20
Mho Dao: Magyo" Ra" Qobo Dae Jham
1 Asang wa Moshe re-
2 Israel byu qere ceru: ta" nae" qhid' mae" ta" ra". Aiwa- naonhaung" mae" dayaug yaug- mangad: lao"- naonhaung" phaung mae na: ra" taung bug byu dayaug yaug Moleg so re caung:pa" rumae ci nae" qhid' mae" yao" zoshao qemae" dayaug yaug re byid' ra" yaug re mo, phung: geim" yang laugbaui: yang ceim" pye' se' pye' ru qhug' nae" ngad: ra".
3 Byu dayaug yaug wa yao" zoshao qemae" dayaug re Moleg re byid: mung:- nga" gyang" lho" Zaung re masan masin" boe" nhao: ru we' nga" mang re nga: yeim nhao: ngad: re- ngo wa yao: re gye kad' mung:- ngo wa yao: re nga" byu dayaug ein: mamyid: jho: yu lo nae".
4 Ngadqere: mo, phaung wa yao: kad' va" ra" lo, mau" re pe" shui manho lo:- yao: re mase' pye' yang: ngad: re-
5 Ngo yao" yang aiyaug rere: yao" yham byu alhab' rere:- ngore jhaug' mazaug: rumae yao" bo: bode; ra" mo, alhab' we' Moleg re caung:pa" ra" mo, re ngo gye kad' nae". Ngo wa yao: bam re nga" byu qe ngad: ein: mamyid: jho: yu lo nae".
6 Byu dayaug yaug wa shid: ra" mo; nho: byo jham we' jho" jhau jho" qham: ra" yaug jhao" pha,jhi" mho' nae" qhid' mae" ye" ngad: re- ngo wa yao: re gye kad' mung:- yao: re nga" byu dayaug khyo" ngo mamyid: jho: yu lo nae".
7 Naonhaung" yao" gaung re gyang" lho" nhao ge,- pe"mung:ga"re ngo wa naonhaung" Mao"So Asang ngad: ra".
8 Nga" tarha" jham re phug' cao" ge, pe"mung:ga"re ngo wa Asang ngad:-
ngo wa naonhaung" re gyang" lho" nhao: ra"- ga: ta" ra".
9 Asang wa o mae ta" to" ra" thung"li jham re byid' ra". Aiwa yao: pho" mangad: lao"- yao: myhi" we' yao: pho"
re nhang" ra" yaug khag' ngadqere: se' pye' nae"
ngad: ra". Yao: shid ru yao" qobo mathao mae ngad: ra".
10 Yauggai dayaug wa Israel byu dayaug: nho: yham sang myhi" we' myi: lao shad' yang: ngad re- aiyaug we' myiqe: shid' yaug: geim" re se' pye' nae" ngad: ra".
11 Yao: pho" nho: yham sang myhi" qe we' gaung sho: jho" zam" ra" yaug wa yao: pho" re qho' nga: yeim yaug ngad: ra". Yao: shid' yaug geim" re se' pye' nae" ngad: ra". Yao: shid' yaug shid: ru wa yao: shid' yaug: qobo mathao mae ngad: ra".
12 Byu dayaug wa- yao" dau mo" we' gaung sho: jho" zam" va" ngad: re- yao: shid' yaug geim" re se' pye' nae" ngad: ra". Yao: shid' yaug wa kheim bam khyui: ra" lo, mau" kad' avako" rumung:- yao: shid' yaug: shid: ru wa yao: shid' yaug: qobo mathao mae ngad: ra".
13 Yauggai dayaug wa gatau yauggai dayaug we' gaung sho: jho" zam" ko" ngad: re- yao: shid' yaug wa maca' majhad' mau" re kad' avako". Amung: shid' yaug: geim" re se' pye' nae" ngad: ra". Yao: shid' yaug shid: ru wa yao: shid' yaug: qobo mathao mae ngad: ra".
14 Yauggai dayaug wa myiqe: dayaug re we' yao: myhi" re lo, xo' xo' yu: ngad: re- yao: bam aqho' aqhid mau" re kad' vako" ruyang sam zo" geim" re myi" yang ngha" se' pye' nae" ngad: ra". Airu" ra" lo, mau" re naonhaung" phaung mae dakad' nhao ge,.
15 Yauggai dayaug wa gug'nyhug' dadau: dau: we' gaung sho: jho" zam" va" ngad: re- yao: we' gug'nyhug' re se' pye' nae" ngad: ra".
