CAUNG: KHIN" 12
Bao" Thaug' Nae" Rure Mho' Yao: Ra" Dao: Thoe Dalam:
(Davi Peim: Ra" Nghaui"caung:)
1 Asang we"- ngonhaung" re bao" thaug' yu la,- byugai dayaug re: madang lo:-
dangman" ra" byu qere maqo" qhug' myao lo:.
2 Yao: bam alhab' mo, wa yao: cao: jho" mhug' ako".
Dayaug we' dayaug mhug' khin" dao: we' jho" mhug' pyag' ako".
3 Asang we"- ai: mhug' khin" ra" sho jham re tae" lo" nhao wa,-
4 Ngonhaung" jhau: ke' ra" dao: thoe: yang ngonhaung" o: ru qo" yu:.
Ngonhaung" ta" nug: ru pe" re: ta" nae"- Khag' yang qo" tam: nae" mangad:- ga: phug: ta" ra" nhad' jham re pyid' pye' wa,.
5 Asang wa- Ngadqere: ana" ngo li" nae"- pe"mung:ga"re myaung sho: mo, wa zag zo" ru qhug' na mung: yhin" ru qhug' mo, wa nokyang: kyang" na: ako".
Aimung: yao: bam myid: nghae" na: ra" gug: gam cae: tae" rure ngo byid: nae"- ga: ta" ra".
6 Asang ta" to" ra" dao:so: jham re myid: lam gai: ra".
Ai: jham wa myi:khyeim" mae nhad' lhang byang" sho' phad' kyang" pye' va" ngaui re" ru: gyang" san: ra".
7-8 Makhyang: mo, wa khyi" khao: ngo" na mung: makhyang" ra" mau" re caung:khin" ako".
Asang we" Ngonhaung" re khonhae" re: gug: gam byid' na la,. Airu" ra" byu qe mae" khyad' yu yang: gug: gam byid: la, wo".