24
Caung:pa" Yham Byo; Qeim: Nae" Khyo Re Yesu Ta" Ru
(Mrk 13.1-2; Luk 21.5-6)
1 Yesu wa Caung:pa" yham mae" thug' lo" mung: su" lo" na: au:- mho"zo: qe wa yao: jhao" qui" lo yang:- Caung:pa" Yham mae" yham jham re Yesu re ceim" shid' ako".
2 Yesu wa yao: bam re- ce: yham jham re naonhaung" myao ko" mangad: i? Ngo naonhaung" re ta" ru wa- Ce: yham wa laug baui dabaui re: makai" jo, lo: sho' byo; qeim: lo" byaug li" nae"- ga: ta" ra".
Khyag' Qhui: Ru We' Yhin" Ru Jham
(Mrk 13.3-13; Luk 21.7-19)
3 Yesu wa zhanlun bam dao mae zaung: jo, ra" au:- mho"zo: qe wa yao: bam yao: za: Yesu jhao" qui" lo gemung:- ceru khonhae" boe" li" zai i? Nao dam: joe" li" nae" ayo, we' mug: myid thao" lo" nae" ba na lao"- pe" ja" ve, lho jham boe" thug' li" zai laug i? ngonhaung" re ta" kyo: la,- ga: Yesu re myid' ako".
4 Yesu wa yao: bam re- Naonhaung" re khag' yang re: majhui" pyag' lo" geshao:- lha" yang: na ge,-
5 Pe"mung:ga"re byu myo: sho' mo, wa nga" mang vin yang: thug' li" mung:- ngo wa Meshia ngad va"- ga: ta" yang: byu myo: sho' mo, re jhui" pyag' lo" byaug: li" genae".
6 Gye khe' ru we' gyekhe' lau dao: jham re the' gyo: gelao"- naonhaung" dagyo" din ge,- ai: gu: wa boe" li" ca" ra"- ngadqere: ai: lo" thao" ru wa mangad: shi: ngad: ra".
7 Byu damyu" we' damyu"- damang: we' damang: gye jho" zin" li" genae"- Jo, qo gatau tau mae myid lab: lab' li" nae"- bao" khug' khug' li" nae"-
8 Ai:jham wa qug: khai" ru aqhid ngad: ra".
9 Byu jham wa- naonhaung" re qobo dae kham zo: nae" we' se' pye' nae" qhid' mae" ab byid' pye' li" genae"- nga" mathao mae byu alhab' mo, naonhaung" re nghang" li" genae".
10 Alao"- byu myo: sho' mo, wa khyonghung: nghung: mung: yao: cao: yao: jho" ab byid' ru we' yao: cao: yao: manug jho" thug'- jho" nghang" li" genae".
11 Lapa apyag' qe myo: sho' thug' li" mung:- byu myo: sho' mo, re jhui" pyag' lo" byaug: li" genae".
12 Makhyang" ra" mau" zo" laug: li" yang:- byu jham wa jhid'de; myid cae" lo" byaug: li" genae".
13 Ngadqere: athao jao: sho' thaug' qhao" yaug wa khyad' yu: ru qhug' nae".
14 Byumyu" cao jab: qhid' mae" sagse: boe" vashao:- Mug:gaung: mung"dan: Ngaui Bau" Lau Dao: re mug: myid gam: sho' kho" kyo: byid: ca" nae". Ai: thao re za: lo" thao" ra" ba na joe" lo: li" nae".
Qu" Din Sho' Ra" Maca' Majhad'
(Mrk 13.14-23; Luk 21.20-24)
15 Lapa Daniela ta" to" ra" qu" din sho' ra" maca' majhad' wa- ai: gyang" lho" ra" jo, qo mae li" ye, jo; rure naonhaung" myao: li" genae"- (Nghe' na yaug wa ba: gyo: vashao:)
16 Ceru re the' myao lao"- Yuda mung" mae na yaug wa- bam khyo tao" phao vashao:-
17 Yham khaung dao mae na: ra" yaug wa- gyo" lo mung: yham khug mae" zai daja: ja: malo" vao: yu lo: vashao:.
18 Alao"- yothaung: din" mae na: ra" yaug re:- yao" bau: qhang yu: ci nae" qhid' mae" yham khyo madam: tug' lo vashao:-
19 Ai: ba na gyo: mae gaung la: mo, we' nug: nau" jhui: mo, wa- gyai qug: khai: genae".
20 Airumung:- naonhaung" tao" phao nae" ra" ayo, wa- gyo, yo, mae we' Dugno: Ba mae mangad: vashao:- Mao"So re akyu" mho' na ge,.
