PETRU
NHO: VHIN TUNG" SHID' LAM:
(2 PETER)
Dao: phung"-
Petru nho: vhin tung" shid' lam: ein: lam: wa sao qhid' mae" Khristan phung byu qere tung" vhin: ke' ra" mugsug' ngad: ra". Ajhaung to: yang: tung" ra" khyo wa mho" pho" apyag' qenho: mho" shid' khyo we' ai: mho" shid' rumae" boe" thug' li" ra" gaung sho: shab' ra" gintho' mau" zo" re tam" pye' nae" qhid' mae" tung" ru ngad: ra". Ai: aqug: akhai: khyo jham re khoru: sho' nae" khyo: nho: dao: phyid wa- Pho" Mao"So: dangman" ra" laba lajhao we' Asang Yesu Khristu nho: laba lajhao re tang za: zaui" ci: ra" khyo ngad: ra". Ce: laba lajhao wa- Yesu re yao: bam yao" myo; yang yao: the' myao: qu" mung: yao" mho" shid' khyo re yao: bam yao" no" yang the' gyo" qu" ra" mo; yang dai" byid' lo: ra" laba lajhao ngad: ra". Mugsug' tung" yaug wa- Khristu wa dam: tug' li" nae" mangad:- ga: ta" ra" mo; mho" shid' khyo re je yang: gaung yug yug: ra". Yao: wa Khristu dam: tug' joe" li" nae" myao" na: ru wa Mao"So wa khag' rere: manug: jeim" lo" nhao nug: ru we' yao: bam alhab' mo, kam" wa yao: bam: qobo jham mae" myid tha" phaug' lo genae" rure Mao"So o ngaui: ra" khyo re tung" to" ra".
1
1 Yesu Khristu nho: daui daui yaug we' lagyo: ngad: ra" ngo Simon Petru wa- ngonhaung" Mao"So we' ngonhaung" khyad' yu: Asang Yesu Khristu nho: din: man" ra" khyo" ngonhaung" we' dakhyo: phug' de; ra" lam khug: myid qo" yu: to: ko" ra" mo, re mugsug' tung" vhin: ke' ra".
2 Pho" Mao"So we' ngonhaung" Asang Yesu re ba jhao: ra" naonhaung" laba lajhao khyo" yang nhag' myan" ra" jeju we' ngaui pyo: yaug yo: ru wa byang" sho' naonhaung" qo" kham zo: vageshao: wo".
Mao"So: Yang Khai: Yu: Ru We' Khyin: Yu: Ru
3 Yao: yao" phungbao re we' gai shab: rure qo" bokham zo: nae" qhid' mae" ngonhaung" re khai: yu: ra" yaug: nho: laba lajhao khyo" yang Mao"So: phung qam: so' wa dangman" ra" caung:pa" thung" lam khug: khyo mae kaoso' daui nae" qhid' mae" ngonhaung" re qo ca" ra" ja: cao jab byid' to" ra".
4 Ceru:- yao: wa dao:so: byid' to" ra" gyai qi" qhang mung: phug' de; ra" jeju jhaung qhu" dao:so: ngonhaung" re byid' to" ra". Ai: jeju jhaung qhu" khyo" yang ce: mug: myid dao mae" byo; qeim: lo" ba: ra" gaung sho: shab' ra" khyo mae" naonhaung" phao: loe, mung: Mao"So: ve, khyao re naonhaung" qo" bokham: yu: ako".
5 Ce: khyo mathao mae naonhaung" wa gai: boe" thao" mae" qam: ke' yang: naonhaung" lam khug: myid mae gai shab: ra" lo, mau"- gai shab: ra" lo, mau" mae laba lajhao-
6 naonhaung" laba lajhao mae yao: yao" gaung re qo" khang" ru- naonhaung" yao" gaung re qo" khang" rumae zang: qhao" ru- naonhaung" zang: qhao" rumae Mao"So: khyo re phug' cao" ru.
7 Naonhaung" nho: Mao"So: khyo re phug' cao" rumae mao:nhaung: jhid' kao myid- naonhaung" mao:nhaung: jhid' kao myid mae jhid'de; myid laung" ke' byid: ge,-
8 aijham wa naonhaung" qo" ca" ra" ja: jham ngad mung:- aijham re naonhaung" magan: mago" qo" yu: to: ko" ngad: re wa ai: gao: jham wa naonhaung" Asang Yesu Khristu re ba jhao: ra" naonhaung" laba lajhao mae naonhaung" re lo, mau" zaui" thug' li" nhao mung:- zao" sho' akyu" byid' li" nae".
