24
Myikaug' Jham Re Qu" Caung: Ra" Khyo
(Pht 27.20- 21)
1 Asang wa Moshe re- Israel byu qere o mae ta" to" ra" amyin" dao: byid: wa,- ga: ta" ra".
2 Aiwa- mathang nga" bao: na vashao:- Zaung khug mae jo; ra" myikaug' jham qhid' mae" gai: thao" ra" zhanlun xau gyang" re ci:ye: ge,.
3 Arun wa myi" thao khao: ngo" ai: myikaug' jham re myi: te' mung: Gyang" Lho" Thao" Jo, qo ngad: ra" Dao: Thang" Ban" qhid' au: mae" akyo pin: lung: taung gaung shad' Asang: qhid' kheim: mae ne, kao joe" sho' xo' yang: nga" bao: jo, nhao ge,- ce: thung"li wa joe" lo nae" ayo, alhab' mae phug' cao" nae" ra" thung"li ngad: ra".
4 Arun wa qhang gyang" yang kad' ra" myikaug' tao" dao mae jo; ra" myikaug' jham re qu" caung nae" ngad mung:- Asang: qhid' kheim: mae ai: myikaug' jham mathang nga" bao: jo; rure qu" na ca" ra".
Asang Re Mug Ngaui" Byid' Ra" Khyo
5 Cin man" she' joe: ko re yu mung: mug daxe: shid' khai" kad' nae" ngad: ra".
6 Ai mug jham re Asang: qhid' kheim: mae jo; ra" qhang gyang" yang thab' to" ra" saboe" dao mae dajin mae khyaug' khai" khai" mung: kad' yang: shid' jin to: nae" ngad: ra".
7 Asang re qhaug' byid' ra" zo:ve ngaui" xeim: mug atha" khyo"- ai: mug shid'
jin geim" mae sheim nae" pyo: ja: agyang"
daqhae: re vhe' gyad nae" ngad: ra".
8 Joe" lo nae" ayo, Dugno: Ba khao: ngo" mae mug re Asang: qhid' kheim: mae to" to: qo: ra". Ceru wa Israel byu qenho:
apyad ato: ra" qo ngad: ra".
9 Mug wa Arun we' yao" myid:zo: qenho: qhid' mae" ngad mung:- yao: bam wa aire gyang" lho" jo, qo mae zo: genae" ngad: ra". Pe"mung:ga"re ceru wa khinjaung qe: qhid' mae" Asang re ngaui" byid' ra" zo:ve ngaui" xeim: mae" gyai gyang" lho" ra" dau: ngad: ra"- ga: ta" ra".
Din:man" Ru We' Din: Nyang: Ra" Qobo Dae
10-11 Yao: pho" wa Egutu byu- yao: myhi" wa Dan kaung mae" Dibri ga: yaug: myiqe: zo: Shelomid ga: mang: ra" Israel byu tao: yao: zo: dayaug na: ra". Thang: na: ra" jamu dalam: mae byu ceyaug wa Israel byu dayaug we' jho" myan" myo" ako". Jho" myan" myo: ko" au: byu aiyaug wa Mao"So re nhang" ra". Airumung: yao: bam wa yao: re Moshe jhao" jhui" lo mung:-
12 Yao: re zaung" to" ako". Amung: yao: re khoru: kad' nae" Asang: yang yao: bam re ta" nae" rure lao" na: ako".
13 Asang wa Moshe re-
14 Ai: yaug re jamu mae" she: thug' pye' ge,- yao: nhang" rure the' gyo" ra" mo, yaug khao: ngo" wa yao: qobo qo" ra" khyo re sagse: kham nae" qhid' mae" aiyaug au: dao mae yao" lo, re kai" genae" ngad: ako". Ai: thao byumyu" phaung geim" wa yao: re laugbaui: yang pye' se' pye' nae" ngad: ako".
15 Ai: thao Mao"So re nhang" ra" yaug khag' ngadqere: ainho: akyu" re kham zo: ca" mung:- se' pye' ru qhug' nae" ngad: ra" khyo re Israel byu qere ta" kyo: nae" ngad: ra".
16 Israel byu khag' ngadqere:- mangad: lao"-Israel mung" mae na: ra" taung bug byu khag' ngadqere:- Asang re nhang" ra" yaug wa byumyu" phaung geim" yang laugbaui: yang pye' se' pye' ru qhug' nae" ngad: ra".
17 Byuse' yaug khag' ngadqere: se' pye' ru qhug' li" nae".
18 Amung: su gaje: nho: gug'nyhug' re se' ra" yaug khag' ngadqere: aire dam: khyug' byid: ca" ra". Apan aqao: tarha" wa kao so' qhid' mae" kao so' ngad: ra".
19 Byu dayaug: yang gatau dayaug re dae te' byid' ngad: re yao: kad' ruru: yao:- yao: re kad' nae" ngad: ra".
20 Yao: wa shoqug: dakhe' re gyug: nhao yaug ngad: re yao" shoqug: dakhe' rere: khyug' pye' byid: nae" ngad: ra". Yao: wa myo, dashad' re zai" cid' pye' yang: ngad: re- yao" myo, zai" cid' pye' ru qhug' nae". Yao: wa zaui dakhe' re thaung" phan" pye' yang: ngad: re yao" zaui dakhe' rere: thaung" phan" pye' byid: nae" ngad: ra". Yao: wa su gatau re khoru: dae te' byid' re- yao: rere: airu: yao: dae dam: te' byid: nae" ngad: ra".
21 Gug'nyhug' re se' ra" yaug khag' ngadqere: aire dam: khyug' byid: nae" ngad: ra". Ngadqere: byuse' ra" yaug wa se' pye' ru qhug' nae" ngad: ra".
22 Ce: tarha" wa Israel byu qe- naonhaung" phaung mae na ko" ra" taung bug byu qe we' naonhaung" alhab' mo, ci nae" tarha" ngad: ra". Pe"mung:ga"re ngo wa naonhaung" Mao"So Asang ngad:- ga: ta" ra".
23 Ceru re Moshe yang Israel byu qere bin: ta" kyo: lao" yao: bam wa byu aiyaug re thang: na: ra" jo, qo taung gaung shad' khyo jhui" thug' ye: mung: laugbaui: yang yao: re pye' se' pye' ako". Ceru: kad' yang: Israel byu qe wa Asang: yang Moshe re amyin" byid' to" rure kad' ako".