9
Yehu Re Israel Kho:kham Khyo" Xau Gyad Byid' Ru
1 Ai: ayo, mae lapa Elisha wa lapa zolau: pho" dayaug re khai: yu mung:- Gilead mae" Ramod khyo ye: nae" seim" wa,- ce: zhanlun xau yae yu: vin wa,.
2 Nao aikhyo joe" ye: lao"- Yehoshaphad nho: yauggai zo:- Nimshi nho: yao: myid: Yehu re yeqho wa,- yao" byin cao: qe mae" gathaung san" jhui" yu yang: kug qe, khyo jhui" vao ye: mung:-
3 Yao" au: dao mae ce: zhanlun xau vhe' gyad byid: wa,- amung: Asang wa Israel kho:kham khyo" nao re xau gyad byid' ga: ta" ra"- ein: ta" wa,- ai:thao gai boe" qhi" phyad yang: aimae" thug' lo" wa,- ga: ta" ra".
4 Amung: lapa zolau: wa Ramod khyo ye" lo" ra".
5 Aimae gyezug: qe zabphaung phaung: na ko" rure ye myao mung: yao: wa zug: pho" we"- ngo wa ni" qhid' mae" mungdao: qo"- ga: ta" ra".
Yehu wa ngonhaung" mae" khoyaug lam: re nao jhau: na: i? ga: myid' ra".
Lapa zolau: wa zug: pho" nao re ngad: ga" phaug' tau" ra".
6 Ailao"- yao: shid' yaug yham khug khyo vao lo mung: lapa zolau: wa Yehu nho: au: mae xau vhe' gyad byid: yang: yao: re- Israel nho: Mao"So Asang wa nga" byumyu" Israel nho: kho:kham kad' nae" ngo nao re xau gyad byid'-
7 Nga" lapa qe we' gatau nga" daui daui mo, re se' ru qhid' mae" Yezebe re ngo qobo dae qo" byid: nae" qhid' mae" ai: Ahab nho: yauggai zo: ni" asang kho:kham pho" re nao se' ca" li" nae".
8-9 Ahab nho: yham khaung byu qe we' myid:zo: qe alhab' shid ca" nae" ngad:- ngo wa yao" yham khug mae" yauggai yaug khao: ngo" re angai- aqi: re dakhyo: za: yu: pye' nae". Ngo wa Israel kho:kham Yeroboam nho: yham khaung byu qere we' Israel kho:kham Basha re kad' reru: ngo wa yao" yham khaung byu qere kad' nae".
10 Yezebe wa nyhab' shaung: ru maqhug' nae"- yao" mao gaung re Yezre mug: myid mae lakha: jham: yang zo" pye' li" genae"- ga: ta" ra". Ce: dao: bin: ta" thao lapa zolau: wa ai: qe, mae" thug' lo" mung: tao" phao: lo" ra".
11 Yehu wa yao" gyezug: byin cao: qejhao" tug' lo mung:- pe" maca" i? Ai: ago pho" nao re pe" ga" i? ga: lham: myid' ako". Yehu wa- yao: pe" o: rure naonhaung" ba: ako"- ga: phaug' tau" ra".
12 Ngonhaung" maba- yao: pe" ta" ru ngonhaung" re ta" kyo: la,- ga: phaug' tau" ako".
Ailao" Yehu wa- ngo nao re Israel kho:kham kad' nae" xau gyad byid'- ga: Asang ta" ra" ga: yao: ngore ta" ra"- ga: tau" ra".
13 Aijao" Yehu nho: gyezug: cao: qe wa yao: bam: bau: qhang jham re zam thao au: Yehu nho: khyid qao: mae phyid: myhung: yang: labo" mad mung:- Yehu wa kho:kham ngad:- ga: zag: hug' ako".
