20
Kade Mae Boe" Ra" Khyo Jham
(Pht 17.1-7)
1 Lho" sao qhid' khye' ein: khye' mae Israel mo, byu phung: geim" zin: din"pyad' yo khyo joe" lo gemung: Kade jo, qo mae jamu kad' na: ako". Ai mae Miriam shid mung: nyhab' pye' ako".
2 Yao: bam jamu kad' ra" jo, qo mae qid majo, ngad: ra". Airumung: amyu" byu qe wa Moshe we' Arun shid' tao: lhang" gam: zang" ham: li" mung:-
3 Ngonhaung" ai: Asang: qhid' kheim: Zaung qhid' au: mae ngonhaung" nho: Israel mao:nhaung: qe we' daga" boshid: lo" byaug va" ngad: re wa je: gai naeva" nhaung: ru-
4 Ni" shid' tao pe"mung: ce: din"pyad' yo khyo ngonhaung" re jhui" loko" i? Ngonhaung" wa ngonhaung" nho: gug'nyhug' jham we' daga" cemae shid geshao: ein ko" i?
5 Ni" shid' tao wa ce: pe" re: mayaug: ra" qug: khai: ra" jo, qo khyo ngonhaung" re pe"mung: Egutu mung" mae" jhui" thug' lo ko" i? Cemae gaug zo majo,- pho' ham" shi: majo,- sabyi shi: majo,- khaung: shi: majo, ngad: ra". Shaug' qid lhao" re: majo, ngad: ra" ga: nyhung: ako".
6 Moshe we' Arun tao wa amyu" byu qemae" phao: qui: mung:- Zaung kham: dung: mae yeye; jo; ako". Yao: shid' tao wa yao: shid' tao: myo, khung: re myid gaung khyo goe; gyo" ako". Asang: qhid' kheim: mae" bao qhui: ra" bo" bao wa yao: shid' tao shad' khyo thug' li" ra".
7 Asang wa Moshe re-
8 Ai: Dao: Thang" Ban" qhid' au: mae jo; ra" zaung: bao" re yu: yu wa,- amung: nao we' Arun wa mo, byu phung: geim" re khai: zhang" yu ge,- yao: bam: qhid' kheim: mae aitau mae jo; ra" laug zang re qid yug: thug' li" nae" ta" ge,- cekhyo"- ni" shid' tao wa amyu" byu qe: qhid' mae" laug zang mae" qid byid' li" genae". Yao: bam we' yao: bam: gug'nyhug' qe: qhid' mae" shaug' qid ngad: li" nae"- ga: ta" ra".
9 Asang amyin" byid' ru we' dakhyo: Moshe wa to" mung: zaung: bao" re yu: yu: ra".
10 Yao: we' Arun tao wa mo,byu phung: geim" re ai: laug zang qhid' au: mae khai: zhang" yu mung:- tau: lhan: mo, naonhaung" we" tae" gyo: ge, nga" shid' tao ce: laug zang mae" naonhaung" qhid' mae" qid yug: thug' byid: ca" i? ga: Moshe ta" ra".
11 Ai: thao Moshe wa zaung: bao" re tau mung: ai: laug zang re shid' dae be; ke' ra". Ailao" qid lao qi: zang yug: thug' li" ra". Amyu" byu qe alhab' we' gug'nyhug' jham shaug' ako".
12 Asang wa Moshe we' Arun tao re qeim mung: ni" shid' tao wa Israel amyu" byu qe: qhid' kheim: mae nga" gyang" lho" qam: so' re tau" yu nae" lam khug: myid malaug: bo ko" ruyang yao: bam re byid: nae" ein: ngo dao:so: byid' to" ra" mung" khyo ni" shid' tao wa yao: bam re maqo" jhui" vao ye: genae"- ga: ta" ra".
13 Ceru wa Meriba jo, qo mae boe" ru ngad: ra". Aitau mae Israel byu qe wa Asang re qobo vhin nyhung gemung: yao: wa gyang" lho" yaug ngad: rure yao: bam re qhu" byid' ra".
