17
Gyang" Lho" Ra" Sa:
1 Asang wa Moshe re-
2 Arun we' yao" yauggai zo: qe- Israel byu qe alhab' re o mae ta" to" ra" thung" li jham re
byid: nae" qhid' mae" amyin" byid' ra".
3-4 Israel byu dayaug Asang re qhaug' byid' ra" ngaui" xeim: khyo" Asang qhid' kheim: Zaung kham: dung: mae" je yang: gatau mae se' ra" nung: jaung- yao- cad' be,- pe" ja: re ngad ngad tarha" re shad' lhoe" pye' ru ngad: ava". Yao: wa sa: sheim nhao yaug ngad va" rumung:- yao: re Mao"So: byu dayaug khyo" myid: jho yu lo nae" mangad: ngad: ra".
5 Ce: amyin" lajheim: wa ana" Israel byu qe wa yao: bam taung gaung mae lhaung" se' ko" ra" gug'nyhug' jham re Asang jhao" cili" nae" ngad: ra". Ana" yao: bam wa aijham re Zaung kham: dung: khyo khinjaung pho" jhao" ci ye: mung: zam" khug: ra" ngaui" xeim: khyo" aijham re se' nae" ngad: ra".
6 Khinjaung pho" wa sa: re Zaung kham: dung: mae jo; ra" phan shad' khao: ngo" alhab' khyo vhag' sheim" ke' nae" ngad: ra". Asang re ngaui nhao: ra" meim sheim phad' nhae" nae" qhid' mae" xau re ngha" nae" ngad: ra".
7 Yui cad' be, re ngaui" byid' ra" ngaui" xeim: khyo" pa:din" khaung: mae yao: bam: gug'nyhug'
jham re se' zho" ra" khyo" yang Israel byu qe wa
8-9 Zaung kham: dung: tau mae" je yang:- gatau dajo, qo qo mae Asang re ngaui" byid' ra" xeim: khyo"- phad' ngaui" byid' ra" ngaui" xeim:- mangad: lao" gatau: ngaui" xeim: re ngaui" byid' ra" Israel byu- mangad: lao"- ai: phaung mae na: jo; ra" taung bug byu khag' re ngadqere: yao: re Mao:So: byu dayaug khyo" myid: jho: yu lo nae" mangad: ngad: ra".
10 Israel byu mangad: lao"- Israel phaung mae na: jo; ra" taung bug byu dayaug yaug sho: we' sa: lhag' yang: zo" ngad: re- Asang wa yao: re gye kad' li" nae"- amung: yao: re yao" byu dayaug khyo" myid: jho: yu lo nae" mangad:-
11 Daui nam alhab' ra" kao so' wa sa: mae bo: ra". Ce: mathao mae Asang wa mo, byu qenho: qobo jham re yu: pye' nae" qhid' mae" sa: alhab' re phan dao mae zhin: khyo" pye' nae" amyin" byid' to" ra". Kaoso' ngad: ra" sa: wa qobo re yu: pye' byid' ra".
12 Ce: mathao mae Asang wa Israel byu qere yao: bam re:- yao: bam: phaung mae na: jo,ko" ra" taung bug byu re: sho: we' sa: re lhag' yang: magai: zo: nae" rure ta" to" ra".
13 Israel byu mangad: lao"- Israel byu qe: phaung mae na: jo; ra" taung bug byu dayaug yaug wa caung:pa" thung" khyo" san sin" ra" gug'nyhug' mangad: lao"- ngho' dadau: dau: re the' taung" yu: ngad: re yao: wa ainho: sa: re myidgaung khyo zhin: khyo" pye' mung:- aire phalhug: yang nghoe' pye' nae" ngad: ra".
14 Daui nam alhab' ra" kao so' wa sa: mae bo: ra". Ai: mathao mae Asang wa Israel byu qere sho: we' sa: lhag' yang: yao: bam mazo: genae" ra" khyo re ta" to" ra". Amung: ai rure zo" ra" yaug khag' re ngadqere: yao" byu dayaug ru: mamyid: jho: yu lo nae" ngad: ra".
15 Yao: za: shid: ra" gug'nyhug' sho: re mangad: lao"- seyo: gug'nyhug' yang bin" se' ra" gug'nyhug' sho: re zo" ra" Israel byu- mangad: lao"- taung bug byu khag' ngadqere: yao: bam: mai bau: jham re cid' mung: gaung cid' pye' ca" ra". Yao: wa caung:pa" thung" khyo" san sin" nae" qhid' mae" myi" thao joe" sho' lao" na nae" ngad: ra".
16 Yao: airu: makad' ngad: re yao: wa ainho: qobo akyu" jham re kham zo: ca" ra"- ga: ta" ra".