21 Pe"mung:ga"re- Mao"So phan" to" ra" mug: myid aqhid mae" ana" ba joe" sho' maboe" qu" shi" ra" qug: khai: khyag' qhui: ru wa ai: ba na gyo: mae boe" thug' li" nae".
22 Amung: ai: ayo, ba na jham re Mao"So: yang maqhaung" pye' ngad: re wa- khag' re: qo" daui: na nae" ru mangad:- ngadqere: khyin: yu: to" ra" mo; qhid' mae" Mao"So: wa ai: ba na jham re qhaung" pye' li" nae".
23 Ai: ayo, mae byu dayaug yaug wa naonhaung" re- Qu" wa cetau mae Meshia na: ra"- thoetau mae Meshia na: ra" ga: ta" ngad: re- yao: ta" rure dalam" ge,-
24 Pe"mung:ga"re- Meshia apyag' qe we' lapa apyag' jham thug' li" genae". Yao: bam wa gai: boe" ngad: re khyin: yu: to: va" mo, re lhao" qo" jhui" pyag' yu nae" qhid' mae" ve, lho jham we' mug' pho: mau" zo" jham kad' qhu" li" genae".
25 Tae" gyo: ge,- ngo naonhaung" re gau: qhid' khae" yang: ta" to: va".
26 Su: yang naonhaung" re- Qu" ge,- Meshia wa din"pyad' yo mae na: ra"- ga: ta" gengadqere:- ai: khyo dathug' ye: ge,- Yham khug mae na: ra" ga: ngadqere: dalam" ge,.
27 Pe"mung:ga"re- lhe' cad' wa ba thug' shad' mae" cad' mung: ba vao shad' joe" sho' mug:gaung geim" bao qhui: lo" ru we' dakhyo: Byu: Yao: Zo: joe" li" nae" ngad: ra".
28 Mao gaung jo; ra" tau nangda jham na: li" genae".
Byu: Yao: Zo: Joe" Li" Nae" Ru
(Mrk 13.24-27; Luk 21.25-28)
29 Ai: qug: khai: khyag' qhui: ru bin: boe" we' ba wa no; byaug: li" nae". Lho" re: mazho lo nae". Kyi jham wa mug:gaung mae" byid: gyo" lo" mung:- mug:gaung mae" qam: so' jham wa- laui" nan" li" genae".
30 Alao" mug:gaung mae" Byu: Yao: Zo: joe" li" nae" ve, lho jham myao: thug' li" nae". Byu: Yao: Zo: wa qam: so' phungbao we' daga" mug:gaung: jham thaui: dao mae joe" li" rure myid gaung dao mae" byumyu" alhab' the' myao gelao"- ngug byid ngug nhe' boe" genae".
31 Alao"- labo" qi: thoe myang: li" mung:- yao" mug: lagyo: qere mug: myid byid khyug geim" khyo nhao: ke' li" nae". Yao: bam wa yao" yang khyin: yu: to" ra" mo, re mug: myid gam: sho' mae" cao" zhang: yu: li" genae".
Pho' Ham" Gae Dao: Tau"
(Mrk 13.28-31; Luk 21.29-33)
32 Alao" pho' ham" gae re qu" yang: zhao: yu ge,- Pho' ham" gae mae" anyaug thug' li" mung: vho' nau" tad' li" lao"- zin vao kheim: joe" li" na va" rure naonhaung" ba: ako".
