CAUNG: KHIN" 111
Asang Re Caung:khin" Byid' Ru
(Halelu- ya)
1 Asang re caung:khin" byid: ge,- ngo wa
Asang re nga" nhag' lam: alhab' yang yao" byu qe: phaung mae jeju caung: byid: nae".
2 Asang kad' ra" mau" zo" jham wa khonho" mug'pho: ngad: ra" i?
Aijham re qu" ngaui mo, alhab' wa aijham re ba: gyo: nug: ako".
3 Yao: kad' ru alhab' wa nga: lho" ru we' phung bo: ru byang" sho' ngad: ra".
Yao: dangman" ru wa apyad ato mae ngad: ra".
4 Asang wa yao" mug' pho: mau" zo" jham re ngonhaung" yang mato" myhid' pye' geshao: ga" ra".
Yao: wa sho: no byid: ba mung: nhag' khyag' myid bo: ra".
5 Yao: wa yao: re nga: yhe' ra" mo, re zo:ve jaung byid' ra".
Yao: wa yao" dao: thang" re
khonhae" re: mato" myhid' ngad: ra".
6 Yao: wa yao" byu qere taung bug byumyu" qenho:
mug: myid byid: mung: yao" kheim: so' qhu" byid' ra".
7 Yao: wa yao: kad' ra" mau' zo" alhab' mae jhaug' zaug mung:
dangman" ra" yao" amyin" jham alhab' wa lam ga" ra".
8 Aijham wa ayo, byang" sho' dang: jo, mung: aijham re
jo: ru we' dangman" ra" khyo" byid' to" ra".
9 Yao: wa yao" byumyu" qere loe; beim nhao mung: yao: bam we' apyad ato mae" dao: thang" kad' to" ra".
Yao: wa gyang" lho" ru we' qam: so' qi" ra".
10 Pha,jhi" bo nae" khyo wa Asang re gyaug phug' ru ngad: ra".
Yao: wa yao" amyin" cao" mo, re jo: ra" khyo" dao: ba: kho' nhao: ra". Yao: wa apyad ato mae caung:khin" byid: tho' yaug ngad:. ra".