MATHE
TUNG" RA" NGAUI BAU" LAU DAO: GAI
(MATTHEW)
Dao: Phung"
Mathe tung" ra" Ngaui Bau: Lau Dao: Gai wa Yesu wa dao:so: we' sin" ra" khyad' yu: Asang ngad mung:- dao: thang" axug' mae Mao"So: yang yao" byumyu" re byid' to" ra" dao:so: re jab byang" li" nhao: ra" yaug ngad: ra" khyo lau dao: gai re ta" na: ra". Ce: lau dao: gai wa Yesu khau: li" mung: na: qi" li" ra" Yuda byu qe: qhid' mae" za: mangad:- mug: myid byu alhab' mo; qhid' mae" re: ngad: ra". Mathe wa ce: Lau Dao: Gai re jid' jid' naug naug nyang" za: tung" to" ra". Yao: wa Yesu khau: li" ra" khyo we' qhid mung:- qid nyhab' kham: yu: ra" khyo- ju" phyo' qhug' ra" khyo- ai:thao Galile mung" mae mungdao: kho" kyo" ra" yao" sasana mau" zo" khyo we' no phyo: gai byid' ra" khyo re tung" to" ra".
Ai: thao Yesu Galile mung" mae" Yerusalem khyo ye" ra" gyaung: khyo- lo" thao" dalaban mae boe" ra khyo jham- pyao: zang dao mae jin" se' pye' ru qhug' ra" khyo we' shid: rumae" dam: daui: to" li" ra" khyo jham re tung" xam" to" ra". Ce: Lau Dao: Gai wa Yesu re Mao"So: Kham" To" Ra" Tarha" re ta" pheim: sho' kyo: byid: nae" kheim: so' qo" ra" qi" qhang: ra" Mho" Pho" ngad mung:- Mao"So: mung"dan: khyo re mho" shid' byid' ra" yaug ngad: ra" khyo" tung" qhu" to" ra". Yesu nho: mho" shid' khyo jham re khyo ajhaung ngo" ja: mae tung" zhang: ke' to" ra". Aijham wa (1) Mug:gaung: mung"dan: byuzo: qenho: ave, lo, mau"- vin vo; ca" ra" qo jham- akho: akhang" jham we' joe" nae" bin: zang khyo we' sin: yang: ta" ra" bam dao mae" tarha" kho" dao: (5-7). (2) Mho"zo: daxe: shid' yaug re sasana mau" zo" qhid' mae" mho" shid' byid' ra" khyo (10). (3) Mug:gaung Mung"dan: khyo we' sin" ra" dao: tau" jham (13). (4) Mho"zo: doe; ra" khyo lajheim: re mho" shid' byid' ra" khyo (18). (5) Ana" ce: pyad qae: mae" thao" lo" nae" khyo we' Mao"So: mung"dan: joe" li" nae" khyo we' sin: yang: mho" shid' byid' ra" khyo jham ngad: ra".(24-25).
1
Yesu Khristu Byu Xag'
(Luk 3.23-38)
