34
Mug: Kyo: Jham
1 Asang wa Moshe re-
2 Israel byumyu" qere ce: o mae" mho" shid' khyo byid: wa,- ga: ta" ra". Ngo: yang naonhaung" re byid' ra" Khanan mung" khyo naonhaung" vao ye" lo" re- naonhaung" mug: myid mae" mug: kyo: jham wa o mae" we' dakhyo: ngad nae".
3 Mug: thao shad' khyo mae" mug: kyo: wa Zin din"pyad' yo mae" Edom mug: kyo: cao" yang: ngad: ra". Aiwa ba thug' shad' khyo tham: shid mug: thao mae" qhid: li" nae".
4 Ai mae" ba vao shad' khyo Akrabim bam gyo: khyo" lai: lo" mung: Zin din"pyad' yo khyo" mug: thao shad' Kade Banea joe" sho' ngad nae". Amae" ba vao shad' mug: am: khyo Hazara Adda we' Azmon joe" sho' ngad nae".
5 Airu wa Mug:gaung: panglai: thao mae" Egutu mug: kyo: joe" sho' ngad nae".
6 Ba vao shad' mae" mug: kyo: wa Mug:gaung: panglai: ngad nae".
7 Mug: am: shad' mug: kyo: wa Mug:gaung: panglai: cao" do, lo" mung: Hora bam joe" sho'
8 Aimae" Hamad bam gyo: joe" sho' ngad nae". Aiwa Zedad we'-
9 Ziphron khyo" lo" mung: Hazara Enan mae thao" nae" ngad: ra".
10 Ba thug' shad' mae" mug: kyo: wa- Hazara Enan mae" Shepham joe" sho' ngad nae".
11 Aiwa aitau mae" mug: thao shad' khyo Ain nho: ba thug' shad' Habela joe" sho' we' Galile tham: ba thug' shad' bug gaung jham joe" sho'-
12 Amae" mug: thao shad' khyo Yodan gyaung: cao" gyo" lo" mung: Tham: shid joe" sho' ngad nae".
Cejham wa naonhaung" mung"dan: nho: byid shad' mae" mug: kyo: jham ngad: li" nae".
13 Amung: Moshe wa Israel byumyu" qere ceru wa naonhaung" pha" ce' khyo" mung: gae: yu nae" mug: myid ngad: Asang: yang byumyu" gug kaung: dakhyae: re byid' to: va" mug: myid ngad:-
14 Rubin kaung- Gad kaung we' ba thug' shad' mae" Manashe kaung agaung: kho' wa yao: bam: gae bam re yao: bam yao" yham khaung jham khyo"-
15 Yerikho tau" te' Yodan gyaung: ba thug' shad' te' mae the' yu: avako"- ga: ta" ra".
Mug: Myid Kho' Gae Nae" Qo Qo" Ra" Au: Jhaung Qe
16 Asang wa Moshe re-
17 Khinjaung Eleaza we' Nun nho: yao: zo: Yoshu wa ai: mug: myid re ai: byumyu" qere kho' byid' li" genae".
18 Ai: mug: myid re kho' rumae yao: shid' zo: re bao" thaug' nae" amyu" kaung khao: ngo" mae" au: jhaung dayaug yaug rere: jhui" yu wa,- ga: ta" ra".
19-28 Cebam wa Asang khyin: to" ra" mo, ngad: ako".
29 Cebam wa Khanan mug: re Israel byumyu" qe: qhid' mae" jo,nho" mug: myid kho' gae byid: nae" Asang: yang mau" vhin: to: qhug' mo, ngad: ako".