19
1 Mhug' hab' kopyad' boe" nae" tho' nhag' lam: din: mung: myaung: na: re je: gai: ra".
2 Laba lajhao mabo lo: nhag' lam: to" ru wa magai ngad: ra". Nhag' lam: lang" mung: phabau bau: re qug: khai: qhug' li" nae".
3 Byu damyo" wa yao: bam yao" atug' akhyug lo, mau" yang byo; qeim: lo" nhao: ako". Ailao" Asang re qobo zhaug' ako".
4 Jo,nho" qo" mo, wa ba nam asag' khonhae" re: myo: sho' qho: na: ako". Myaung mo, kam" wa yao: bam qo" ra" ba nam dajhid' za" rure maqo" zam" to: ngad: ako".
5 Tarha" yung" mae nao mhug' ta" re qobo dae byid' ru qhug' li" nae"- loe, khyo majo, nae".
6 Akhyag: ra" byu qeyang myo, nho byid' ru qhug' nae" qhid' mae" yaug khao: ngo" qam: ke' ako". Yao: bam wa myo, nho byid' ra" byu qenho: ba nam ngad:- ga: ta" yu: ako".
7 Myaung yaug re wa yao" mao:nhaung: sang qelhao" pe" shui manho ngad: ako". Yao: ba nam maqo" ru wa pe" mug' cang mabo ngad: ra". Yao: khonho" qam: ke' ke' ba nam magai: qo" ngad: ra".
8 Nao yao: su re myo, nho qho mung: ja: cao jab mho" yu wa,- aimung: nao mho" yu va" gu: re xam" ci: re qi" qhang aung doe; lo nae".
9 Tarha" yung" mae mhug' ta" yaug khag' ngadqere: qobo dae magai: loe, ngad: ra". Yao: wa jeim" lo" byaug : ra".
10 Kopyad' qe wa langa: khyo" na nae" maang ngad: ra". Jeim wa byuzang qere eib nae" maang ngad: ra".
11 Nao aqhid' athao ba: myid yaug ngad: re wa nao yao" nhag' lam: re qo" khang" li" nae". Dayaug yaug: yang magai kad' rure maba nhohab kad' pye' ru wa qi" qhang: ra" gai shab: ra" khyo ngad: ra".
12 Kho:kham nhag' jam: yo" ru wa khang khyi kyid' ru we' dau: ra". Yao: myo, nho byid' ru kam" wa ca" ra" au: qu: ra" mug: gai we' dau: ra".
13 Nhag' magyang" ra" yauggai zo: wa yao: pho" re jeim: nhao: ra". Nyhung: ra" myhi" zang wa dazo, zo, gyo" na: ra" qid we' dau: ra".
14 Byu dayaug wa yham we' ngaui re ma khyo" yao" myhi" pho" lo, mae" qo" zhang: yu: ra". Ngadqere: nhag' bo: ra" myhi" zang qo" byid' ru wa- Asang za: ngad: ra".
15 Nao anug: re noe" na wa,- xo' yang: yab: jo, wa,- ngadqere: nao vae: moe' ru qhug' li" nae".
16 Mao"So ta" ru cao" re nao kao qhang nae". Aire pe" shui manho re nao shid: li" nae".
17 Myaung mo, re byid' ru wa Asang re jhid' byid' ru we' dau: ra". Asang nao re dam: tug' xe' li" nae".
18 Ni" zo: qere ngai shi" au: mae mho" kyang: wa,- airu: mamho" kyang: re yao: bam yao" gaung re lhau: phyo' nae" qhid' mae" kad' byid' ru ngad: ra".
19 Byu dayaug wa nhag' lam: lang" ngad: re wa jo; boe" lo: ra" ru alhab' yao: yao: kham vashao:- yao: re qug: khai: mae" dalhang khyad' yu: re dalhang dam: khyad' yu ca" li" nae".
20 Nao wa pha,jhi" byid' rure tae" gyo: mung: zhao: yu nae" qhid' mae" kao bau yaug ngad: re daba mae nao wa pha,jhi" bo yaug boe" lo nae".
21 Xao su byu wa ja: khao: ngo" re gai: yaung: to" ra". Ngadqere: Asang myid: o: khyo: za: aboe" lo nae".
22 So' kho' myo, no; ru wa myo, nho sham nae" khyo ngad: ra". Mhug' hab' boe" nae" tho' myaung: ru je: gai: ra".
23 Asang: mho dao: gyo: wa,- aire nao kao qhang nae"- nhag' dag: ru we' dae phau: nam mae" gug: gug: qo" na: li" nae".
24 Byu damyo" wa yao: bam yao" nhad' khug khyo zo:ve gaug: ke' nae" lhao" gyai noe" mo, ngad: ako".
25 Ngad beim: mo, wa qobo dae kham zo: ang mo, ngad: ako". Aire she, mataung" ba: gyo: shi" mo, mho" yu: li" genae". Nao pha,jhi" bo: re wa nao re mho" shid' peim" ra" au: re mho" yu: li" nae".
26 Qho' maba: ra" byu jad: za: she, yao: pho" re maphug' makhyad' kad' mung: yao: myhi" re yham mae" khe' thug' ke' nae" ngad: ra".
27 Nga" zo: we"- mho" yu: ru thang lao" nao ba: to: va" rure pe" xan: masun: to" pye' li" nae".
28 Sagse: wa dayaug yaug re no nhao nae" myid: phyid' to" re tarha" din:man" ru magai: boe" ngad: ra". Makhyang: mashab mo, wa makhyang" ra" myho' ngae: rure jhid'de; ako".
29 Ngad beim" ra" kopyad' wa vose: qhug' zo: nae" khai: malo" ngad: ra".