22
Ngaui" Xeim: Jham: Gyang" Lho" Khyo
1 Asang wa Moshe re-
2 Arun we' yao" yauggai zo: qere ceru: ta" kyo: wa,- naonhaung" wa nga" mang re maphug' makhyad' magai: kad' genae". Aimung: Israel byu qeyang ngore li" qhaug' byid: ko" ra" gyang" lho" ra" ngaui" xeim: jham re phug' myao" ra" khyo" kad' ge,. Ngo wa Asang ngad:-
3 Naonhaung" nho: myid:zo: qemae" dayaug yaug- yao: wa caung" pa" thung" khyo" masan masin" boe" na: ra" ayo, gyo: mae Israel byu qeyang ngore qhaug' byid' to: ko" ra" gyang" lho" ra" ngaui" xeim: jham khyo te' ye: yang: ngad: re- yao: wa khonhae" re: phan mae magai: caung da" lo nae" ngad: ra". Ceru wa joe" lo nae" ayo, alhab' mae ci nae" to" ra" tarha" ngad: ra". Ngo wa Asang ngad: ra".
4 Arun nho: myid:zo: qemae" mao gae: de; yaug mangad: lao" dae bab: qang: yug yaug khag' re: yao: wa caung:pa" thung" khyo" san sin" yaug maboe" boe" wa ai: gyang" lho" ra" ngaui" xeim: re dajhid' re: magai: zo: ngad: ra". Khinjaung dayaug yaug wa sushid maogaung: yang the' tin" ra" ja: daja: re- mangad: lao" ashug' ma: ra" yaug re- mangad: lao"
5 Masan masin" ra" gug'nyhug' re mangad: lao"- masan masin" ra" byu dayaug re yao: the' tin: yang: ngad: re yao: wa masan masin" ngad: jo; ra".
6 Masan masin" boe" ra" khinjaung pho" wa myi" thao joe" sho' masan masin" boe" jo; ra". Gaung za: mabin: cid' pye' pye' wa gyang" lho" ra" ngaui" xeim: jham pe" daja: rere: yao: magai: zo: ngad: ra".
7 Ba: vao: lo" byaug thao yao: wa san sin" yaug boe" ra". Ailao" yao" zo:ve jham ngad: ra" gyang" lho" ra" ngaui" xeim: jham re yao: gai: zo" ra".
8 Yao: wa yao: yao: za: shid: ra" gug'nyhug' sho: pe" ja: rere:- mangad: lao"- seyo: gug'nyhug' yang bin" se' ra" sho: daja: rere: mazo: nae" ngad: ra". Airu wa yao: re masan masin" boe" nhao: ra". Ngo wa Asang ngad:-
9 Khinjaung qe alhab' wa ngo byid' to" ra" thung"li jham re phug' cao" ca" genae" ngad: ra". Airu: mangad: re- yao: bam wa qobo qo" mung:- shid: li" genae". Pe"mung:ga"re yao: bam wa ai: gyang" lho" ra" thung"li jham re maphug' cao" geyang: ngad: ako". Ngo wa Asang ngad mung:- yao: bam re ngo gyang" lho" nhao va".
10 Khinjaung pho" nho: yham byu qe za: ai: gyang" lho" ra" ngaui" xeim: jham re gai: zo" ra". Gaje khag' re: aijham re magai: zo: ngad: ra". Khinjaung pho" we' daga" bang" na yaug- mangad: lao"- khinjaung pho" yang lhaung: to" ra" okaung yaug lhao" re: aijham re magai: zo: ngad: ra".
11 Ngadqere: khinjaung pho" ngaui: yang vai: to" ra" jeim qe mangad: lao"- yao" yham mae
khau: ra" jeim qe wa khinjaung pho" qo" yu:
ra" zo:ve jham re gai: zo" ako".
12 Khinjaung mangad: yaug we' lo, xo' xo' ra" khinjaung pho" nho: myiqe: zo: wa ai: gyang"
lho" ra" ngaui" xeim: daja: rere: magai: zo: ngad: ra".
13 Ngadqere: cug' mo"- mangad: lao" yham sang pho" we' gao" na: ra" zo: dau maqo" ra" myiqe: zo: tug' lo mung: yao: pho" yham mae lokhug: ngha: na: ra" yaug wa khinjaung khyo" yao: pho" qo" yu: to" ra" zo:ve gai: zo" ako". Aimung: khinjaung yham byu qe za: ai: zo:ve re gai: zo" ako".
14 Khinjaung pho" nho: yham byu mangad: ra" byu dayaug yaug ai: gyang" lho" ra" ngaui" xeim: jham mae" daja: re thaug makad' lo: zo: yang: ngad: re- yao: wa khinjaung pho" re- ainho: aphug' byang" sho' bobo mung: ngo" bam mae" dabam laung: yang: dam: khyug' byid: ca" ra".
