CAUNG: KHIN" 109
Qug: Khai: Qhug' Ra" Byu Dayaug: Nyhung Dao: Thoe
(Davi peim: ra" Nghaui"caung:)
1 Mao"So we"- nao re ngo caung:khin" byid' ra". Sae za: dana: jo,-
2 Nhag' lam: kaui mo, we' mhug' hab' qe wa ngore ceim" khe' zin" ako".
Yao: bam wa nga" khyo re mhug' ta" ako".
3 Aimung: yao: bam wa- pe" si: mabo: rumae ngore
khe' zin: mung: nga" khyo re magai: ra" khyo" ta" na: ako".
4 Yao: bam re ngo jhid'de; mung:- yao: bam: qhid' mae" ngo akyu" mho' byid: sho' ngadqere:- yao: bam wa
ngore tug' phaug' mung:- ceim" kang" pye' ako".
5 Yao: bam wa ngore gai: ru atha" magai: ru tug' xe' byid' ako".
Jhid' de; myid: atha" nghang" ru tug' xe' byid' ako".
6 Nga" gyevo re tarha" dao: kho' byid: nae" qhid' mae" akyang byo; ra" tarha" agyi dayaug re khyin: to: wa,-
Yao" gyevo qemae" dayaug yaug: yang yao: re qobo zhaug' vashao:.
7 Yao: re tarha" yung" mae dao: phyid' byid: mung: qobo myao byid: vashao:-
yao" akyu" mho' thoe rere: xao au: yug: mau" we' dakhyo:
myid: yu byid' ru qhug' vashao:.
8 Yao" kao so' wa khomyhao" mamyao" re thao" byaug vashao:.
Yao" mau" re su gayaug: yang zaui: zo: vashao:.
9 Yao: zo: qe wa cug' zo: qe boe" mung:-
yao" myhi" zang wa cug' mo" mo" byaug vashao:.
10 Yao: zo: qe wa yham maqo" ra" mho' zo: mo, boe" vashao:.
Yao: bam re yao: bam na: ra" yham jad: mae" ceim" khe' thug' pye' ru qhug' geshao:.
11 Yao" yang jhin de; to" ra" jhin sang qe wa yao" jo,nho" alhab' re yu: pye' byid: geshao:.
Byu bang" jham wa- yao: mau" zaui: mung: qho: to" ru alhab' the' sang: ngho" geshao:.
12 Yao: re khag' yang khonhae" re:- nhag' makhyag' yu vageshao:.
Yao: shid: cug' co' ra" cug' zonau" qere nhag' makhyag' yu vageshao:.
13 Yao" myid:zo: qe alhab' shid: shao" vageshao:-
Thao: qae: mae yao" mang re to" myhid' pye' geshao:.
14 Asang wa- yao" phug' phyid' qenho: makhyang: mashab: rure myid: beim: byid: vashao:.
Yao: myhi" nho: qobo jham rere: khonhae" re: makhyad' byid: vashao:
15 Asang wa yao: bam: qobo jham re khonhae" re: myid: beim" na vashao:. Yao: bam yao: rere:
bin sho' to" myhid' pye' vashao:.
16 Ai: yaug wa nhag' khyag' nae" ga:- khonhae" re: mamyid ngad: ra".
Yao: wa myaung mo,- maqo" mo,- bao" yu nae" byu mana mo, re yhin" mung: se' pye' ra".
17 Yao: wa nhang: nae" gyai nug: ra". Yao: yao: nhang" ru qhug' zo: vashao:.
Yao: wa shaman" byid: nae" manug ngad: ra". Yao: re khag' yang re: mashaman" byid: vageshao:.
18 Yao: wa yao" mai bau: ve; au: mae" we' dakhyo: laui laui za: nhang: dao: ta" ra".
Yao" nhang: dao: jham wa qid we' dakhyo: yao" gaung khug khyo zaug: vao: lo" vashao:- yao" sho:qug: khug khyo re: xau we' dakhyo: vao lo" vageshao:.
19 Aijham wa yao: re- mai bau: we' dakhyo: thab' to: byid: mung:-
yao" gaung re phyid' cui: we' dakhyo: lhang" kham" to: vashao:.
20 Asang we"- ngore airu: makhyang" ra" khyo" ta" ra" nga" gyevo qere airu: qobo dae byid: wa,.
21 Ngadqere: nga" zug: kheim: so' qi" ra" Asang we"- nao dao:so: to" ru we' dakhyo: ngore bao" yu la,.
Ni" jhid'de; myid gai: ra" mathao mae ngore khyad' khyui: yu la,.
22 Ngo wa myaung sho: mung: jo,nho" maqo". Ngo wa
no; thao" ra" nhag' lam: khug mae no: jo; ra".
23 Ngo wa myi" thao zo" mae" bao qab we' dakhyo: baui" byaug: lo" na va".
Ngo wa jhin khyag' bathaung bajin: we' dakhyo: mad: hug' sin" pye' ru qhug' va".
24 Ngo zo: shaug' mazo: mung: nga" pad' laug jham qam: nang: va".
Ngo wa sho:qid we' sho:qug: za: angad lo".
25 Su gaje ngore myao: re qi byid' ako".
Yao: bam wa jung" ra" khyo" au: nghoe" nghoe" ako".
26 O" Asang nga" Mao"So we"- ngore bao" yu la,.
Ni" gang" tang: ra" jhid'de; myid: ra" mathao mae ngore khyad' yu la,.
27 Nao wa ngore khyad' yu yaug ngad: rure
nga" gyevo qere ba: yu nhao wa,.
28 Yao: bam ngore nhang: gengad qere: nao wa ngore shaman" byid' li" nae".
Ngo re yhin" na mo, jeim: geshao: aimung: ni" daui daui yaug wa ngaui bau" na vashao:.
29 Nga" gyevo qe wa qho' phau: vageshao:-
yao: bam wa qho' thug rure mai bau: qhang we' dakhyo: ve, vageshao:-
30 Ngo wa Asang re thoe qi: ke' mung: jeju beim: so: byid: nae".
Ngo wa yao" byumyu" qe: phaung mae yao: re caung:khin" byid: nae".
31 Pe"mung:ga"re yao: wa myaung yaug re
gye vha byid: mung: yao: bam re shid nae" dao: phyid' byid: mo; lo, mae" khyad' yu: ra".