16 Myiqe: dayaug wa gug'nyhug' dadau: dau: we' gaung sho: jho" zam" nae" seim" yang: ngad: re- yao: we' ai: gug'nyhug' re se' pye' nae" ngad: ra". Yao: bam shid: ru wa yao: bam: qobo mathao mae ngad: ra".
17 Yauggai dayaug wa yao" yao: nhae: mo"- mangad: lao" yao: nhae: mo" dau: ra" yaug re lo, xo' yu: ngad: re yao: nhae wa shava phaung mae qho' phyo' mung: byumyu" phaung mae" khe' thug' ke' nae" ngad: ra". Yao: wa yao" nhae: mo" we' gaung sho: jho" zam" va" rumung: boe" thug' li" ra" akyu" qobo jham re kham zo: ca" ra".
18 Yauggai dayaug wa mai ci: na: ra" myiqe: we' gaung sho: jho" zam" ngad: re yao: shid' yaug geim" re byumyu" phaung mae" khe' thug' ke' nae" ngad: ra". Pe"mung:ga"re yao: shid' yaug wa caung:pa" thung" khyo" masan masin" ra" khyo we' sin" ra" thung"li jham re shad' lhoe" pye' ako".
19 Yauggai dayaug wa yao: na- yao: mo"- yao: le, we' gaung sho: jho" zam" ngad: re yao: shid' yaug wa kheim bam khyui: ra" lo, mau" qhid' mae boe" thug' li" ra" akyu" qobo re kham zo: ca" ako".
20 Yauggai dayaug wa yao" yao: phomo"- yao: gan: bam: yham sang myhi" qe dayaug yaug we' gaung sho: jho" zam" ngad: re- yao: wa yao: pho" bam re qho' phyo' mung: yao: we' ai: myiqe: myhi" wa qobo dae re khyug' ca" li" genae". Amung: zo: dau dayaug re: maqo" genae" ngad: ra".
21 Yauggai dayaug wa yao: mao:- yao:nhaung: nho: yham sang myhi" dayaug yaug re lo,xo' yu: ngad: re- yao: shid' yaug wa zo: dau maqo" lo: shid: lo" li" genae". Yao: wa caung:pa" thung" khyo" masan masin" ra" lo, mau" kad' mung: yao: mao:- yao:nhaung: re nga: yeim nhao: pye' ava".
22 Ngo naonhaung" re jhui" vao lo: ra" Khanan mung" yang naonhaung" re ngag: ha: pye' ru maqhug' genae" qhid' mae" nga" nho: tarha" jham we' amyin" dao: jham alhab' re phug' cao" ge, ga: Asang ta" ra".
23 Aimae na ko" ra" byumyu" qe: thung" li jham re dacao" kad' ge,- ai:mung" khyo-
naonhaung" qo" vao ye: genae" qhid' mae" ai:
solho re caung:pa" ko" ra" mo, re ngo khe'
thug' pye' nae". Yao: bam wa yao: bam:
makhyang" ra" lo, mau" alhab' yang ngore ca'
nhao: avako".
24 Ngadqere: ce: mug:myid gai: ra" mung"dan: re naonhaung" mug:myid khyo" ngad vashao: ein: ngo dao:so: kad' to: va". Ngo wa aire naonhaung" re byid: nae". Ngo wa naonhaung" Mao"So Asang ngad mung:- ngo naonhaung" re gatau: byumyu" qemae" gatau san: yu: to: va".
25 Airumung:- naonhaung" wa caung:pa" thung" khyo" san sin" ra" gug'nyhug' we' ngho' jham we' masan sin" ra" gug'nyhug' ngho' jham re de: de: za: kho' to: ca" ako". Masan sin" ra" gug'nyhug' jham mangad: lao"- ngho' jham re dazo: ge,- ngo wa aijham re masan sin" ru ngad: ein: ta" to: va" rumung:- ai: jham re zo" ru wa naonhaung" re: masan masin" boe" nhao: ra".
26 Naonhaung" wa Gyang" Lho" nae" ngad mung:- ngoyang za: sang: ra" mo, ngad: ako". Pe"mung:ga"re ngo wa Asang ngad mung: ngo wa gyang" lho" ra". Naonhaung" re ngo dayaug za: sang nae" qhid' mae" ngo wa naonhaung" re gatau: byumyu" qemae" gatau san: yu: to: va".
27 Shid mo; nho: byo jham we' jho" jhau jho" qham: ra" yauggai- myiqe: khag' re ngadqere: laug baui: yang pye' se' nae" ngad: ra". Ceru: kad' yaug khag' ngadqere: yao: shid: ru wa yao" qobo mathao mae ngad: ra".