9 Aijham maqo" ra" yaug wa va: sho' mamyao: ra" myo, qeim myo,jid yaug ngad mung: lai: lo" ra" ayo, mae yao" qobo jham kyang" san: pye' byid: qhug' ra" khyo re to" myhid' pye' ra".
10 Airumung: nga" mao:nhaung: qe we"- naonhaung" re Mao"So khai: yu: ru we' khyin: yu: rure gang" tang nhao nae" qhid' mae" je yang: qam: ke' ge,- naonhaung" airu: kad' re wa naonhaung" wa khonhae" re: naonhaung" yao" lam khug: myid re shapye' genae" mangad:.
11 cekhyo" yang naonhaung" wa ngonhaung" Asang we' khyad' yu: ra" Asang Yesu Khristu nho: apyad ato: mung"dan: khug khyo qo" vao ye nae" qhid' mae" akho: akhang" jab byang" sho' qo" khae: yu: li" genae".
12 Airumung: naonhaung" wa ai:gu: re ba gau ngad: ru we' naonhaung" qo" khae: yu: to: vako" ra"- ai: dangman" rumae tang za: apan zaug: jo, vagesho' ngadqere: ngo wa ai: khyo jham we' sin: yang: khonhae" re: naonhaung" re ta" peim: ta" kyang: nug: ra".
13 Ngo kaoso' daui: na shi" gyo: mae ai: khyo jham re naonhaung" myid: beim" na gesho' naonhaung" re lhau: zhung" ke' byid: nae" ru wa ngo kad' ang: ru ngad: ein: myid: jho: ra".
14 Pe"mung:ga"re ngonhaung" Asang Yesu Khristu yang ngore de: de: za: ta" to: gau ngad: ru we' dakhyo:- ngo wa khomyhao" makyo re ce: shid ba: ra" gaung khyao re qhid' pye' co' nae" ngad: rure ngo ba: ra".
15 Airumung: ngo shid thao re naonhaung" wa khonhae" re: ai: khyo jham re myid: beim" na genae" qhid' mae" gai: boe" ra" qhi" ngo bao" thaug' byid: nae".
Yesu Khristu Phung Bao Re The' Myao Ra" Myo, Myao
16 Phung qam so' we' ngonhaung" Asang Yesu Khristu joe" li" ra" khyo naonhaung" re ba nhao: rumae ngonhaung" wa ta" yu: ra" mhomyi: re ngha yang: ta" ru mangad:- yao" qi" qhang: ra" phung qam: so' re ngonhaung" yao" myo; yang yao: the' myao: ra" mo, ngad: ra".
17 Yao: wa Pho" Mao"So: yang phug' te' nga: yhe' byid' ru qhug' mung:- Myhao: Thao" ra" Phungbao khug mae"- ceyaug wa ngo o ngaui mung: jhid'de; ra" nga" zo: ngad: ga: jhau thoe yao: jhao" joe" li" au:- ngonhaung" wa aitau mae na: lo mo, ngad: ra".
18 Ngonhaung" wa yao: we' daga" ai: Gyang" Lho" ra" bam dao mae na: jo; au:- mug:gaung mae" joe" li" ra" ce: thoe re ngonhaung" yao" nokhye' yang yao: the' gyo" lo: va".
19 Airumung: ngonhaung" wa Lapa qeyang ta" hau" lo" ra" mungdao: re je yang: myid: lam: ra"- ai: mungdao: re phug' cao" ge,- pe"mung:ga"re ai wa mug: bo" li" sho' mug: cad' yo mae bao byid' ra" myibaung: we' dau mung: naonhaung" aung khug nhag' lam: mae bao byid' ra" bo" myhung we' dau: ra".
20 Ngadqere: alhab' tho' mae Jham: Mugsug' mae bo: ra" lapa dao: re khag' ngadqere: yao: yao" myid khyo" lajheim: maqo" phaug' ta" rure naonhaung" beim: ge,-
21 pe"mung:ga"re pe" lapa mungdao: re: byu myid: o: ra" khyo" yang khonhae" re: mathug' li" qu" ngad: ra". Ngadqere: Gyang" Lho" Byo: yang jaung" ra" byu qe wa Mao"So mae" mungdao: re yao: bam ta" ako".