33 Ai we' dakhyo:- aijham alhab' boe" lo: na: rure naonhaung" the' myao gelao"- Byu: Yao: Zo: wa jhao" li" mung: kham: dung: mae lhao" ngad va" rure naonhaung" ba ge,.
34 Ngo naonhaung" re dang za: ta" ru wa- Ana" na: jo; ra" byu ceqae: alhab' mashid shi: re aijham alhab' boe" li" nae".
35 Mug:gaung we' myid gaung lai: lo" byaug ngadqere:- nga" dao: jham wa khonhae" re: malai: lo" nae".
Ba Na We' Yo, Khyin: Re Khag' Maba
(Mrk 13.32-37; Luk 17.26-30; 34-36)
36 Ngadqere: ai: ba na we' yo, qug re Mao"So mae" je yang: khag' re: maba- Mug:gaung dao mae" mug: lagyo: jham we' Yao: Zo: lhao" re: maba ngad: ra".
37 Noa ban: mae boe" ru we' dakhyo: Byu: Yao: Zo: joe" li" rumae re: airu boe" nae".
38 Pe"mung:ga"re daqid mashi: shi" ra" pyad mae" byu jham wa Noa qid sang pho khyo vao lo" ra" ba na joe" sho'- zo: zo: shaug' shaug' myi:byid: myi:yu mung: na: ako".
39 Ai: daqid shi" li" mung: yao: bam alhab' nab: shid: lo" ra" ba na joe" sho' yao: bam mabeim: maso: lo: na: ako".
40 Alao"- yothaung: mae na: ra" byu shid' yaug mae" dayaug re jhui" yu mung:- dayaug re wa tang" to: co' li" nae".
41 Laug lhang daga" gyag: na ko" ra" myiqe: shid' yaug mae" dayaug re jhui" yu mung:- dayaug re tang" to: co' li" nae".
42 Airumung: lha" yang: lhaug' na ge,- pe"mung:ga"re naonhaung" Asang wa kho: au: joe" li" nae" rure naonhaung" maba gengad: ra".
43 Yham sang wa khug' hab' li" nae" yo,khyin: re ba: to" ngad: re wa yao" yham re khug' hab' maqo" kyaung" thad' vao li" nae" qhid' mae" yao: wa lha" yang: lhaug' na: li" nae" rure naonhaung" beim: ge,-
44 Airumung: naonhaung" wa khonhae" re: jin" jin" za: seim" to: ge,- pe"mung:ga"re- Byu: Yao: Zo: wa naonhaung" mamyid: to" ra" au: re joe" li" nae".
Kyid: Ra" jeim we' Makyid: Ra" Jeim
(Luk 12.41-48)
45 Alao"- ai: kyid: ru we' qag: ra" jeim wa khoyaug ngad: i? Ai: yaug wa gatau: jeim qere eib khang" nae" we' ayo, joe" lao" zokho gae byid: nae" qhid' mae" Asang: yang san: to" ra" yaug ngad: ra".
46 Yao" Asang dam: joe" lo: au: re airu:- yao" mau" zo" re kyid kyid za: zaui" na: ra" jeim wa ngaui lho" ra".
47 Ngo naonhaung" re dang za: ta" ru wa Asang wa yao" jo,nho" alhab' re zaui: nae" qhid' mae" ai: jeim re san: to" li" nae".
48 Ngadqere: ai: jeim wa makhyang" ra" jeim ngad: re wa yao" aung khug mae- Nga" Asang wa dam: tug' lo nae" myao" shi"- ga: myid yang:-
49 Yao" jeim byin cao: qere be, thaung: mung:- yhid ya: qe we' zo: shaug' yang: na: li" nae".
50 Amung:- ai: jeim pho" matag: to" ra" ba na ayo, mae yao" Asang wa dam: lo: li" nae".
51 Alao"- ai: Asang wa jeim pho" re qi: sho' qobo byid: be, mung: geim kad' ra" mo, kham zo" ra" qobo dae re kham zo: nhao: li" nae". Amung: yao: wa ngug byid ngug nhe' we' zaui kyag' yang: na: li" nae".