2
Elia Mug Gaung Khyo To' Yu Qhug' Ra" Khyo
1 Asang wa Elia re la sham" mae mug:gaung khyo to' yu nae" ayo, joe" lo: ra". Elia we' Elisha wa Gilga mae" to" lo" mung:-
2 Khyole, mae Elia wa Elisha re nao cemae na wa,- Asang wa ngore Bethela khyo ye: nae" amyin" byid' ra"- ga: ta" ra". Ngadqere: Elisha wa ngo nao re mato: co' nae" ein: ngo jhaug' zaug: ra" Asang we' nao re mang lao: yang: ngo jham tang" ra" ga: tau" ra". Aimung: yao: shid' yaug wa Bethela khyo xo' ye" lo" ako".
3 Amae na ko" ra" lapa daphung: wa Elisha jhao" ye: mung: yao: re Mao"So wa ana" ba ni" Asang re nao mae" jhui" yu: pye' nae" rure nao ba: i? ga: ta" ako".
Elisha wa ngo ba ngadqere: aikhyo we' sin: yang: ngonhaung" mata" gejhao"- ga: ta" ra".
4 Ai: thao Elia wa Elisha re ana" nao cemae na wa, Asang wa ngore Yerikho khyo ye: nae" amyin" byid' ava"- ga: ta" ra". Ngadqere: Elisha wa ngo nao re mato: co' nae" ein: ngo jhaug' zaug: ra" Asang we' nao re lao: yang: ngo jham tang" ra"- ga: tau" ra". Aimung: yao: shid' yaug Yerikho khyo ye" lo" ako".
5 Amae na ko" ra" lapa daphung: wa Elisha jhao" ye: mung: yao: re- Asang wa ana" ba ni" Asang re nao mae" jhui" yu: pye' nae" rure nao ba: i? ga: ta" ako". Elisha wa ngo ba:- ga: tau" ra". Ngadqere: ai: khyo we' sin: yang: ngonhaung" mata" gejhao"- ga: ta" ra".
6 Ai: thao Elia wa Elisha re ana"- nao cemae na wa,- Asang wa ngore Yodan gyaung: khyo ye: nae" amyin" byid' ra"- ga: tau" ra".
Ngadqere: Elisha wa ngo nao re mato: co' nae" ein: ngo jhaug' zaug: ra" Asang we' nao re lao: yang ngo jham tang" ra"- ga: tau" ra". Amung: yao: shid' yaug wa xo' ye" lo" ako".
7 Lapa qe ngo" xe yaug re: Yodan gyaung: khyo cao" ye" lo" ako". Elia we' Elisha wa qid yae mae yethang: ako". Aimung: ai: lapa ngo xe yaug wa dajhid' va: mae ye; jo; ako".
8 Ailao"- Elia wa yao" bau: qhang re khyad' pye' yang: dang: mung: ai yang qid re be; ke' ra". Qid wa jho" kho' lo" mung: yao: we' Elisha wa myid ho yo mae thoete' khyo gau" de; ye" ako".
9 Aimae Elia wa Elisha re ngo jhui" yu maqhug' shire ngo nao re pe" kad' byid: nae" nao o: i? Ngo re ta" la,- ga: myid' ra". Elisha wa ni" byo qam: so' shid' zhao" ngore qo" nhao la,- ai wa ngore ni" khu mae xo' kad' nae" qam: byid' li" nae"- ga: tau" ra".
10 Elia wa ceru wa byid: nae" gyai qug' ra". Ngadqere: nao mae" ngore jhui" yu: pye' au: nao the' myao: re wa nao aire qo" khae: yu: li" nae"- ngore nao mathe' myao re wa aire nao maqo" khae: yu nae"- ga: phaug' tau" ra".
11 Yao: shid' yaug xo' su" ye" lo" zo" jho" jhau: ye" lo" ako". Ailao" myi myao: jham: yang she: ra" myi: gyekhe' myao: lhin" wa nyag din taung" yao: shid' yaug: agyo: mae joe" li" mung: Elia wa la sham" yang mug:gaung khyo to' yu: ru qhug' ra".