Israel Kho:kham Yoram Se' Pye' Qhug' Ru
14-15 Ai: thao Yehu wa Yezre mae na: ra" Israel kho:kham Yoram re tau: lhan" ra". Ai: kho:kham pho" wa Suri kho:kham Hazae re gye kad' mung: Ramod gyekhe' poe mae the' zao" ra" dae re ya: yu nae" lo" byaug: ra". Aimung: Yehu wa yao" gyezug:- byin cao: qere naonhaung" nga" bo: de, ko" re wa- dayaug re: Ramod mae" thug' lo" mung: Yezre vobyu qere maye: peim: genae" qhid' mae" lha" ge,- ga: ta" ra".
16 Ai: thao yao: wa yao" gyekhe' myao: lhin" khug khyo do; zaung mung: Yezre khyo ye" lo" ra". Yoram wa dae magai shi: ngad: ra". Yuda kho:kham Ahazia re: aimae yao: jhao" yena: jo; ra".
17 Yezre mae" gyebyu zaung mae zaung" ang: ra" zaung" yaug wa Yehu we' yao" byu qe te' li" na ko" rure myao: ra". Yao: wa gyezo: daphung: li" na: ako"- ga: hug' ke' ra". Yoram wa ai bam ba nam qe ngad ko" la,- gyevo qe ngad ko" la,- myao: jui: mo, re yequ" nhao wa,- ga: phaug' tau" ra".
18 Lagyo: pho" wa Yehu jhao" myao: zaung: ye: mung:- yao: re nao ba nam khyo" li" laug ga" rure kho:kham pho" ba nug: ra"- ga: yeta" ra".
Ai: wa ni" mau" mangad:- nga" thao cao" wa, ga: lham: ta" ra".
Gyebyu zaung mae" zaung" yaug wa- ai: lagyo: pho" wa byu phung: khyo joe" ye" ava"-ngadqere: matug' lo ngad: ra" ga: lau ta" shid' ra".
19 Gatau lagyo: dayaug re dam: nhao: ke' ako". Aiyaug re: Yehu re dao: myid: dakhyo: za: ye myid' ra". Yehu wa- ai wa ni" mau" mangad: nga" thao cao" wa,- ga: lham: dam: ta" ra".
20 Zaung" yaug wa lagyo: pho" wa ai: byu phung qekhyo joe" ye" ava". Ngadqere: matug' lo ngad: ra"- ga: lau dam: ta" kyo" ra". Yao: wa ai: byuphung" nho: au: jhaung wa Yehu we' dau mung: yao" gyekhe' myao: lhin" re ako" asho: keim" li" na: ra" ga" bota" ra".
21 Kho:kham Yoram wa nga" gyekhe' myao: lhin" seim" ge,- ga: ta" ra". Bin: seim" lao"- yao: we' kho:kham Ahazia wa Yehu re yeqhug' nae" qhid' mae" yao: yao" gyekhe' myao: lhin" mae zaung: ye" lo" ako". Yao: shid' yaug wa Yao: re Nabod sang: lo: ra" yo mae yeqhug' ako".
22 Yoram wa yao: re nao ngaui pyo: yaug yo: khyo" joe" li" i? ga: myid' ra". Yehu wa ngonhaung" wa jan: zho" ru we' ni" myhi" Yezebe yang qhid: to" ra" so alho qo" jo, shi au: khoru: gai: ngaui pyo: yaug yo: ru jo,nae" i? ga: tau" ra".
23 Yoram wa Ahazia we"- gyevo lhe"- ga: hug' yang: yao" gyekhe' myao: lhin" re lhang mung: phao: lo" ra".
24 Yehu wa yao" lo, la re she: yu mung: yao" qam: bo: thao" phin: yang: myo: dakhe' bag: ke' ru wa Yoram nho: dao: gaung: mae lo" zaug mung: yao" kheim: re bag: kyao" lo" ra". Yoram wa yao" gyekhe' myao: lhin" mae- shid: gyang: lo" ra".
