CAUNG: KHIN" 132
Caung:pa" Yham Re Caung:khin" Ru
(Do, lo" au: mae" nghaui" caung:)
1 Asang we"- Davi re dato" myhid' pye'-
yao: kham zo" lo: ra" qug: khai: alhab' rere:- dato" myhid' pye' byid:.
2-5 Ngo wa Asang: qhid' mae" jo, qo dalam:-
qam: so' bo: thao" ra" Yaku nho: Mao"So: qhid' mae" yham dayham makad' byid: byid: wa- ngo yham maphao nae"- yab qo re: mavao nae".
Dug no: re: mayu nae"- yab re: mayab nae"- ga: qam: so' bo: thao" ra" Yaku nho: Mao"So nao re jham tang" to" ra" yao" dao:so: re myid: beim: byid: wa,.
6 Ngonhaung" wa Betlehem mae dao: thang" ban" akhyo
re the' gyo: va". Aimung: aire
Yearim jao: gyu" mae ngonhaung" qhug' myao va".
7 Ngonhaung" wa Asang: yham khyo ye: gelang:-
yao" zaung tao" qhid' kheim: mae ngonhaung" caung:pa" gelang:- ein: ta" bam va".
8 Asang we"- dao: thang" ban" we' daga" Caung:pa" Yham khyo li" ri:-
ai wa ni" qam: so' ra" aso: ngad mung: cemae apyad ato na: jo, wa,.
9 Ni" khinjaung qe wa- khonhae" re: jo: ru kad' vageshao:-
ni" byumyu" qe wa ngaui lho" taung" hug' yao: na vageshao:.
10 Nao wa ni" nho: daui daui yaug Davi re dao:so: byid' to" ava".
Asang we"- nao: yang khyin: yu: ra"
kho:kham re dangag: ha: pye'
11 Nao wa Davi re gang" tang: ra" dao:so: byid: to" ra".
Nao: yang madam: tug' yu: pye' nae" ra" dao:so: wa- ni"
yaug- gai zo: qemae" dayaug re kho:kham boe" nhao nae"- yao: wa ni" thao mae xo' yang: eib: na nae".
12 Ni" yauggai zo: qe wa- nga" dao: thang" jham re jhaug' za: cao" mung:- ngo byid: to" ra" amyin" jham re phug' cao" ko" ngad: re wa-
yao: bam: yauggai zo: qere:- ni" khu mae khonhae" re: kho:kham xo' boe" li" genae". ga: dao:so: byid' to" ra".
13 Asang wa Ziun re khyin: yu: to" ava".
Yao: wa aire yao" yham boe" nhao nug: ra".
14 Ce: jo, qo mae ngo apyad ato na nae" cemae ngo eib: na nug: ra".
15 Ngo wa Ziun re yao: mae ca" ru alhab' re magan: mago" bao" byid:nae".
Ngo wa yao" myaung sho: mo, re zo:ve we' nhag' dag nhao nae".
16 Ngo wa yao" khinjaung qere yao: bam kad' ru alhab' mae shaman" byid: nae".
Aimung: yao" byu qe wa Nghaui"caung: ru we' ngaui bau: ngaui lho" hug' li" genae".
17 Ce: jo, qo mae ngo wa Davi nho: myid:zo: qemae" dayaug re kho:kham mo" boe" nhao nae".
Ce: jo, qo mae ngo wa ngo khyin: yu: ra" kho:kham mung" eib mau" re dang: jo, nhao nae".
18 Ngo wa yao" gyevo qere qho' phau: nhao nae".
Ngadqere: yao" kho:kham mung"dan: wa qi" qhang mung: na: dai: lo nae".