2
Kaoso' Daui: Ra" Laug Zang We' Gyang" Lho" Ra" Byu Myu"
1 Airumung: naonhaung" wa makhyang: mashab: ra" khyo alhab'- mhug' pyag' ru- geim kad' ru- myid nug' ru we' maphug' makhyad' shad' ra" dao: jham re to" pye' ge,-
2 Nau" nin" qe wa Byo we' sin" ra" nug' agyang" re khonhae" re: moe, shab' na: ru we' dakhyo: ngad ge,. Ai: nug' re shaug' yang: naonhaung" qi" qhang: li" ru we' khyad' yu: ru qhug' ge,-
3 Jham: mugsug' mae Asang wa khoqhi" nhag' khyag' shogu: myid bo yaug ngad: rure naonhaung" yao: ba: avako"- ga: ta" ru we' dakhyo: ngad: ra".
4 Asang jhao" lo geri:- ai: Asang wa byu: yang aphug' made,- ga: ngag: ha: pye' gengadqere: phug' de;- ga: Mao"So: yang khyin: yu: ra" kaoso' daui: ra" laug zang ngad: ra".
5 Naonhaung" wa kaoso' daui: ra" laug jham khyo" lo geri:- Amung: naonhaung" yao" gaung re byo we' sin" ra" yham mo" zhaug' ra" yham vo: boe" ge,- ai: yham mo" mae naonhaung" wa Mao"So khae: yu man" ra" byo we' sin" ra" xeim: re Yesu Khristu khyo" yang qhaug' byid' ra" gyang" lho" ra" khinjaung amyu" qekhyo" aimae caung da" byid' li" genae".
6 Pe"mung:ga"re
Jham: mugsug' mae- Ngo wa phug' de; ra" laug zang dazang re khyin: yu mung:
aire Ziun bam dao mae Ajheim mae" laug zang khyo" Ngo to" to: va"-
Yao: re lam khug: ra" yaug khag' ngadqere:
Khonhae" re: nhag' lam: mathao" magyug: nae" ga: ta" ra".
7 Ce: laug zang wa lam khug: ra" mo; qhid' mae" gyai aphug' de; ra".
Ngadqere: malam khug: ra" mo; qhid' mae" kam" wa- yham zhaug' ra" mo; yang akyu" mabo ga: khyin: pye' ko" ra" laug zang wa
Alhab' tho' mae phug' de; ra" laug zang boe" lo: ra"- ga: ta" to" ra".
8 Alao" gatau jham: mugsug' mae
Ce: laug zang wa byu qere tha" thaung: nhao mung: gyang: lang" lo" nhao: ra" laug baui ngad: li" nae"- ga: ta" to" ra".
Yao: bam wa mungdao: re malam" geyang: khyid au: the' thaung" ako". Airu wa yao: bam: qhid' mae" Mao"So myid o: ra" khyo ngad: ra".
9 Ngadqere: naonhaung" wa khyin: yu qhug' ra" byumyu" qe ngad: ako". Kho:kham: nho: khinjaung qe- gyang" lho" ra" byumyu" Mao"So sang: ra" byumyu" ngad: ako"- Naonhaung" re mug: cad' khug mae" khai: thug' yu mung: yao" mug' pho: bo" bao shad' khyo khai: vhao" yu: ra" Mao"So: mug' pho: lo, mau" jham re ta" hau" kyo: nae" qhid' mae" khyin: san: yu: ru ngad: ra".
10 Qhid' phyao: naonhaung" wa Mao"So: byumyu" mangad: ko" ngad: ra". Ngadqere: ana" naonhaung" wa- yao" byumyu" ngad: avako". Qhid' phyao: naonhaung" wa Mao"So: nhag' khyag' shogu: rure maba ko" ngad: ra". Ngadqere: ana" naonhaung" wa yao" nhag' khyag' shogu: rure qo" khae: yu: avako".
Mao"So: Jeim Qe
11 Nga" ba nam qe we"- naonhaung" myid nhag' lam: we' khonhae" re: gye jho" khe' na: ra" gaung sho: myid o kao bau: ra" khyo re dacao" ge,- ein: ce: mug: myid dao mae bang" vo qe we' dazab lhau" khug: na: ra" mo, we' dakhyo: ngad ko" ra" naonhaung" re ngo mho' ke' ra".
