NEHEMIA
(NEHEMIAH)
Dao: phung"
Nehemia mugsug' re byid dau gai: kho' ra". 1) Yuda mung" re loeib nae" qhid' mae" Persia khosin" pho" yang Yerusalem khyo nhao: ke' yang: Nehemia Yerusalem khyo tug' lo: ra" khyo. 2) Yerusalem vogaung: vang dam: zao: to' ra" khyo. 3) Mao"So: tarha" re Ezra yang nghe' kyo: mung: amyu" byu qe qobo lhang: yu: ra" khyo 4) Yuda mung" zug: khyo" Nehemia zug: kad' mung: mau" myo: sho' zaui" ra" khyo.
Nehemia mugsug' mae" xam: so: gai: ra" khyo dalam: wa Nehemia Mao"So re vin tang: no, no, khug ngha: na: ru we'- Mao"So re dazab makyo khyao za: akyu" mho' ru ngad: ra".
1
1 Ce wa Hakalia nho: yauggai zo: Nehemia bin: kad' lai: lo: ra" mau" jham: tung" xam: japhin: ngad: ra".
Yerusalem Vomo" Re Nehemia Myid: Sang: Kho: Ru
Persia mung" mae Artazaze khosin" kad' ru shid' xe zin ein: zin Kisle lho" khye' mae ngo Nehemia wa vomo" Susa mae joe" na: jo;-
2 Nga" mao:nhaung: qemae" dayaug ngad: ra" Hanani wa byu daphung: we' daga" Yuda mung" mae" joe" lo mung: Babelon mae pyaung" nha: to" rumae" phao: lo: ra" ngonhaung" nho: mao:nhaung: Yuda byu qe: khyo re we' Yerusalem nho: khyo re ngo lham: myid' qu"-
3 Yao: bam wa mashid na: dang mung: mug: xug' khyo dam: lo" joe" na mo, wa gyai na qug' bam: ru we'- avai: ayae mae na: ra" taung bug byumyu" qe wa yao: bam re qu" ngai: na ko" ra" khyo ngore lota" kyo" ako". Yao: bam wa ngore- Yerusalem vomo" vang jham byo; qeim: jo; sho' ru we'- vomo" kham: qi: jham wa ngha" pye' ra" ayo, mae" ana" joe" sho' madam: nyhang" zao: to: shi" rure: ta" kyo" ako".
4 Cegu: alhab' re ngo the' gyo: lao" ngo wa gyo" zaung mung: ngug: na:-
Ba na myo: sho' ngo kaug' ngug mung: zo mazo: lo: na: jo;- ngo wa Mao"So re-
5 Mug:gaung Asang Mao"So we"- nao wa qi" qhang yaug ngad mung:- nao re ngonhaung" wa gyaug: ye; jo; bam va". Nao wa- nao re jhid'de; mo, we' to" ra" dao: thang" re jhaug' zaug taung" zam: mung: nao amyin" byid' to" rure cao" ra".
6 Asang we"- ngore qu" qu" wa,- airumung: ni" daui: daui: mo, Israel byumyu" qe: qhid' mae" myi" re: na" re: ngo akyu" mho' na: ra" au:- nga" akyu" mho' dao: re gyo: byid: la,- ngo wa- ngonhaung" Israel byumyu" qe qobo shad' va" rure lhang: yu: ra". Ngo we' nga" phug' pho" qe wa qobo shad' bam va".
7 Ngonhaung" wa nao re ngag: thaug' ra" khyo" makhyang: mashab: ru kad' lai: lo mung: nao amyin" byid' to" va" khyo re macao" lo: kad' va". Ngonhaung" wa- ni" daui daui yaug Moshe khyo" nao: yang ngonhaung" re byid' to" ra" tarha" jham re maphug' cao" lo lo: kad' va".
8 Nao Moshe re ta" to" ra" dao: re ana" myid: beim: wa,- ai wa Israel byumyu" naonhaung" qe nga" dao mae jhaug' mazaug ko" ngad: re- ngoyang naonhaung" re gatau: byumyu" qenho: phaung gaung: khyo khe' sin" pye' nae".
9 Ngadqere: naonhaung" ngojhao" dam: lhang: lo mung: ngoyang naonhaung" re amyin" byid' to" rure kad' cao" ko" ngad: re wa- naonhaung" re mug: myid thao" sho' khyo khe' sin" pye' vasho' ngadqere:- ngore caung:pa" nae" qhid' mae" khyin: to" ra" jo, qo khyo naonhaung" re dam: jhui" tug' yu nae"- ga" ru ngad: ra".
10 Asang we"- cebam wa ni" daui daui mo, we' nao yao" byumyu" qe ngad: ako". Nao wa ni" qi" qhang: ra" kheim: so' we' qam: o: khyo" yang yao: bam re khyad' yu: to" ra".
11 Ana" nga" akyu" mho' dao: re tae" gyo: byid: mung: nao re nga: yhe' byid: nug ko" ra" daui daui mo, gaje qe: akyu" mho' dao: rere: tae" gyo: byid: wa,- ana" ba ngore aung doe; ru byid: la,- khosin" pho" yang ngore nhag' khyag' nae" khyo" kad' ke' wa,- ein: akyu" mho' va". Ngo wa ai: ba na mae khosin" pho" nho: sabyi qang: caung da" byid: yaug ngad:.