32
Yodan Gyaung: Ba Thug' Shad' Mae" Byumyu" Jham
(Mpm 3.12-22)
1 Rubin kaung we' Gad kaung qe wa gug'nyhug' myo: sho' qo" ako". Yao: bam wa Yaze we' Gilead mug: wa nung: jham: qhid' mae" khonho" gai: rure the' myao lao"-
2 Moshe- Eleaza we' mo, byu phaung: nho: gatau: au: jhaung qejhao" ye: mung:-
3-4 Asang: yang Israel byumyu" re na: sang: yu nae" qhid' mae" bao" byid: ra" ce: mug: myid- Atarod- Dibon- Heshbon- Eleale- Sibma- Nebo we' Beon vogaung: jham wa gug'nyhug' kyaung" jham: qhid' mae" gai mung: ngonhaung" mae re: gug'nyhug' myo: sho' qo" bam: ra".
5 Ce: mug: myid re ngonhaung" qhid mae" jo,nho" sang zai khyo" byid: la,. Aimung: ngonhaung" re Yodan gyaung: gau" de, mung: thoemae daye: te" na nhao la,- ga: ta" ako".
6 Moshe wa naonhaung" Israel mao:nhaung: sang: cao: qe gyekhe' ye" ra" au: re- naonhaung" cemae na: gyo" co' genae" i?
7 Asang: yang Israel qere byid' to" ra" mug: myid khyo Yodan gyaung: re gau: mung: mavao ye: nae" khyo: qam: shan nhao nae" vae" seim" na genhaung i?
8 Naonhaung" nho: phug' pho" qe wa ngoyang ai: mug: re yejo" qu" nae" qhid' mae" Kade Barne mae" nhao: ke' au: re airu: kad' ako".
9 Yao: bam wa Eshko lao: khaung: joe" ye: mung: ai: mug: re yemyao: ako". Ngadqere: yao: bam dam: tug' lo: re ai: byumyu" qere Asang: yang byid' to" ra" mug: khyo yao: bam mavae" vao ye: sho' qam: shan nhao: ako".
10 Ai: ba na mae Asang nhag' yo: mung: dao:so: dalam: to" ra".
11 Aiwa Asang ngo wa airu: jham tang" to: va". Pe"mung:ga"re yao: bam wa nga" dao mae jhaug' mazaug ngad: ako". Egutu mae" thug' lo: ra" shid' xe zin we' ai: tho' qi" ra" yauggai dayaug re: ngo: yang Abraham- Isag we' Yaku re dao:so: byid' to" ra" mug: khyo maqo" vao ye: genae".
12 Ceru wa Kenizi byu Yephune nho: yauggai zo: Khaleb we' Nun nho: yauggai zo: Yoshu mae" lai yang yaug khao: ngo" re bota" to" ru ngad: yao: shid' zo: wa- Asang: re jhaug' zaug: na: ako".
13 Asang wa ai: byumyu" qere nhag' yo: mung: yao: re mangaui nhao: ra" byu daxag' geim" shid: dam: sho' din"pyad' yo mae byid xe zin du" lae" qin" nhao: ava".
14 Amung: ana" naonhaung" wa naonhaung" phug' pho" bam: jo, qo mae tha" vao: avako". Qobo qo" ra" byuxag' asag' daqae: wa- Asang: nhag' jam: yo" rure Israel byumyu" dao mae khai: khyo" yu nae" jin" jin" ngad: avako".
15 Rubin we' Gad byumyu" qe naonhaung" yao" thao cao" nae" ha: pye' geyang: ngad: re din"pyad' yo mae dalhang dam: shapye' pye' li" nae". Amung: yao: bam byo; qeim: lo" ru wa naonhaung" re qobo zhaug' ca" nae"- ga: ta" ra".
16 Yao: bam wa Moshe jhao" te' ye: mung: sao qhid' ngonhaung" yao jham: qhid' mae" laug zang: yang khyae kyae" mung: ngonhaung" re khugngha mo; qhid' mae" qae: pye' ra"gyetab vogaung: jham shi" te" yu nae" akhang" byid: la,.
17 Athao mae ngonhaung" wa ngonhaung" nho: Israel mao:nhaung: sang: cao: bam we' daga"- mang: zin: cao" ye: mung: yao: bam mae" boe" lo nae" mug: myid mae yao: bam ye:qo" te" na: bam sho' gyekhe' rumae au: she nae". Ai: ayo, gyo: mae ngonhaung" re khug ngha: na mo, ce: mug: mae" gye jham: lo, mae" gug: gam nae" qhid' mae" Cetau mae" gyetab vogaung: jham mae na ca" genae" ngad: ra".
18 Gatau: Israel kaung mae" byu qe alhab' mo; yao: bam re kho' byid' ra" mug: myid re qo" sang: ra" ayo, joe" sho' ngonhaung" wa ngonhaung" nho: yham khyo maphao nae".
19 Yodan gyaung: thoeshad' mae" yao: bam: phaung mae jo,nho" pe" rere: ngonhaung" mabo: sang nae". Pe"mung:ga"re ngonhaung" wa- ce: Yodan ba thug' shad' mae" ngonhaung" yao" gae bam re the' yu: to" bam va"- ga: ta" ako".
20 Moshe wa naonhaung" dang dang ein: ta" vako" ngad: re ce: Asang: qhid' kheim: mae mang: zin: jao: khyo ye: nae" seim" ge,.
