10
Lagyo: Daxe: Shid' Yaug
(Mrk 3.13-19; Luk 6.12-16)
1 Yesu yao" mho"zo: daxe: shid' yaug re khai: yu mung:- makhyang" ra" yui jham re khe' thug' pye' nae" we'- no phyo: aja: ja: re gai byid: nae" kheim: so' yao: bam re byid' ra".
2 Ai: lagyo: daxe: shid' yaug: mang jham wa- Petru ga: mang: ra" Simon we' yao: nhaung: Andre Zebede yao: zo: tao ngad: ra" Yaku we' yao: nhaung: Yohan
3 Philib we' Batholame- Thoma we' khang: khyui zo: yaug Mathe- Alphaeu yao: zo: Yaku we' Thadaeu
4 Byumyu" jhid' myid qi" ra" Simon we' thao phyao: yao: re ab: pye' ra" Yuda Iskarud ga: mo, bam ngad: ako".
Lagyo: Daxe: Shid' Yaug Re Nhao: Ke' Ru
(Mrk 6.7-13; Luk 9.1-6)
5 Yesu ai: daxe: shid' yaug re ceru: ta" mung: nhao: ke' ra". Naonhaung" wa taung bug: mug: khyo we' Samari vogaung: jham khyo davao ye: ge,-
6 Ngadqere: Israel amyu" mae" byaug: lo" ra" yao jham jhao" ye: mung:-
7 Yao: bam re- Mug:gaung mung"dan: wa jhao" li" va' ein: kho" kyo: ge,.
8 No mo, re gai byid: ge,- Shid va" mo, re dam: daui nhao ge,- Mao gae: de, mo, re gai byid: ge,- Yui jham re khe' thug' pye' ge,- Aphug' mabyid: lo: naonhaung" qo" khae: yu vako" ru we' dakhyo:- aphug' mayu lo: su re byid: ge,.
9 Naonhaung" phyid' cui: mae qhang- ngaui- gyid: ngaui thang: the: davin ge,.
10 Gyaung: khyo qhid' mae" thaung pyan- bau: tha"- khyid zhaung: we' zaung: bao" daci ge,- pe"mung:ga"re mau" zaui: yaug wa zao: kho qo" yu ang: ra".
11 Khovo khodam: khyo ngadqere:- naonhaung" vao ye: gelao"- naonhaung" re lham: khae: yu nug: ra" yaug re qho mung:- naonhaung" ai: vogaung: mae" dam: thug' lo" sho' aiyaug: yham mae za: thang: na ge,-
12 Amung: naonhaung" dayham yham khyo vao ye: gelao"- Ngaui bau: yaug yo geshao:- ein: bang" se" dao: ta" ge,-
13 Ai: yham mae na: ra" mo, naonhaung" re ngaui bau: za: lham: khae: yu ko" ngad: re wa- ai: bang" se" shaman" dao: wa yao: bam: dao mae thang: jo, vashao:- naonhaung" re ngaui bau: za: malham: khae: yu: ra" mo, ngad: re wa- naonhaung" bang" se" shaman" dao: wa- naonhaung" jhao" dam: tug' lo vashao:.
14 Amung:- naonhaung" re malham: khae: yu lo:- naonhaung" ta" ra" dao: rere: malham: tae" gyo: ko" ra" yham we' vogaung: mae" naonhaung" dam: thug' lo" ge,- naonhaung" dam: thug' lo" au:- naonhaung" khovo: mae" bodan jham re ko: khyo" co' ge,-
15 Ngo naonhaung" re dang za: ta" ru wa- dao: kho' ra" ba na mae Mao"So wa Sodom we' Gomora vobyu qere tho' je: qi" ra" qobo byid' li" nae".