25 Yehu wa yao" gyezug: pho" Bidka re- yao" mao gaung re gaug: yu mung: Nabod sang: ra" yo mae ye shapye' to: wa,- nao we' ngo kho:kham Yoram nho: yao: pho" Ahab thao mae myao: zaung: na: au: Asang wa Ahab re gye kad' mung:-
26 Ngo wa Nabod we' yao" yauggai zo: qere se' rure ayenhe' myao va"- ngo wa nao re ce: yo tau mae yao: qobo dae byid: nae" ein: myid: beim: wa,- Yehu wa yao" gyezug: pho" re Yoram nho: mao gaung re gaug: yu yang: Asang: dao:so: jab byang" li" nae" qhid' mae" Nabod sang: ra" yo mae ye shapye' to: wa,- ga: amyin" byid' ra".
Yuda Kho:kham Ahazia Se' Pye' Qhug' Ru
27 Kho:kham Ahazia wa boe" ra" khyo re myao mung: yao" gyekhe' myao: lhin" mae zaung yang: Bed Hagan vogaung: shad' khyo phao: lo" ra". Yehu wa cao" khe' ra" Yehu wa yao" byu qere yao: rere: se' pye' ge,- ga: amyin" byid' ra". Yao: bam wa yao" gyekhe' myao: lhin" mae Gura khyo lo" ra" khyo- Ibleam vogaung: nhae mae yao: re dae te' ako". Ngadqere: yao: wa Megido vogaung: khyo joe" sho' xo' ye" lo" mung: aimae lo" shid: ra".
28 Yao" gyezug: qe wa yao" mao gaung re gyekhe' myao: lhin" dao mae gaug: tho mung: Yerusalem khyo tho: lo" mung: Davi vogaung: mae" kho:kham lab mae yao: re nyhab' pye' ako".
29 Ahab nho: yauggai zo: Yoram Israel kho:kham kad' ru daxe: dazin mae Ahazia wa Yuda kho:kham boe" lo: ra".
Kho:kham Myhi" Yezebe Se' Pye' Qhug' Ru
30 Yehu Yezre khyo joe" lo" ra". Yezebe wa boe" ra" khyo re the' gyo" to: gau ngad: ra". Myo,jid' tung" pye'- xae kyo' shaung: pye' yang: ye; jo, mung: hau" mo" khyo khyo qu" khyo" ke' ra".
31 Yehu" kham: mo" khyo lai: vao lo: na: au: Yezebe wa nao Zimri we"- byu khug' se' yaug we"- nao cemae pe"mung: joe" na: i? ga: zag: hug' ra".
32 Yehu wa tau: qu" ke' mung:- nga" bo: khag' de, ko" i? ga: hug' ke' ra" kho:kham kho" mae" gyezug: shid' sam zo: wa bao: zo: kham: mae" yao: re qu" ke' ako".
33 Yehu wa yao: bam re yao: re pye' khyo" ke' ge,- ga: ta" ke' ra". Yao: bam wa Yezebe re pye' khyo" ke' mung: yao" sa: jham wa khinqae mae we' myao: jham re zin: sheim" lo" ra". Yehu wa yao" gyekhe' myao: lhin" re yao" gaung dao khyo" keim" lai: lo" ra".
34 Kho:kham kho" khyo vao lo" mung: zozo" ra". Ai: thao lao" za:- ai: myiqe: re ye nyhab' pye' ge,- ga: ta" ra". Pe" ngad ngad yao: wa kho:kham myiqe: zo: ngad: ra".
35 Ngadqere: yenyhab' nae" yauggai qe wa au: gao: lo, qug:- khyid qug: jham mae" je yang: pe" maye: myao ngad: ako".
36 Yao: bam ce: khyo re Yehu re lau lo" ta" kyo: gelao" yao: wa- ceru wa yao" daui daui yaug Elia nhad' khyo" yang ta" au: boe" nae" ga: Asang ta" ra" dao: ngad: ra". Aiwa Yezre myid gaung mae lakha: jham wa Yezebe nho: mao gaung re zo" li" genae".
37 Khag' re: yao: re maba qu" xam: nae" qhid' mae" yao" gaung dang: ra" gu: wa khyid' bam we' dakhyo: aimae sin" jo; li" nae"- ga" ru ngad: ra"- ga: ta" ra".