5
Masan Masin" Ra" Byu Qe
1 Asang wa Moshe re-
2 Mao gae: boe" ra" yaug- gaung mae" dae jad: qang: yug: ra" yaug- sushid mao re tin: yang: masan masin" boe" ra" yaug khao: ngo" re thang: na: ra" jamu mae" kho' thug' pye' genae" qhid' mae" we'-
3 Amung: nga" byu qe: phaung gaung: ngo na: jo; ra" jamu re yao: bam masan masin" maboe" nhao genae" qhid' mae" ai: caung:pa" thung" khyo" masan masin" boe" mo, alhab' re taung gaung khyo nhao: thug' pye' genae" qhid' mae" Israel byu qere amyin" byid: wa,- ga: ta" ra".
4 Israel byu qe wa mho dao: gyo: mung: ai bam alhab' re jamu mae" phoe' kho' thug' pye' ako".
Shad' Nghung" Ru Qhid' Mae" Dam: Khyug' Ru
5-6 Asang wa Moshe re Israel byu qe: qhid' mae" o mae ta" to" ra" pyang dao: jham re byid' ra". Byu dayaug yaug Asang re jhaug' mazhaug lo: dayaug yaug: dao mae shad' lhoe" yang: ngad: re- yao: wa yao" qobo re lhang: yu ca" mung:- yao" yang shad' ra" yaug re khug' byid' ra" ngaui byang" sho' mae" gatau ngo" bam mae" dabam re laung: yang: byid: qo: ra".
7-8 Ngadqere: byu ai: yaug wa shid: byaug mung: khyug' byid' ra" ngaui khae: yu nae" yao: we' jho" jhao" ra" amyu" ba nam khag' mana yang: ngad: re aire khinjaung qhid' mae" Asang re byid: nae" ngad: ra". Qobo qo" ra" yaug: qhid' mae" caung:pa" thung" khyo" kyang" san: pye' ru kad' rumae yao lo: re ci yang: kad' nae" ngad: ra".
9 Israel byu qeyang Asang re qhaug' byid' ra" gakai: lai bao" thaug' ngaui ja: khao: ngo" re:- yao: bam ye qhaug' byid' ra" yaug khinjaung pho" wa aire sang nae" ngad: ra".
10 Khinjaung yaug khao: ngo" wa yao: re byid' ra" ngaui" xeim: jham re sang nae" ngad: ra".
Malam" Myid: Jho: Ra" Yham Sang Myhi" Qe: Mung Khyo
11-14 Asang wa Moshe re o mae tung" to" ra" pyang dao: jham re byid: nae" qhid' mae" amyin" byid' ra". Yauggai dayaug wa- yao" yham sang myhi" wa yao: re jhaug' mazaug lo: gatau yauggai dayaug we' gaung sho: jho" zam" ra" khyo" yang yao: yao" gaung re masan masin" boe" nhao: ra" ga:- malam" mung: ra" khyo gai: boe" thug' li" ra". Ngadqere: yao" yham sang myhi" wa yao: shad' na: rumae mathe' taung: sagse: re: mana- aikhyo re zug' to: yang: yham sang pho" wa aikhyo re khyag' maba: ru gai: boe" ra". Mangad: lao" yham sang myhi" wa yao" yham sang pho" re jhaug' mazaug: ra" lo, mau" makad' sho' ngadqere:- yham sang pho" wa yao" yham sang myhi" re- malam" myid: jho: ru gai: boe" ra".
15 Pe" ru: ngad ngad yauggai yaug wa yao" yham sang myhi" re khinjaung pho" jhao" jhui" ye: nae" ngad: ra". Yao: wa qo ca" ra" ngaui" xeim: qhid' mae" bale cin man" phaui: dakyin: je rere: yu: vin: ye: nae" ngad: ra". Ngadqere: yao: wa aimae zhanlun xau we' nae pyo: ja: pe" re: magai: ke' ngad: ra". Pe"mung:ga"re: ai wa dangman" ru myao: thug' li" nhao nae" qhid' mae" yham sang myhi" re malam" myid: jho: ra" yham sang pho" nho: ngaui" xeim: ngad: ra".