Israel Byu Qe Su" Lai: Lo" Nae" Ngag: Pye' Ru
14 Moshe wa Kade mae" Edom kho:kham jhao" lagyo: qere nhao: ke' ra". Yao: bam wa- ce: mungdao: wa ni" amyu" Israel amyu" qemae" mungdao: ngad: ra". Ngonhaung" qug: khai: qhug' rure nao ba: ra".
15 Ngonhaung" phug' pho" qe wa Egutu mung" khyo ye: mung: aimae ngonhaung" myo: sho' zin yena: bam va". Egutu byu qe wa ngonhaung" nho: phug' pho" qe we' ngonhaung" re yhin" lo: ako".
16 Amung: ngonhaung" wa Asang re bao" thaug' yu nae" mho' yao: bam va"- yao: wa ngonhaung" mho' yao thoe re gyo: byid: mung: Egutu mung" mae" ngonhaung" re jhui" thug' lo" nae" mug: lagyo: dayaug re nhao: ke' byid' ra". Ana" ngonhaung" wa ni" mug: kyo: vogaung: Kade mae na: bam va".
17 Ni" mung" khyo" su" lai: lo" nae" jeju khyo" ngonhaung" re akhang" byid: la, ngonhaung" we' ngonhaung" nho: nung: jham wa khyothaung" mavao nae" ni" yo- ni" sabyi khyae jham khyo mavao nae"- aimung: ni" qid thaung: jham mae" qid re: ngonhaung" mashaug' nae" ni" mug: kyo: mae" thug' lo" yo, joe" sho' ngonhaung" wa hau" mo" khyo khyo" za: su: nae"- ga: ta" ako".
18 Ngadqere: Edom byu qe wa naonhaung" re ngonhaung" mug: khyokhyo" za: su: nae". Naonhaung" lai nae" seim" gelao" ngonhaung" thug' li" mung: gye li" zin: nae"- ga: tau" ako".
19 Israel byu qe wa ngonhaung" wa hau" mo" khyodang mae na: jo, nae" ngonhaung" we' ngonhaung" gug'nyhug' jham naonhaung" qid thaung: dalam: lam: mae" shaug' geyang: ngad: re ai: qhid' mae" ngonhaung" khyug' nae" ngonhaung" o: ru wa su" lai: lo" nae" ru ngad: ra"- ga: ta" ako".
20 Edom byu qe wa- ngonhaung" akhang" maqo" byid: ga: dam: phaug' tau" ako". Amung: yao: bam wa Israel byu qere gyekhe' nae" qhid' mae" qam: bo: ra" gyephung: mo" zang to" li" ako".
21 Edom byu qe Israel byu qere yao: bam: mug: myid khyo" su" lai: lo" nae" akhang" mabyid: geyang: Israel byu qe wa dam: tug' mung: khyo gakhe' khyo" ye" lo" ako".
Arun Shid: Ra" Khyo
22 Israel mo, byu phung: geim" Kade mae" to" mung: Edom mug: kyo: mae" Hora bam khyo joe" lo: ako".
23 Aitau mae Asang wa Moshe we' Arun tao re-
24 Arun wa Israel byu qere byid: nae" ein: ngo dao:so: byid' to" ra" mung" khyo maqo" vao ye: nae" ngad: ra". Ni" shid' tao ngore Meriba jo, qo mae nga" amyin" re tau: lhan: geyang: Arun wa shid nae" ngad: ra".
25 Arun we' yao" yauggai zo: Eleaza pha: re Hora bam khyo jhui" do, ye: mung:-
26 Aitau mae Arun" nho: khinjaung bau: qhang jham re khyad' yu yang: aijham re Eleaza re vhe' byid: wa,- Arun wa aimae shid nae" ngad: ra"- ga: ta" ra".
27 Moshe wa Asang amyin" byid' ru we' dakhyo: kad' ra". Yao: bam wa mo,byu phung: geim" myao jao: mae yao: Hora bam khyo do, lo" ako".
28 Amung: Moshe wa Arun" nho: khinjaung bau: qhang jham re khyad' yu yang: aijham re Eleaza re vhe' ra". Ai bam au: mae Arun shid: lo" byaug: ra". Moshe we' Eleaza wa dam: tug' gyo" lo: ako".
29 Mo,byu phung: geim" wa Arun shid va" rure ba gemung:- yao: bam alhab' mo; yao" mathao mae sam xe ba kaug' ngug: ako".