Joe" Lo Nae" Ngad: Ra" Yhin" Ru
(Mrk 13.9-13; Luk 21.12-17)
16 Qu" ge, zag ne phaung gaung: khyo yao jham re nhao: ke' ru we' dakhyo: naonhaung" re nhao: ke' ra". Amung:- naonhaung" wa lhao maui ru: qag mung: phaung" kyug' ru xam: mag ge,-
17 Lha" yang: na ge,- Byu jham wa naonhaung" re tarha" yung" * r 10.17 Congsi Tarha" yung" Yuda byumyu" qe: tarha" qe, do, re ta" ru ngad: ra".** khyo ab byid' pye' mung: yao: bam wa naonhaung" re yao: bam: tarha" jung yham mae taui" be: li" genae".
18 Taung bug qere we' zug:- kho:kham qere Ngaui Bau" Lau Dao: sagse: kham byid: nae" qhid' mae" Nga" mathao mae naonhaung" re zug: qe we' kho:kham qe: qhid' kheim: khyo taui" she: ye" li" genae".
19 Naonhaung" airu: ab byid' pye' qhug' gelao"- khoru: jhau nae" laug- pe" ru ta" nae" laug ein: damyid: ci" ge,- naonhaung" jhau nae" dao: jham ayo, joe" lao" qo" yu: li" genae".
20 Pe"mung:ga"re ai: dao: jham wa naonhaung" jhau: ra" dao: jham mangad: nae"- naonhaung" yao: Pho" nho: Gyang" lho" Byo wa- naonhaung" nhad' khyo" yang jhau: thug' li" ra" dao: jham ngad: li" nae".
21 Mao:nhaung: yao: cao: dayaug wa dayaug re shid nae" khyo jho" ab byid' pye' mung: myhi" pho" qe wa yao: zo: qere- shid nae" khyo ab byid' pye' li" genae". Alao" yao: zo: qere: yao: bam: myhi" pho" qere gye kad' mung: se' pye' nhao: li" genae".
22 Nga" mang mathao: yang byu alhab' mo, naonhaung" re nghang" li" genae"- ngadqere: athao" joe" sho' zang: qhao" yaug wa khyad' yu: ru qhug' nae".
23 Vogaung: dalam: mae naonhaung" re yhin" gelao"- gatau vogaung: dalam: khyo phao: ye: ge,- ngo naonhaung" re dang za: ta" ru wa- Israel mung" mae" vogaung: jham alhab' mae naonhaung" mau" mabin: zaui: shi: re Byu: yao: Zo: wa joe" li" nae" ngad: ra".
24 Mho"zo: wa mho" pho" tho' maje ngad: ra". Amung: jeim re: jeim sang tho' maje ngad: ra".
25 Airu: mung: mho"zo: wa yao" mho" pho" we' dakhyo:- jeim re: jeim sang we' dakhyo: ngad lao" wa nhag' dag gai: ava"- Yham khaung vin yaug re Bezelbu * r 10.25 Belzebu- yui Satan re mhang" ra" mang dalam: ngad:** ga: mhang" ko" re wa- yham khug: byu qere wa je yang: magai: ra" khyo" mhang" li" genae".
Khag' Re Gyaug Ca" Ru
(Luk 12.2-17)
26 Amung:- byu qere dagyaug ge,- pe"mung:ga"re nghoe' to" ra" ja: alhab' wa de: de: mung: li" nae"- Nyham" to" ra" ja: alhab' wa myao: thug' li" nae".
27 Ngo naonhaung" re mug: cad' khug mae ta" ra" dao: re mug: bo" mae ta" kyo: ge,- naonhaung" re dao: so' so' yang: ta" ra" dao: re yham khaung dao mae" kho" kyo: ge,.
28 Myi:qid: tham: mae qo" phyo' qheim" pye' ra" Mao"So re gyaug ge, Gaung khyao re qo" se' pye' ngadqere:- alo zo: re maqo" se' pye' ra" mo, re dagyaug ge,.
29 Gyid: ngaui thang: the: dakye' yang za: jokhyao" shid' dau: re qo" vai: yu: mangad: i? Ngadqere: naonhaung" yao: pho" maqad lo: ai: jokhyao" dadau: lhao" re: maqo" gai: shid.