12 Elisha wa aire the' myao mung: Elia re -nga" pho" we"- nga" pho" we"- Israel nho: gyekhe' myao: lhin" jham we' myao: jui: mo, wo"- nao lo" byaug va"- ga: hug' ta" ra". Yao: wa Elia re khonhae" re: madam: the' myao lo:ngad: ra".
Nhag' kaug' yang: Elisha wa yao" bau: qhang re shid' gao lao" kho' pye' ra".
13 Ai: thao yao: wa Elia yang khyo" to: co' ra" yao" bau: qhang re gaug: yu yang: tug' phao: lo" mung: Yodan gyaung: qid yae mae lo" ye, jo; ra".
14 Yao: wa Elia nho: bau: qhang yang qid gyaung: re be; mung:- Elia nho: Mao"So Asang wa khai: mae i? ga: ta" ra". Ai: thao yao: wa qid gyaung: re dam: be; ke' ra". Qid wa jho" kho' lo" mung: thoete' khyo su" de; lo" ra".
15 Yerikho mae" lapa ngo" xe yaug wa yao: re myao gemung: Elia nho: qam: so' wa Elisha dao mae qo" jo; ava"- ga: ta" ako". Yao: bam wa yao: jhao" ye: mung: yao" qhid' kheim: mae yegoe; gyo" yang:-
16 Ngonhaung" cetau mae ngo" xe yaug na:-alhab' mo, qam: bo khye' mo, za: ngad:- ni" Asang re yeqho gelang:- Asang: byo wa yao: re jhui" lo" byaug mung: bam mae we' lao: khaung: khaung: mae to: co' re to: co' maba- ga: ta" ako".
Elisha wa- naonhaung" magai: ye genae"- ga: tau" ra".
17 Ngadqere: yao: qad li" sho' yao: bam nao: gyi: zag yang: ta" ako". Ai: ngo" xe yaug wa Elia re myhao: ra" jo, qo- nyham: ra" jo, qo khaung: mae sam ba lam: lam: yeqho: ako". Ngadqere: yao: bam yao: re maqhug' ngad: ako".
18 Ailao" yao: bam wa Elisha jhao" dam: tug' lo: ako". Yao: wa yao: bam re naonhaung" re daye: ga, ein: ngo ta" va" mangad: i? ga: lham: ta" ra".
Elisha Nho: Mug' Pho: Ve,lho Jham
19 Yerikho mae byu daqhae: wa Elisha jhao" ye: mung: Asang we"- nao ba: ru we' dakhyo: ce: vogaung: wa gyai pyo" ra". Ngadqere: qid magai yang zo: vin: shoe' khyo" ru gyai boe" nhao: ra"- ga: ta" ako".
20 Yao: wa khug' asag' mae xo: dajhid' ke' mung: ngojhao" cilo geri:- ga: amyin" byid' ra". Yao: bam yao: jhao" cilo byid' ako".
21 Yao: wa qid thug' khyo ye: mung: ai: xo re qid mae ye pye' zaui: ke' mung: Asang ceru: ta" ra". Ngo wa ce: qid re gyang" san nhao ra". Aimung: ce: qid wa shid: ru we' zo: vin: shoe' khyo" ru maboe" nhao lo nae"- ga: ta" ra".
22 Elisha ta" ru we' dakhyo: ai: ba mae" qid wa gyang" san: lo" byaug: ra".
23 Elisha wa Yerikho mae" thug' lo" mung: Bethela khyo ye" lo" ra" khyole; mae zolau: daqhae: vogaung: mae" thug' li" mung: yao: re qi: jung" ako". Yao: bam wa nga: gyad we"- cemae" thug' lo" wa,- ga: hug' ako".
24 Elisha wa lhang: lo mung: yao: bam re zhaug' qu" yang: Asang: mang mae yao: bam re nhang" ra". Ai: thao seyo mae" vae myhi" shid' dau: thug' li" mung: zolau: byid xe: shid' yaug re adau dau bin" cad' sin" pye' ako".
25 Elisha wa Khame bam khyo ye: mung: thao re Samari khyo tug' lo" ra".