15
Yuda Kho:kham Uzia
(2 Km 26.1-23)
1 Israel kho:kham Yeroboam II eib: ru shid' xe: nhad' zin ein: zin mae Amazia nho: yauggai zo: Uzia wa daxe: khyaug' zin mae Yuda kho:kham boe" lo: ra".
2 Yao: wa Yerusalem mae ngo" xe: shid' zin eib: na: ra". Yao: myhi" wa Yerusalem mae" Yekholia ga: yaug ngad: ra".
3 Yao: pho" nho: ave, aso: re cao" mung: Asang o ngaui ra" mau" re kad' ra".
4 Ngadqere: tarha" taung bug so jham re caung:pa" ra" jo, qo jham re maphyo' pye' mung:- mung" byu qe wa xo' yang: aimae ngaui" xeim: we' sheim nae pyo: ja: re phad' ngaui" byid' ako".
5 Asang wa Uzia re mao gae: boe" nhao mung: dang: ra" yao" pyad gu: mae boe" jo; ra". Yao: wa yao: yao" yham mae na mung: mau" mae" thang: jo; ra". Ai: ayo, gyo: mae yao" yauggai zo: Yotham wa mung"dan: re eib: ra".
6 Uzia kad' ra" gatau lo, mau" ja: khao: ngo" re Yuda kho:kham qenho: mhomyi: paug' mae tung" xam" to" ako".
7 Uzia shid mung: Davi nho: vogaung: mae" kho:kham lab bug mae yao: re nyhab' shaung: pye' ako". Amung: yao" yauggai zo: Yotham wa yao" khu mae kho:kham xo' kad' ra".
Israel Kho:kham Zekharia
8 Yuda kho:kham Uzia eib: ru sam xe: she' zin ein: zin mae Yeroboam II nho: yauggai zo: Zekharia wa Israel kho:kham boe" lo: ra". Yao: wa Samari mae lho" khyaug' khye' eib: na: ra".
9 Yao: wa yao" qhid' au: mae" mo, we' dakhyo: Asang re qobo shad' lhoe" ra". Yao: wa Israel byu qere qobo jhui" shad' yaug ngad: ra" Nebad nho: yauggai zo: kho:kham Yeroboam nho: makhyang" ra" ave, aso: re cao" ra".
10 Yabe nho: yauggai zo: Shalum wa kho:kham Zekharia re geim lau kad' mung: Ibleam mae yao: re khug' se' pye' yang: yao" khu mae kho:kham xo' kad' ra".
11 Zekharia kad' ra" gatau lo, mau" ja: khao: ngo" re Israel kho:kham qenho: mhomyi: paug' mae tung" xam" to" ako".
12 Airu:- Asang: yang kho:kham Yehu re- ni" myid:zo: qere byid qae: joe" sho' Israel kho:kham kad' li" genae"- ga: dao:so: byid' to" ru jab byang" lo: ra".
Israel Kho:kham Shalum
13 Yuda kho:kham Uzia eib: re sam xe: gug zin ein: zin mae Yabe nho: yauggai zo: Shalum wa Israel kho:kham boe" lo: ra". Amung: yao: wa Samari mae lho" dakhye' eib: ra".
14 Gadi nho: yauggai zo: Menahem wa Tiza mae" Samari khyo ye: mung: Shalum re yekhug' se' pye' yang: yao" khu mae kho:kham xo' kad' ra".
15 Shalum kad' ra" gatau lo, mau" ja: khao: ngo" yao: geim lau khug' to" ra" khyo bobo mung: Israel kho:kham qenho: mhomyi: paug' mae tung" xam" to" ako".
16 Menahem wa Tiza mae" ye" ra" gyaung khyo mae Tapua we' vobyu qere aimae lhang" kham" to" ra" mug: myid jham re ai: vomo" yao: re lo, matau yang: bin sho' phyo' qheim" pye' ra". Yao: wa gaung la" ra" myiqe: qere lao" vae: dug: thug' phaug' pye' byid' ra".
Israel Kho:kham Menahem
17 Yuda kho:kham Uzia eib: ru sam xe: gug zin ein: zin mae Gadi nho: yauggai zo: Menahem wa Israel kho:kham boe" lo mung: yao: wa Samari mae daxe zin eib: na: ra".
18 Yao: wa shid: ra" ba na joe" sho' Asang re qobo shad' lhoe" mung: yao: shid: ra" ba na joe" sho' Israel byu qere qobo jhui" shad' ra". Nebad nho: yauggai zo: kho:kham Yeroboam nho: makhyang" ra" ave, aso: re cao" ra".
19 Asuri khosin" Tiglad Pilese Israel mung" khyo jhin" vao li" mung:- Menahem wa khosin" pho" yang bao" thaug' byid' ruyang mung"dan: dao mae Menahem nho: kheim: so' re qam: bo nhao: ru qo" yu nae" qhid' mae" yao: re ngaui telenta dataung yebyid' ra".