30 Naonhaung" au: mae" xae khe' jham alhab' re lhao" nghe' to: gau ngad: ra".
31 Airu: mung: dagyaug ge,- naonhaung" wa jokhyao" myo: sho' dau: tho' je: phug' de; ako".
Khristu Re Lhang: Yu: Ru We' Ngag: Ru
(Luk 12.8-9)
32 Su: qhid' kheim: mae ngore lhang: yu ra" yaug khag' re ngadqere:- mug:gaung mae na: ra" nga" pho" qhid' kheim: mae yao: re ngo lhang: yu nae".
33 Su: qhid' kheim: mae ngore ha: pye' ra" yaug re kam" wa- mug:gaung dao mae na: ra" nga" Pho" qhid' kheim: mae yao: re ngo ha: pye' nae".
Yaug Yo: Ru Mangad: Gye Boe" Nhao Nae"
(Luk 12.51-53; 14.26-27)
34 Ce: myid gaung dao mae ngaui pyo: yaug yo: ru byid: nae" qhid' mae" ngo joe" li" ru ngad: ein: dajho ge,- ngo wa ngaui pyo: yaug yo: ru byid: nae" qhid' mae" joe" li" ru mangad:- Shae cili" byid: nae" qhid' mae" ngo joe" li" ru ngad:.
35 Pe"mung:ga"re- yao: zo: wa yao: pho" we' myiqe: zo: wa yao: myhi" we' dau mo" qe wa yao: na qe we' gye jho" boe" nhao nae" qhid' mae" ngo joe" li" ru ngad:.
36 Amung: byu dayaug: qhid' mae" magai: thao" ra" gye jham wa yao" yham khug: byu qe ngad: li" genae".
37 Khag' ngadqere: ngore jhid'de; ra" tho' mae myhi" pho" qere je: jhid'de; ra" yaug wa- nga" mho"zo: boe" nae" qhid' mae" maman: qi" ngad: ra". Amung: ngore jhid'de; ra" tho' mae" yao: zo: yao: dau qere je: jhid'de; ra" yaug re: nga" mho"zo: boe" nae" qhid' mae" maman: qi" ngad: ra".
38 Alao"- khag' ngadqere: yao: yao" pyao: zang re tau: vo, mung:- nga" khyid khu mae macao" ra" yaug wa- nga" mho"zo: boe" nae" qhid' mae" maman: qi" ngad: ra".
39 Amung:- yao: yao" kao so' gug: nae" qhid' mae" qam: ke' gug: gam yaug wa- kao so' jeim: nae". Ngadqere: nga" mathao mae yao: yao" kao so' jeim: yaug wa kao so' qo" yu nae".
Aphug' Jhaung Qhu" Jham
(Mrk 9.41)
40 Naonhaung" re lham: khae: yu: ra" yaug wa- ngore lham: khae: yu: ra" yaug ngad: ra". Ngo re lham: khae: yu: ra" yaug re: ngore nhao: ke' ra" yaug re lham: khae: yu: ru ngad: ra".
41 Mao"So: lagyo: ngad: ra" ga" khyo" yang Mao"So: lagyo: re lham: khae: yu: ra" yaug wa ai: lagyo: the' yu: ra" aphug' jhaung qhu" re qo" yu: li" nae". Alao" din:man: yaug ngad: ra" ga" khyo" yang din:man: yaug re lham: khae: yu: ra" yaug re:- ai: din:man: yaug qo" yu: ra" aphug' jhaung qhu" re qo" yu li" nae".
42 Naonhaung" re ngo dang dang za: ta" geli". Nga" mho"zo: qe mae" ngai: thao" ra" yaug re nga" mho"zo: ngad: ra" ga: qid cae: dakeim byid: jhaug' yaug wa gaigai: yao: aphug' jhaung qhu" maqo" yu nae" khyo majo,.