15 Khinjaung qe wa maman: qi" ra" yaug re aijham re zo: nhao: ra" khyo" yang ai: gyang" lho" ra" ngaui xeim: jham re masan masin" magai: kad' nae" ngad: ra".
16 Ceru wa qobo boe" nhao mung:- airu" ra" yaug: dao mae qobo dae boe" li" nhao nae" ngad: ra". Ngo wa Asang ngad mung:- ngo wa ai: ngaui" xeim: jham re gyang" lho" nhao yaug ngad: ra" ga: amyin" byid' ra".
17 Asang wa Moshe re-
18 Arun we' yao" myid:zo: qe- Israel byu qere o mae ta" to" ra" thung"li jham re phug' cao" genae" qhid' mae" ta" ra". Israel byu dayaug yaug- mangad: lao"- Israel byu qe we' daga" na: jo; ra" taung bug byu dayaug yaug phad' ngaui" byid' ra" ngaui" xeim: byid: au:- thao ce' to" rure zai" pyang" ra" khyo" ngad: re ngad- mangad: lao"- yao: myid bug' ra" khyo" byid' ru ngad: re ngad byid' ra" gug'nyhug' wa qo mabo: ru ngad qo: ra".
19 Khae: yu byid' ru qhug' nae" qhid' mae" ai: ru wa qo daja: re: mabo: ra" alo: ngad ca" ra".
20 Qo daja: ja: bo: ra" gug'nyhug' re naonhaung" ngaui" byid: yang: ngad: re Asang wa aire makhae: yu byid: nae".
21 Byu dayaug yaug wa Asang re zam" khug: ra" ngaui" xeim: re qhaug' byid' au: thao ce' re zaui" pyang" ra" khyo" ngad: re ngad: mangad: lao"- yao: myid bug: yang: byid' ra" ngaui" xeim: ngad: re ngad khae: yu byid' ru qhug' nae" qhid' mae" ai: gug'nyhug' wa qo pe" re: mabo: ru ngad qo: ra".
22 Myo, jid- agyug: aqeim- gaung dau: qeim: ra"- dae jad: jad' ra"- shoqid ago; akhyang: mung: ra". Dae kye' kye' ra" gug'nyhug' Asang re dangaui" byid: ge,- airu" ra" gug'nyhug' jham re zo:ve ngaui" xeim: khyo" phan dao mae dangaui" byid: ge,.
23 Angai apad'- gaung dau: majab: ra" gug' nyhug' re wa myid bug' ra" ngaui" xeim: khyo" gai: ngaui" byid' ra". Ngadqere: thao: ce' re zaui" pyang" ra" ngaui" xeim: khyo" magai: khae: yu ngad: ra".
24 Ajid' re be; ce' pye'- lhai" pye' lao" cad' pye' va" ra" gug'nyhug' re daqhaug' byid: ge,-ceru re naonhaung" mung"dan: mae akhang" dabyid: ge,.
25 Taung bug qemae" the' yu: ra" pe" ja" gug'nyhug' re: zo:ve ngaui" xeim" khyo"
dangaui" byid: ge,. Airu" ra" gug'nyhug'
jham re wa qobo de; ra" khyo" myid: jho:
yu qhug' mung:- magai: khae: yu ngad: ra".
26-27 Nung: nau"- yao nau"- cad' be, nau" sad' lao" nhad' ba gyo: mae yao: myhi" we' magai: kao: ngad: ra". Ngadqere: ai:thao re wa ai: rure zo:ve ngaui" xeim: khyo" khae: yu gai: ra".
28 Nung: jaung myhi" we' yao: zo: rere:- yao myhi" we' ainho: yao nau" rere:- cad' be, myhi" we' cad' nau" rere: daba mae za: ngaui" xeim: dangaui" byid: ge,.
29 Jeju beim: so" ra" ngaui" xeim: Asang re naonhaung" ngaui" byid: ko" au: re- naonhaung" re khae: yu byid' ru qhug' nae" qhid' mae" thung" tarha" jham re phug' cao" ge,.
30 Ai: ngaui" xeim: re ai: ba re yao: zo: mung: thao: ba ne, kao joe" sho' dajhid' re: datang"
to: ge,- ga: amyin" byid' ra".
31 Asang wa- nga" amyin" dao: jham re phug' cao" ge,- ngo wa Asang ngad: ra".
32 Nga" gyang" lho" ra" mang re daphoe nhao ge,. Israel byu qe alhab' wa ngore gyang" lho" yaug khyo" lhang: yu ca" ra". Ngo wa Asang ngad mung:- naonhaung" re gyang" lho" nhao yaug ngad: ra".
33 Ngo wa naonhaung" Mao"So boe" nae" qhid' mae" Egutu mung" mae" naonhaung" re jhui" thug' lo: ra". Ngo wa Asang ngad:- ga: ta" ra".