5
Myaung Mo, Re Deim" Zag Zo" Ra" Khyo
1 Ai: thao khomyhao" mamyao" re amyu" byu myiqe: qe we' yauggai qe wa yao: bam: mao:nhaung: Yuda qe: dao mae manug makhyad' nyhung: li" ako".
2 Damyo" wa- ngonhaung" mae yham byu myo"- ngonhaung" qo" xo' daui: na nae" qhid' mae" gaug zo ca" ra"- ga: ta" ako".
3 Gaje wa- ngonhaung" mamoe' shid' nae" qhid' mae" ngonhaung" wa ngonhaung" nho: yo we' sabyi yo jham- ngonhaung" nho: yham jham re paung: zo: ca" bam va"- ga: ta" ako".
4 Aimae" gatau damyo" wa- ngonhaung" wa kho:kham re ngonhaung" nho: yo we' sabyi khyae jham: qhid' mae" khang: ke' nae" qhid' mae" ngaui jhid' ca" ra"-
5 Ngonhaung" wa ngonhaung" nho: mao:nhaung: Yuda qe we' daboe: za: mangad:- ngonhaung" nho: yao: zo: qe wa yao: bam: yao: zo: qeru: yao: magai ko" ngad: ra" mangad: i? Ngadqere: ngonhaung" wa ngonhaung" nho: yao: zo: qere jeim toe' pye' ca" va". Ngonhaung" nho: myiqe: zo: damyo" re wa jeim khyo" bin: aung: zo" pye' va". Ngonhaung" nho: yo jham we' sabyi khyae jham re ngonhaung" mae" yu: pye' byid' ru qhug' mung: ngonhaung" wa masho: majhin phyag' byaug va".
6 Yao: bam: nyhung thoe re ngo the' gyo: lao" ngo nhag' yo: mung:- mau" zaui: nae" myid: phyid' va".
7 Ngo wa au: jhaung qe we' zug: ade, qere ngag: thaug' pye' mung: yao: bam re- naonhaung" wa naonhaung" mao:nhaung qere deim" zag zo" na: ako"- ein: ta" va".
Ngo wa ai: qug: khai: re zaui: nae" qhid' mae" mo, byu qere khai: zhang: mung:- ceru: ta" va".
8 Ngonhaung" gai: boe" ra" qhi" yao: bam yao" gaung re taung bug qejhao" aung" pye' ca" yang: aung" pye' vako" ra". Ngonhaung" nho: Yuda mao:nhaung: qere ngonhaung" gai: boe" ra" qhi" dam: tug' vai: yu va". Ana" naonhaung" wa naonhaung" yao" mao:nhaung: qere yao: bam: mao:nhaung: Yuda byu qejhao" yao: bam yao" gaung re aung: zo" pye' sho' deim" zag: nhao: na: ako". Au: jhaung qe wa sae za: na: jo; mung: pe" maqo" ta" ngad: ako".
9 Ai: thao ngo wa ceru: ta" va"- naonhaung" kad' na: ru wa shad' ra". Naonhaung" wa Mao"So re phug' cao" mung: jo: rure kad' ang: ako". Ailao" naonhaung" wa- taung bug byu ngonhaung" nho: gyevo qeyang ngonhaung" re ceim" jung" nae" akhyo pe" daja: re: mabyid' li" genae".
10 Ngo wa amyu" byu qere ngo mae" ngaui jhid' yu nhao mung: gaung zo jhid' zo: nhao va". Aimung: nga" byin cao: qe we' nga" qhid' mae" mau" zaui: mo, re: ai we' dakhyo: jhid' byid' ako". Ana" ngonhaung" wa- ngonhaung" dam: qo" yu ca" ru alhab' re to" pye' gelang: se,.
11 Yao: bam: yang naonhaung" re xe' ca" ra" jhin ngaui ngad ngad- gaug zo ngad ngad- sabyi qang: ngad ngad- zhanlun xau ngad ngad alhab' re khyad' pye' gese,. Aimung: yao: bam: yo jham re sabyi khyae jham zhanlun sag' yo jham we' yham jham re ana" yao: dam: tug' byid' pye' ge,- ein: ta" va".