20 Menahem wa ai: ngaui re Israel byu jo,nho" qo" mo, mae" dayaug: yang ngo" xe kye' kye' byid: nae" deim" zag: mho' ra". Tiglad Pilese wa yao" mung"dan: khyo tug' phao: lo" ra".
21 Menahem kad' ra" gatau lo,mau" ja: khao: ngo" re Israel kho:kham qenho: mhomyi: tung" xam: paug' mae tung" to" ako".
22 Yao: wa shid: lo" mung: nyhab' shaung: pye' ako". Yao" yauggai zo: Pekahia wa yao" khu mae kho:kham xo' kad' ra".
Israel Kho:kham Pekahia
23 Yuda kho:kham Uzia eib: ru ngo" xe zin ein: zin mae Menahem nho: yauggai zo: Pekahia wa Israel kho:kham boe" lo: ra". Yao: wa Samari mae shid' zin eib: na: ra".
24 Yao: wa Israel byu qere qobo jhui" shad' ra" Nebad nho: yauggai zo: kho:kham Yeroboam nho: makhyang" ra" ave, aso: re cao" ra" yang: Asang re qobo shad' lhoe" ra".
25 Pekahia nho: gyezug: Remalia nho: yauggai zo: Peka wa Gilead mae" byu ngo" xe yaug we' daga" geim lau to" mung:- Samari vogaung: mae" kho:kham kho" nho: akhug mae" gyetab mae Pekahia re khug' se' pye' ra". Amung: yao" khu mae kho:kham xo' kad' ra".
26 Pekahia kad' ra" gatau lo, mau" ja: khao: ngo" re Israel kho:kham qenho: mhomyi: paug' mae tung" xam" to" ako".
Israel Kho:kham Peka
27 Yuda kho:kham Uzia eib: ru ngo" xe: shid' zin ein: zin mae Remalia nho: yauggai zo: Peka wa Israel kho:kham boe" lo: ra". Yao: wa Samari mae shid' xe zin eib: na: ra".
28 Yao: wa Asang re qobo shad' mung:- Israel byu qere qobo jhui" shad' yaug Nebad nho: yauggai zo: kho:kham Yeroboam nho: makhyang" ra" ave, aso: re cao" ra".
29 Peka kho:kham kad' na: au: Asuri khosin" Tiglad Pilese wa Iyon- Abela Bed Makha- Yanoa- Kade- Hazora vogaung: jham we' Gilead -Galile- Nabhtali- mug: myid jham re aung: yu: pye' mung: vobyu qere kyam: byu khyo" Asuri mung" khyo jhui" lo" ako".
30 Uzia nho: yauggai zo: Yotham Yuda kho:kham khyo" eib: ru shid xe zin ein: zin mae Ela nho: yauggai zo: Hoshea wa Peka re geim lau to" mung: yao: re khug' se' pye' ra". Amung: yao" khu mae kho:kham xo' kad' ra".
31 Peka kad' ra" gatau lo, mau ja: khao: ngo" re Israel kho:kham qenho: mhomyi: paug' mae tung" xam" to" ako".
Yuda Kho:kham Yotham
(2 Km 27.1-9)
32 Remalia nho: yauggai zo: Peka Israel kho:kham khyo" eib: ru shid' zin ein: zin mae Uzia nho: yauggai zo: Yotham wa shid' xe: ngo" zin mae Yuda kho:kham boe" lo: ra".
33 Yao: wa Yerusalem mae daxe: khyaug' zin eib: ra". Yao: myhi" wa Zadog nho: myiqe: zo: Yerusha ga: yaug ngad: ra".
34 Yotham wa Yao: pho" Uzia kad' ra" mau" re cao" mung: Asang re o ngaui nhao: ra" lo, mau" kad' ra".
35 Ngadqere: tarha" taung bug so re caung:pa" ra" jo, qo jham re maphyo' qheim" pye' ngad: ra". Amung: mung" byu qe wa ngaui" xeim: jham re we' sheim: nae pyo: ja: jham re aimae phad' ngaui" byid' ako". Yotham wa Caung:pa" Yham mug: am: shad' kham: re kad' yaug ngad: ra".
36 Yotham kad' ra" gatau lo, mau" ja: khao: ngo" re Yuda kho:kham qenho: mhomyi: paug' mae tung" xam" to" ako".
37 Yao: kho:kham kad' na: au: Asang wa- Suri kho:kham Rezin we' Israel kho:kham Peka re Yuda re gyekhe' nae" sao qhid' nhao: ke' ra".
38 Yotham shid: lo" mung: Davi nho: vomo" mae" kho:kham lab mae nyhab' shaung: pye' ako". Amung: yao" yauggai zo: Ahaza wa yao" khu mae kho:kham xo' kad' ra".