1 Ceru wa Abraham we' Davi myid:zo: Yesu Khristu byuxag' ngad: ra".
2 Abraham wa Isag re- Isag wa Yaku re khau mung:- Yaku wa Yuda tao ho' re khau: ke' ra".
3 Yuda myi: Tama mae" Pere we' Zera tao re khau: ra". Pere wa Hezrum re khau: mung Hezrum wa- Aram re khau: ra".
4 Aram wa Amminadab re- Amminadab wa Nashon re- Nashon wa Salmon re khau: ra".
5 Salmon myi: Rahab kham: mae" Bua re khau: ra". Bua myi: Rutha mae" Obed re khau mung:- Obed wa Yese re khau: ra".
6 Yese wa Davi kho:kham re khau: ra". Davi wa Uria yham sang myhi" mae" Sholamon re khau: ra".
7 Sholamon wa Rehoboam re- Rehoboam wa Abiya re- Abiya wa Asab re khau mung: Asab wa Yehoshaphad re khau: ra".
8 Yehoshaphad wa Yoram re- Yoram wa Uzia re- Uzia wa Yotham re khau: ra".
9 Yotham wa Ahad re khau mung:- Ahad wa Hezekia re khau: ra".
10 Hezekia wa Manashe re- Manashe wa- Amon re- Amon wa Yoshia re khau: ra".
11 Babelon mung" khyo jeim kad' nae" taung" jhui" lo" ra" ayo, mae Yoshia wa Yehoiakhin tao ho' re khau: ra".
12 Babelon mung" khyo jeim kad' nae" taung" jhui" lo" thao re Yehoiakhin wa Shealtie re- wa Zerubabela re- wa khau: ra".
13 Zerubabela wa Abiud re- Abiud wa Eliakim re- Eliakim wa Azo re khau: ra".
14 Azo wa Zadog re- Zadog wa Akhim re- Akhim wa Eliu re khau: ra".
15 Eliu wa Eleaza re- Eleaza wa Mathan re- Mathan wa Yaku re khau: ra".
16 Yaku wa Mari yham sang pho" Yoseb re khau: ra". Mari wa Khristu ga: mhang" ra" Yesu yao: myhi" ngad: ra".
17 Aimung: Abraham mae" Davi kho:kham pyad joe" sho' byuxag' daxe: byid xag'- Davi kho:kham mae" Babelon mung" khyo jeim kad' nae" taung" jhui" lo" ra" pyad joe" sho' byuxag' daxe: byid xag'- Babelon mung" khyo jeim kad' nae" taung" jhui" lo" ra" pyad mae" Meshia pyad joe" sho' byuxag' daxe: byid xag' ngad: ra".
Yesu Khau: Li" Ra" Khyo
(Luk 2.1-7)
18 Ana" Yesu khau: li" ra" khyo wa ceru: ngad: ra". Yao: myhi" Mari wa Yoseb: yang lo,xo' yu nae" mho' to" ra". Yao: shid' zo: daga" mazam" na shi: re Mari wa Gyang"lho" Byo: yang gaung la" li" ra".
19 Yao" yham sang pho" Yoseb wa din:man" ra" byu dayaug ngad mung: Mari re qho' maphyo' nhao nug yang: yao: re sae za: kao" pye' nae" myid: na: ra".
20 Ngadqere: yao: cekhyo re myid qu" na: ra" au: Qu" wa,- Asang: Mug: Lagyo: dayaug yab mo, mae yao: re li" qhu" byid: mung:- Davi yao: zo: Yoseb we"- Mari re lo,xo' yu nae" dagyaug, wa,- pe"mung:ga"re yao: gaung la" li" ru wa Gyang" Lho" Byo: yang ngad: ra".
21 Amung: yao: wa yauggai nau" khau: li" nae" ngad:- nao wa Yao: re Yesu ein: mhang" byid: zai ngad: ra". Pe"mung:ga"re yao: wa- yao" amyu" re yao: bam: qobo mae" khyad' yu: li" nae"- ga: ta" ra".
22 Ceru alhab' wa lapa: nhad' khyo" Asang ta" to" ra" dao: jab byang: li" nae" qhid' mae" boe" lo: ra".
23 Ai: Lapa dao: wa Qu" wa,- Zomyi: gyang" dayaug wa gaung la" li" mung: yauggai nau" khau: li" nae" ngad:- yao: re Emanuela ga: mhang" li" genae" ngad: ra". (Emanuela ga" ru wa Mao"So ngonhaung" we' daga" na: ga" ru ngad: ra".)
24 Yoseb yab: myhid' jo; rumae" so" li" mung:- Asang: Mug:Lagyo" yang Yao: re amyin" byid' ru we' dakhyo: kad' mung: Mari re lo,xo' yu: ra".
25 Ngadqere: yauggai zo: re makhau khau wa Mari we' mazam" na ngad: ra". Amung: Yoseb wa ai: yauggai zo: re Yesu ga: mhang" byid' ra".