12 Au: jhaung qe wa- nao ta" ru we' dakhyo: ngonhaung" kad' bam nae". Ngonhaung" wa jo,nho" jham re dam: tug' byid: mung: jhin jham re maboe' yu: lo nae"- ga: ta" ako".
Ngo wa ai: au: shi" yao: bam to" ra" dao:so: re zam: nae" qhid' mae" khinjaung qere khai: to: mung:- khinjaung qe: qhid' kheim: mae jham tang: nhao va".
13 Ailao" ngo wa- nga" phyid' dam: mae yang" ci: ra" pin: cug' re pheim: yu mung: ko: pye' va". Ngo wa- naonhaung" to" ra" dao:so: re mazam: yaug khag' rere: Mao"So: yang ceru: ko: pye' li" nae". Mao"So wa naonhaung" yham jham we' naonhaung" sang: ra" ja: khao: ngo" re yu: pye' byid: mung: naonhaung" re pe" matang" to: byid: co' nae"- ein: ta" va".
Ai: mae joe" na: ra" yaug khao: ngo" wa- Amen- ga: ta" mung: Asang re caung:khin" byid' ako". Aimung: au: jhaung qe wa yao: bam: dao:so: jham re phug' cao" ako".
Nehemia Yao: Yao" Qhid' Mae" Mamyid: Ru
14 Artazaze khosin" boe" ru daxe: shid' zin ein: zin mae"- yao: eib: ra" sam: xe: shid' zin ein: zin joe" sho' Yerusalem mae ngo mung" zug: mo" kad' lai: lo: ra" daxe: shid' zin gu: mae nga" ba nam sang: cao: qere:- ngore mung" eib zug: dayaug khyo" ngo kham zo: nae" qhid' mae" khyo" byid' ra" zo: shaug' daja: re: mazo:-
15 Nga" qhid' mae mung" eib zug: kad' lai: lo" ra" yaug khao: ngo" wa- zo:ve we' sabyi qang: qhid' mae" daba re ngaui kye' byid xe khyo" gaug zo: mung: mung" byu qere qola: vin nhao: ako". Yao: bam: daui daui okaung qe lhao" re: mung" byu qere deim" zag zo" ako". Ngadqere: ngo wa ai we' madau lo: mau" zaui" ra". Pe"mung:ga"re ngo wa Mao"So re nga: yhe' byid' ra".
16 Ngo wa- vang dam: zao: ra" mau" mae nga" qam: alhab' ke' pye' mung: pe" jo,nho" daja: re: maqo" zhang: to:- nga" qhid' mae" mau" zaui: byid' ra" yaug khao: ngo" wa- dam: zao: ra" mau" mae bobao" ako".
17 Ngo wa- nga" vae: zo: saboe" mae Yuda byumyu" qe we' yao: bam: au: jhaung qe dayo: ngo" xe yaug re khyao za: jhui" zo: mung: aitho' mae- avai: ayae mung"dan: jham mae" ngojhao" li" ra" byu alhab' rere: da" zho: va".
18 Ba khao: ngo"- ngo wa nung: jaung lo: dadau: dau: gai: yaung" thao" yao khyaug' dau:- qo, myo: sho' dau: da" zho: mung: daxe ba mae daba sabyi qang: asag' ameim" da" jhaug' va". Ngadqere: mung" byu qe khoru" ra" qola: re vin ca" ko" rure ngo ba byid: mung: mung" eib zug: mo" dayaug gaug zo: nae" akhang" qo" to" rure ngo magaug zo:-
19 O" Mao"So we"- nao re ngo akyu" mho' ke' ra". Ce: byumyu" qe: qhid' mae" ngo kad' lai: lo: ra" gai: ra" nga" lo, mau" alhab' mathao mae ngo re myid: beim: byid: la,- ein: akyu" mho' va".