16 Khinjaung pho" wa ai: myiqe: re qhid' au: khyo jhui" ye: mung: phan qhid' au: mae ye; jo, nhao nae" ngad: ra".
17 Yao: wa gyang" lho" qid daqhae: zhogam: khug' mae vhe' ke' mung:- Asang: qhid' kheim: Zaung phyao: gaung mae" myid zhai: dajhid' re yu yang:- aire kho: nhao nae" qhid' mae" qid mae ke' nae" ngad: ra".
18 Ai: thao- yao: wa ai: myiqe: myhi" nho: xae re pheim: sin" ke' byid: mung:- yao" lo, khug mae ai: ngaui" xeim: cin man" phaui: re ke' byid: nae" ngad: ra". Khinjaung pho" wa yao" lo, mae nhang: kheim: zao" nhao: ra" qid kho: bo: ra" khug' re zaui" ci nae" ngad: ra".
19 Ai: thao khinjaung pho" wa yao: ta" ra" ce: jham tang: dao: re myiqe: myhi" re khae: yu nhao nae" ngad: ra". Aiwa- nao wa lao shad' ra" lo, mau" makad' ngad: re wa- ce: qid: yang boe" nhao: ra" nhang: kheim" yang nao re dae te' li" nae" mangad:-
20 Ngadqere: nao wa lao shad' ra" lo, mau" kad' yang: ngad: re wa-
21 Asang wa ni" byu qe: phaung mae ni" mang re nhang: kheim: ke' vashao:- yao: wa ni" nho: myiqe" zai re zhan: vao lo" nhao mung:- ni" vae: dug: re qae" li" nhao vashao:-
22 Ce: qid wa ni" vae: dug: khyo vao lo" mung: vae: dug: re qae" li" nhao mung: ni" myiqe" zai rere: zhan: vao lo" nhao vashao:- ga" ru ngad: ra".
Myiqe: myhi" wa- ngo myid vang" ra" Asang airu: kad' vashao: ga: phaug' tau: nae" ngad: ra".
23 Ai: thao re khinjaung pho" wa ce: nhang: kheim: re tung" mung: aire qid kho: khug khyo cid' zaui: ke' nae" ngad: ra".
24 Khinjaung pho" wa yao: re gyai no nhao: ra" qid myiqe: myhi" re mashaug' nhao shire-
25 Ai: myiqe: myhi" lo, mae" ngaui" xeim: cin man" phaui: re yu mung:- aire ci yang: Asang re qhaug' byid: yang: phan dao mae kai: byid: nae" ngad: ra".
26 Ai: thao yao: wa ngaui" xeim: aso: khyo" aimae" dazhab' zhab' yu mung: phan dao mae phad' ngaui" nae" ngad: ra". Lo" thao" mae khinjaung pho" wa myiqe: myhi" re ai: qid shaug' nhao: nae" ngad: ra".
27 Yao: wa lao shad' va" yaug ngad: re- ai: qid wa gyai no nhao: li" nae". Yao" vae: dug: wa qae" li" mung: yao" myiqe" zai re: zhan: vao lo" li" nae"- yao" mang wa yao" byu qe: phaung mae nhang: kheim: boe" li" li" nae".
28 Ngadqere: yao: wa pe" qobo maqo" ngad: re wa pe" dae re: made; nae"- yao: wa zo: dau qo" myhung: li" nae".
29-30 Ceru wa yauggai dayaug myid nug: mung: yao" yham sang myhi" wa lao shad' ra" mau" kad' va" ga: malam" mung: ra" khyo boe" li" ra" mung mau" mae ci: ra" tarha" ngad: ra". Myiqe: myhi" re phan qhid' au: mae ye; jo, nhao mung:- khinjaung pho" wa ce: caung:pa" thung" we' sin" ra" mau" re kad' nae" ngad: ra".
31 Yham sang pho" yaug wa qobo mae" loe; beim nae" ngad: ra". Ngadqere: myiqe: myhi" wa qobo qo" yang: ngad: re qobo aphug' jham re yao: kham zo: ca" nae" ngad: ra"- ga: ta" ra".