21 Naonhaung" gyekhe' sulhe: qe alhab' wa Yodan qid gyaung: re gau" de; ye: mung: Asang: amyin" dao: khug mae na mung: yang: yao: bam re Asang aung: pye' sho' naonhaung" gyevo qere khe' zin: ca" zai ngad: ako".
22 Aimung: ai: mug: myid re sang: yu: li" genae". Ai: thao naonhaung" dam: qo" tug' lo" genae"- pe"mung:ga"re- naonhaung" wa Asang rere: naonhaung" Israel mao:nhaung: sang: cao: qere re: vin vo; byid' ca" ra" qo re zaui" pyang" byid: va" ruyang ngad: ako". Ailao" Asang wa ce: Yodan ba thug' shad' mae" naonhaung" mug: myid re aso: xam: byid' li" nae".
23 Ngadqere: naonhaung" wa naonhaung" dao:so: re mazaung ngad: re- naonhaung" wa Asang re qobo shad' ru ngad genae" ein: naonhaung" re ngo ta" peim: va". Ai we' sin: yang: pe" dashad' ge, naonhaung" wa yao" qobo: mathao mae qobo dae byid' ru qhug' li" genae".
24 Aimung: naonhaung" vogaung: jham re te: mung: naonhaung" yao jham: qhid' mae" khyae kyae" gengadqere: naonhaung" dao:so: to" to: va" rure kad' ge,- ga: phaug' tau" ra".
25 Gad we' Rubin byumyu" kaung mae" yauggai qe wa nhag' bo pho" we"- nao amyin" byid' ru we' dakhyo: ngonhaung" kad' nae".
26 Ngonhaung" nho: yham sang myhi" qe ngonhaung" myid:zo: qe we' ngonhaung" nho: nung: we' yao jham wa ce: Gilead mae" vogaung: jham mae na: thang: gyo" genae".
27 Ngadqere: ngonhaung" alhab' wa- Asang: yang amyin" byid' ra" khug mae na yang: mang: zin: ye: nae" jin" jin" ngad:. Nao ta" ru we' dakhyo: ngonhaung" wa Yodan gyaung: re gau" de; mung: mang: zin: nae"- ga: ta" ako".
28 Aimung: Moshe wa- Eleaza- Yoshu we' Israel byumyu" au: jhaung qere ce: amyin" dao: jham byid' ra".
29 Gad we' Rubin kaung mae" yauggai qe wa Yodan gyaung: re gau" de, mung: Asang amyin" byid' ra" khug mae gyekhe' ye nae" jin" jin" seim" yang: yao: bam bao" thaug' yu: ruyang ai: mug: myid re naonhaung" khe' khyad' aung: yu ko" ngad: re- yao: bam re yao: bam: jo,nho" khyo" Gilead mug: kho' byid: wa,-
30 Ngadqere: yao: bam wa Yodan re magau: naonhaung" we' daga" gyekhe' maye: ko"- yao: bam wa naonhaung" we' dakhyo: Khanan mung" gae bam re bothe' yu vageshao:- ga: ta" ra".
31 Gad we' Rubin kaung mae" yauggai qe wa nhag' bo pho" we" Asang: yang amyin" byid' ru we' dakhyo: ngonhaung" kad' nae".
32 Ngonhaung" wa ce: Yodan ba thug' shad' mae" ngonhaung" nho: jo,nho" mug: re qo" zam" to: sho' yao" yang amyin" byid' ra" khug mae Yodan gyaung: re gau" de, mung: mang: zin: nae"- ga: ta" ako".
33 Aimung: Moshe wa Gad we' Rubin kaung qe we' Manashe kaung agaung: kho' re Amori kho:kham Sihon nho: mug: myid alhab' we' Bashan kho:kham Oga nho: mug: myid mae" vogaung: jham we' avai: ayae mae" seyo: vogaung: jham bobo mung: jo, qo kho' gae byid' ra".
34 Gad amyu" kaung wa gyetab qae: kyae" ra" Dibon- Atarod- Aroe-
35 Atarod- Shophan- Yaze- Yogbeha-
36 Bed Nimra we' Bed Haran gyetab vogaung: jham re te" to" ako".
37 Rubin kaung wa- Heshbon- Eleale- Kiriathaim-
38 Nebo- Bala- Meon- (ce: mang: re lhai" pye' va") we' Sibma vogaung: jham re te" to" ra". Yao: bam wa yao: bam dam: te" to" ra" vogaung: jham re mang sag' jham mhang" ako".
39 Manashe nho: yauggai zo: Makhira ko' qe wa Gilead mung" khyo jhin" vao ye: mung: aimae yena: sang: na: ako". Aimae na: ra" Amori byu qere re: yekhe' thug' pye' ako".
40 Aimung: Moshe wa Makhira ko' mae" mo, re Gilead mug: re byid' mung: yao: bam wa aimae yena: ako".
41 Manashe kaung mae" Yaira wa vogaung: daqhae: re khe' zin" khyad' yu mung: Yaira nho: vogaung: jham ga: mang mhang" pye' ra". Noba wa-
42 Kenad we' ainho: vogaung: jham re khe' zin" khyad' yu mung: yao" mang re lao: yang: Noba ga: mang mhang" pye' ra".