30
Dao: Thang" We' Sin" Ra" Thung" Li Jham
1 Moshe wa Israel byumyu" qere ce: o mae bo: ra" mho" shid' khyo jham re byid' to" ra".
2 Byu dayaug wa Asang re daja: byid: nae" ga: dao: thang" to" re ngad ngad daja: ja: re jao" nae" ga: dao:so: to" re ngad ngad yao" dao:so: re magai: phyo' pye' yao: kad' nae"- ga: ta" to" ru ja: khao: ngo" re kad' ca" ra".
3 Myiqe: nau" dayaug wa yao: pho" yham mae na shi" au: Asang re daja: ja: byid: nae" ga: dao: thang" to" re ngad ngad daja: ja: re jao" nae" ga: dao:so: to" re ngad ngad-
4 Aire yao pho" the' gyo: yang: yao: pho" yang za: mangag: tam" pye' re yao: to" ra" dao:so: ja: khao: ngo" re kad' ca" ra".
5 Ngadqere: yao: pho" aire the' gyo: yang: ngag: tam" pye' ngad: re- yao: wa aire macao" pyang" ca" nae" qhid' mae" ngad: ra". Yao: pho" yang yao: re airu re makad' pyang" nhao: rumung: Asang wa yao: re qobo khyad' byid' li" nae".
6 Yham maqo" shi" ra" myiqe: myhi" dayaug wa dao: thang" daja: ja: mangad: lao" daja: ja: re jao" pye' nae" ga" ra" dao:so: re- thaug thaug ngad ngad mageim: nghin" yang: ngad ngad to: thao yham qo" lo" ru ngad: re-
7 Yao" yham sang pho" airu re the' gyo: yang: yham sang pho" yang za: mangag: tam" pye' re- yao: to" to" ra" dao: thang" dao:so: ja: khao: ngo" re kad' pyang" ca" ra".
8 Ngadqere: yao" yham sang pho" airu re the' gyo: yang: yao: re airu: makad' pyang" nae" qhid' mae" ngag: tam" pye' ngad: re- yao: macao" kad' pyang" ca" ngad: ra". Asang wa yao: re qobo khyad' byid' li" nae".
9 Cug' mo" ngad ngad yham sang pho" we' gao" na: ra" myiqe: ngad ngad wa yao: byid' to" ra" dao: thang" we' daja: ja: re jao" pye' nae" ga: ta" to" ra" dao:so: lam: khao: ngo" re kad' cao" ca" ra".
10 Yham qo" va" ra" myiqe: dayaug wa dao: thang" byid' to" re ngad ngad daja: ja: re jao" pye' nae" ga: dao:so: ngad ngad byid' to" re-
11 Aire yao" yham sang pho" the' gyo: yang: za: mangag: tam" pye' ngad: re- yao: to" ra" dao: thang" mangad: lao" dao:so: lam: khao: ngo" re kad' pyang" ca" ra".
12 Ngadqere: aire yao" yham sang pho" the' gyo: yang: yao: re airu: makad' cao" nae" qhid' mae" ngag: tam" pye' ngad: re- yao: wa aigu: re macao" ca" ngad: ra". Yao" yham sang pho" yang yao: re airu: maqo" kad' cao" nae" qhid' mae" ngag: tam" pye' rumung: Asang wa yao: re qobo khyad' byid' li" nae".
13 Yao" yham sang pho" wa- yao: byid' to" ra" dao: thang" dao:so: pe" re ngadqere: jao dang byid: nae" we' pyai" pye' byid: nae" akhang" qo" ra".
14 Ngadqere: aire yham sang pho" the' gyo" ra" thao: ba joe" sho' ai: thao: ce' to" rure pe" mangag: tam" ngad: re- myiqe: myhi" wa yao: to" to" ra" dao: thang" ngad ngad- dao:so: ngad ngad ja: khao: ngo" re kad' cao" ca" ra". Yham sang pho" wa aire the' gyo" ra" ba mae mangag: phaug' pye' byid' ra" khyo" yang aire dang nhao: ava".
15 Ngadqere: yham sang pho" wa- ai: dao: thang" re thao re phyo' pye' yang: ngad: re- ai: dao: thang" re cao" pyang" nae" lhaui" pye' ru qhid' mae" boe" lo: ra" qobo dae re yao: kham zo: ca" ra".
16 Cegu: wa- Asang: yang Moshe re byid' to" ra" yham maqo" shi" ra" myiqe: dayaug yao: pho" yham mae na shi" au: mangad: lao" yham qo" va" myiqe: myhi" dayaug: yang Asang re byid' ra" dao: thang" dao:so: we' sin" ra" tarha" ngad: ra".