12 Mao"So re malam khug: ra" mo; yang magai makhyang" ra" mau" kad' mo, ngad: ako" ga: naonhaung" re qobo zhaug' na ko" au:- naonhaung" wa ai: Mao"So re malam khug: ra" mo; phaung mae naonhaung" ave, lo, mau" gyai gai sho' kad' qo: ra". Alao" yao: bam wa naonhaung" gai: ra" ave, lo, mau" jham re qu" ngaui: khae: yu mung: Mao"So joe" li" ra" ba na mae yao: re caung:khin" li" genae".
13 Asang: mathao mae kheim: so' qo" ra" xao su byu yaug khao: ngo" yang eib: ra" qao: mae na ge,- Khosin" pho" re kheim: so' ajhaung apan qo" yaug ngad: khyo"-
14 mang: zug: pho" qe wa makhyang" ra" mau" kad' mo, re qobo dae byid: mung: gai shab: ra" mau" kad' mo, re wa caung:khin" nae" qhid' mae" Khosin" pho" yang mau" byid' to: qhug' yaug ngad: ra" khyo" khae: yu ge,.
15 Pe"mung:ga"re naonhaung" zaui: so" ra" gai: ra" mau" zo" jham khyo" yang pe" maba: ra" dao: jhau: ra" byugo qe: nhad' dao: thoe re pyid' pye' byid: nae" rure Mao"So o: ra".
16 Naonhaung" wa loe; beim: na mo, we' dakhyo: kaoso' daui ge,. Ngadqere: naonhaung" loe; beim: rure makhyang" ra" mau" daja: ja: re nghoe' pye' nae" qhid' mae" daci ge,- Mao"So: jeim qe we' dakhyo: kaoso' daui: na ge,.
17 Yaug khao: ngo" re phug' myao: ge,- lam khug: ra" naonhaung" mao:nhaung: qere jhid'de; ge,- Mao"So re gyaug ge,- amung: khosin" pho" re phug' myao: ge,.
Khristu Kham Zo" Ra" Qug: Khai: Re Ve, So: Khyo" Ta" Ru
18 Daui daui mo, we"- naonhaung" Asang qeyang eib: ra" qao: mae na mung: nhag' ba: khyag' ru we' ba: myid nhag' bo mo, reza: mangad:- ayo: athin mung: ra" mo, rere: gyai phug' myao: byid: ge,-
19 Naonhaung" wa Mao"So: myid o: rure ba gemung: makham zo: man" ra" qug: khai: jham dayin dayo: zang: qhao" yang: naonhaung" kham zo: ko" re wa ce: mathao mae Mao"So wa naonhaung" re shaman" byid' li" nae".
20 Pe"mung:ga"re naonhaung" wa yao: yao: kad' shad' ra" qobo qhid' mae" kham zo: nae" man: qi" ra" qobo dae jham re zang: qhao" kham zo: yang: ngad: re wa pe" khin" nae" de; ra" i? Ngadqere: jo: rure kad' yang: qug: khai: khyag' qhui: rure naonhaung" kham zo: yang: ngad: re wa Mao"So wa ai: qhid' mae" naonhaung" re shaman" byid' li" nae".
21 Ceru: kad' genae" qhid' mae" Mao"So wa naonhaung" re khai: yu: to" ru ngad: ra". Khristu yao: yao: re: naonhaung" qhid' mae" qug: khai: khyag' qhui: ru kham zo" lo mung: yao" khyid khu re naonhaung" qo" cao" gesho' ga: naonhaung" re azung aso: to: byid: co' ra".
22 Yao: wa qobo mashad' ngad: ra". Yao" nhad' mae" mhug' ra" dao: thoe khag' khonhae" mathe' gyo" qu" ngad: ako".
23 Yao: maphug' makhyad' roe" ru qhug' lao"- yao: madam: tug' roe" ngad: ra". Yao: qug: khai: dayin dayo: kham zo: lao" re: yao: makyaug' nhin" ngad: ra". Din:man" ra" khyo" dao: kho' yaug ngad: ra" Mao"So: lo, mae kam" wa yao" khyo alhab' re myid: lam: to" ra".
24 Ngonhaung" wa qobo we' sin: yang: shid mung: din: man" ra" khyo" kaoso' daui nae" qhid' mae" Khristu yao: yao: ngonhaung" qobo jham re yao" gaung mae pyao: zang dao mae vin: pye' byid' ra". Naonhaung" wa yao" dae mathao: yang gai: shao: lo" qhug' avako".
25 Naonhaung" wa khyonghung: nghung" lo" byaug ko" ra" yao jham we' dau: lo" ako". Ngadqere: ana" naonhaung" wa yao zam: yaug we' naonhaung" alo zo: re lhaug' zaung" yaug jhao" dam: jhui" tug' lo byid' ru qhug' avako".