7
Sholamon Nho: Kho:kham Kho"
1 Sholamon wa yao: yao" qhid' mae" kho:kham kho: rere: kad' ra". Aire daxe: sam zin myao" sho' kad' ra".
2-3 Yao: wa Lebanon seyo yham mo" re qhang phyao:- dayo daung"- lu phyao: ngo" xe daung"- myhao phyao: sam xe daung" bo: ra". Dajin mae daxe: ngo" zang bo: ra" shaug' zang baung: sam jin mae shaug' dang bad jham te' to" ra". Myo,kyo wa shaug' the: ngad mung: zai to: qe, jham khyo joe" sho' ngad: ra". Aijham re zang baung: jham: yang vin: ci: ra".
4 Khinqae shid' shad' geim" mae bao: zo: kham: sam jin jin de; ra".
5 Kham: baung we' bao: zo: kham: jham re: byid khyug daqi" bo: ra" akhyao kad' ra". Khinqae mae" bao: zo: kham: sam jin wa tau" te' mae" jin jham re myo, nho qang: to" ako".
6 Yham mo" zang baung: jham wa ngo" xe daung" qhang: ra" lu phyao: sam xe daung" bo: ra". Aiwa mug nghoe' to" ra" ginbyae: dalam: de, mung: zang baung: jham: yang aire qin: ci: ra".
7 Kho:kham tao" khau" qe,- Sholamon dao: kho' ra" au: ci ra" jo, qo ngad: ra" dao: kho' ra" qe, mo" ga" re: mhang" ko" ra" jo, qo re phyao: gaung mae" khaung joe" sho' shaug' the" yang kad' to" ra".
8 Dao: kho' ra" qe, mo" nhaung thao" shad' vang" gatau dalam: mae Sholamon nho: yham jham re wa gatau: yham jham we' dakhyo: kad' ra". Yao: wa Egutu kho:kham pho" nho: myiqe: zo: yao" yham sang myhi" qhid' mae" re: yham ai:ja: ru" ru yao: kad' byid' ra".
9 Ce: yham jham we' vang" mo" re apan aqao: mae" aau: joe" sho' gai: ra" laug baui jham: yang kad' to" ako". Laug baui jham re kho' phyid' mung: akhug shad' we' taung gaung shad' athao thao re davang" za: sag' qag' yang phyid' vhang" to" ra".
10 Apan aqao: laug baui jham re- daqhae: re qhang phyao: she' daung"- gatau daqhae: re qhang phyao: daxe daung" bo sho' phyid' kho' nyhang" ako".
11 Aijham: tho' mae phyid' ka" ra" laug baui jham gatau we' shaug' dangbad jham kai" to" ra".
12 Kho:kham kho" vang"- Caung:pa" Yham akhug shad' vang"- Caung:pa" Yham kham: dung: qe, jham wa phyid' kho' to" ra" laug baui sam pyae bin: zao khao: ngo" shaug' dang bad ke' mung: khinqae qae: to" ra".
13 Kho:kham Sholamon wa Ture mae na: ra" lo, mau" zaui: yaug Huram ga: mang yaug re khai nhao: ke' ra". Yao: wa gyid: zai lo, mau" zaui: jhao yaug ngad: ra".
14 Mana lo" ra" yao: pho" wa Ture mae" ngad mung: yao: re: gyid: zai lo, mau" zai jhao yaug ngad: ra". Yao: myhi" wa Nabhtali amyu" kaung mae" ngad: ra". Huram wa au: naug: gai mung: boe" doe; ra" lo,mau" zaui: yaug ngad: ra". Yao: wa gyid: zai alhab' lo, mau" zaui: nae" au: jhaung kad' ra" mau" qhid' mae" Sholamon yang khai: rure khae: yu: ra".
Gyid: Zang Baung: Shid' Zang
(2 Km 3.15-17)
15 Huram wa myhao phyao: daxe: she' daung"- qi: phyao: daxe: shid' daung" bo: ra" gyid: zang baung: shid' zang sheim" ra". Aire Caung:pa" Yham kham: mae zhaug' to" ra".
16 Yao: wa zang baung: au: mae kai: nae" qhid' mae" dalam: re ngo" daung" daung" myhao: ra" gyid: daung" zang shid' zang re sheim" ra".
17 Zang baung: au: mae jao co: jho" qo; to" ra" azung khyo" lamyhung shaung: te' to" ra".
18 Gyid: khaung: shi: lho jham shid' jin te' to" ra".
19 Ai: daung" zang akhyao wa seyo bin: we' dau mung: byid daung" myhao: ra".
20 Aire jao co: azung tho' mae jo; ra" lang" lang" mung: ra" tau mae kai" to" ra". Daung" zang khao: ngo" mae khaung: shi: alho shid' yo wa shid' jin jin kad' yang: te' to" ra".
21 Huram wa ce: gyid: zang baung: shid' zang re Caung:pa" Yham jao: kheim: qhid' au: mae zhaug' to" ra". Mug thao shad' mae" zang re Yakhin ga: mhang" mung: mug: am: shad' mae" zang re wa Boa ga: mhang" ra".
