi" aung khug mae nyang" za: xao" ke' to: byid' au:- ai: khug mae anyham: avho' khyo" ngo qi" li" na: au: re- ai: mae ngo na: jo; rure nao ba byid' ra".
16 Ngo makhau: li" shi:mae" nao ngore myao: ava".
Nao ngore byid' to" ra" ba na jham- lhao" majo; boe" li" shi:mae"- ni" mugsug' paug' khug mae alhab' tung" xam" to" ava".
17 O" Mao"So we"- nao myid: rure qhug' myao byid: nae" khoqhi" qug' ra" i?
Aijham wa khonho" yao: myo" ra" i?
18 Aijham re ngo nghe' qu" ngad: re ma coe je, jham tho'
je: myo: genae" ngad: ra". Ngo beim" so" li" re- ngo wa nao we' daga" ana: jo, shi:nhaung
19 O" Mao"So we"- Nhag' lam: kaui: ra" makhyang: mo, re-
nao: yang qo" se' pye' byid' qa: we"- Aqan alan kad' mo,- ngo yao: re za: to: co' ko" qa: we" ein: lhaung" myid:.
20 Yao: bam wa ni" khyo re magai: ra" khyo" ta" ako".
Yao: bam wa- ni" mang re makhyang" ra" khyo" ta" ako".
21 O" Asang we"- nao re nghang: mo, re ngo nghang" kyiva" lhe".
Nao re tau: lhan: mo, re ngo qu" ca' va" lhe".
22 Ngo wa yao: bam re- lo" thao" sho' nghang" pye' mung:-
yao: bam re nga" gyevo jham khyo" ngo sun" pye' va".
23 O" Mao"So we"- ngore ca: qu" mung:- nga" myid re ba byid: la,
Ngo re jham" qu" mung:nga" aung khug: myid re le; qu" wa,
24 Ngo mae makhyang: mashab: ru daja: ja: bo: laug- mabo: laug qho: qu" byid: la,.
Aimung: mathao" magan: ra" khyo mae ngore jhui" shid' byid: la,.