XEIM: NGAUI"
(LEVITICUS)
Dao: Phung"
Xeim: ngaui" tarha" paug' mae caung:pa" thung" jham we' ganhae" Israel byumyu" qe: pyad mae" caung:pa" thung" li poe jham: akhyo bobo mung:- mho" byid' ra" mo, khyo jham re lo, joe" kad' thug' nae" qo qo" ko" ra" mo, khinjaung qe: qhid' mae" thung"li jham bobo: ra".
Ce: jham: paug' mae akhyag: thao" ra" khyo wa Mao"So: gyang" lho" ru we' yao" byumyu" qe yao: re caung:pa" byid: nae" akhyo jham ngad mung:- Israel nho: gyang" lho" Mao"So we' yao: bam jho" zam" khug: ra" khyo re zaui" ci yang: kao so' daui nae" khyo ngad: ra".
Ce: jham: mugsug' paug' mae mang qi" ra" jham: dau re 19.18 mae the' myao mung:- qi" thao" ra" kham" to" ra" amyin" dao: shid' lam: ein: lam: ngad: ga:- Yesu mhang" ra" jham dau ngad: ra". Aiwa naoyao" gaung re jhid'de; ru we' dakhyo:- ni" yham kyo: cao: re jhid'de; wa,- ga" ru ngad: ra".
1
Dau: Geim" Phad' Ngaui" Byid' Ra" Xeim:
1 Asang wa Moshe re Asang qhid' kheim: Zaung mae" khai mung:-
2 Yao: bam: xeim: jham re yao: bam ngaui" byid: gelao"- phug' cao" genae" qhid' mae" o mae tung" to" ra" tarha" jham re Israel byu qe: qhid' mae" Moshe re byid' ra".
Byu dayaug yaug gug'nyhug' ngaui" xeim: re byid: nae" ngad: re airu wa yao: nho: nung: dadau: mangad: lao"- yao" yao dadau:- mangad: lao" wa yao" cad' be, dadau: jham mae" ngad qo: ra".
3 Yao: wa yao" nung: re phad' ngaui" byid' ra" xeim: khyo" byid' ngad: re wa yao: wa qo mabo: ra" nung: jaung lo: re cili" byid: ca" ra". Yao: re Asang khae: yu byid' li" nae" qhid' mae" yao: wa ai: gug'nyhug' re Asang: qhid' kheim: Zaung kham: dung: mae nha: to: ca" ra".
4 Ai: yaug wa ai: nung: jaung lo" nho: au: dao mae yao" lo, kai: byid: nae" ngad: ra". Airu wa yao" qobo re yu: pye' byid' ra" mang dae ngaui" xeim: khyo" khae: yu byid' ru qhug' li" nae".
5 Yao: wa ai: nung: jaung lo: re aitau mae se' mung:- Arun nho: kaung mae" khinjaung qe wa ai: sa: Asang re qhaug' byid: mung: yang:- Zaung kham: dung: mae jo; ra" phan shad' khao: ngo" mae vhag' sheim" pye' li" genae".
6 Ai: thao re yao: wa ai: gug'nyhug' re shoqid qhid' pye' mung: je, nae" ngad: ra".
7 Amung: khinjaung qe wa phan dao mae thao: nyhang" seim" zao mung: myi: te' nae" ngad: ako".
8 Yao: bam wa au: we' xau bobo yang: ai: shoje, jham re myikhyeim" dao mae vo; kai" li" genae" ngad: ra".
9 Aiyaug wa khug lam khug sang: we' khyid jham re cid' pye' ca" ra". Amung: Tarha" vao: ra" khinjaung pho" wa phan dao mae dau: geim" re phad' ngaui" byid' li" nae". Ce: zo:ve xeim: meim sheim wa Asang re ngaui nhao: ra".
10 Byu dayaug wa yao" yao- mangad: lao" yao" cad' be, dadau: dau: re xeim: ngaui" byid' ngad: re aiwa qo mabo: ra" alo: ngad ca" ra".
11 Yao: wa aire phan mug: am: shad' mae se' mung:- khinjaung qe wa ai: gug'nyhug' sa: re phan byid shad' geim" khyo vhag' sheim" ke' genae" ngad: ra".
12 Aire bin: phyo' thao re tarha" vao: ra" khinjaung pho" wa au: we' xau bobo yang:- gaung dau alhab' re myikhyeim" dao khyo vo; zaui: ke' li" genae".
13 Ai: yaug wa khug lam khug sang: we' khyid jham re cid' ca" ra". Amung: khinjaung pho" wa ai: ngaui" xeim: re Asang re qhaug' byid: mung:- ai: gu: alhab' re phan dao mae phad' ngaui" byid' li" nae". Ce: zo:ve xeim: meim sheim wa Asang re ngaui nhao: ra".
14 Byu dayaug wa ngho' re phad' ngaui" ra" xeim: khyo" ngaui" byid: nae" ngad: re aiwa phaung" kyug' mangad: lao"- jid: au ngad ca" ra".
15 Khinjaung pho" wa aire lang zang: nhag: phyid' mung:- phan mae kai: yang: au: re phan dao mae phad' ngaui" nae" ngad: ra". Sa: re phan tau" te' shad' khyo zhin: khyo" pye' nae" ngad: ra".
16 Yao: wa lad re yu: pye' mung:- aimae bo: ra" gu: we' myiqe, vhe' khyo" to" ra" jo, qo ngad: ra" phan ba thug' shad' khyo shapye' to: nae" ngad: ra".
17 Yao: wa daung re zaui" ci mung:- daung maqeim lo: gaung re lao" kho' yang: phan dao mae dau: geim" re phad' ngaui" byid' li" nae". Ce: zo:ve xeim: meim sheim wa Asang re ngaui nhao: ra".