22 Seyo: bin: bu" lho daung" zang shid' zang wa ai: zang baung: shid' zang: adao mae kai" to" ra".
Aimung: zang baung: sheim" ra" mau" wa bin: byaug: ra".
Gyid: Qid Kyaung"
(2 Km 4.2-5)
23 Huram wa lang" lang" mung: ra" gyid: qid kyaung" dalam: kad' ra". Aiwa no,phyao ngo" daung"- lae phyao: daxe daung"- qi: phyao: anhad' lhang" gam: sam xe daung" bo: ra".
24 Ai: nho: anhad' o mae gyid: am baung: lho shid' jin kad' mung: qid kyaung" we' dakhyo: za: sheim" te' to" ra".
25 Ai: qid kyaung" wa taung gaung shad' khyo myo, khung: qang: to" ra" gyid: nung: jaung lo: daxe shid' dau" nho: dao kao" mae kai" to" ra". Shad' khao: ngo" khyo sam dau: dau: myo, khung: qang: to" ra".
26 Qid kyaung" ayae wa danghoe' thau: ra" anhad' wa qid kheim: nhad' we' dau mung:- seyo: bin: bu" ru: taung gaung shad' khyo lham" thug' li" ra". Qid kyaung" wa qid ga:lan: datug vao: ra".
Gyid: Lhin" Jham
27 Huram wa gyid: lhin" daxe lam: re kad' ra". Lam: khao: ngo" qhang phyao: byid daung" lu phyao: byid daung"- myhao phyao: sam daung" daung" bo: ako".
28 The: jham re byid khyug kad' mung: athao jham re daung" mung:-
29 Aijham: dao mae khang khyi lho- nung: jaung lo: lho- kherubin lho jham tung" te' ako". Adaung" jham: adao we' athai khang khyi lho- nung: jaung lo: lho jham re tung" te' to: mung: abau" bau" mung: ja: akaui asham" khyo" tung" te' to" ako".
30 Lhin" lam: khao: ngo" mae gyid: akyao" bobo mung: gyid: lhin" ce' byid ce' ce' de; ra". Byid khyug geim" mae jarung: re vin: ci: ra" gyid: daung" zang de; ra". Ai: daung" zang jham: dao mae abau" kad' mung:- akaui asham" mung: ra" khyo" lamyhung shaung: te' to" ako".
31 Jarung nhad' athao mae lam: lam: mung: daung" to" ako". Lhin" au: mae" dadaung" o khyo dathu mung: ra" daung" zang te' to" ra". Aire lam: lam: mung: kad' to" ra".
32-33 Lhin" ce' jham wa dadaung" dathu thu myhao: ra". Lhin" ce' jham wa the: qao: mae ngad mung: akyao" jham wa lhin" we' dasho: za: ngad: ra". Lhin" ce' jham wa gyekhe' myao: lhin"- lhin" ce' jham we' dau: ra". Akyao"- anhad' thab' ru- athaug'- lhin" ce' am jham alhab' gyid: ngad: ra".
34 Lhin" lam: khao: ngo" nho: athai: mae daung" zang byid zang de, mung:- aijham wa lhin" we' dasho: za: ngad: ra".
35 Lhin" jham: aau: mae dathu bo: ra" akheim" de; ra". Ai nho: daung" zang we' the: jham wa lhin" we' dasho: za: ngad: ra".
36 Daung" zang we' the: jham mae qui" ra" gu: mae kherubin lho- khang khyi lho- nung: jaung lo: lho- laso' gae lho jham- akaui asham mung: lhang" gam: alhab' mae bin: lho te' to" ra".
37 Alao"- ce wa lhin" jham re khoru: kad' ra" khyo ngad: ra". Aijham alhab' wa qi" ru we' akhyao dakhyo: za: jho" dau: ako".
38 Huram wa lhin" dalam: qhid' mae" dalam: lam: jarung: daxe lam: rere: kad' ra". Jarung: lam: khao: ngo" lae phyao: byid daung" daung" bo mung: qid ga:lan: 200 ko vao: ra".
39 Yao: wa lhin" ngo" lam: re Caung:pa" Yham: nho: mug: thao shad' mae to: mung:- gatau ngo" lam: re mug: am: shad' mae to" ra". Qid kyaung" re ba thug' shad' mug: thao shad' akhyug mae to" to" ra".
Caung:pa" Yham Re Shaung: Ra" Zai Japhin: Ajhaung
(2 Km 4.11-5.1)
40-45 Huram wa ug' jham- qe, gag khao: jham- khug' jham rere: kad' ra". Yao: wa Asang yham qhid' mae" ngad: ra". Sholamon qhid' mae" yao" mau" alhab' re kad' pin" ra". Aijham wa-
Zang baung: shid' zang
khug' akhyao shid' lam: bo: ra" zang baung: au: mae" daung" zang shid' lam:
Ai: daung" zang lam: khao: ngo" dao mae te' to" ra" jao co: jho" nag: to" ra" azung lho-
Ai: daung" zang khao: ngo" mae dazang mae shid' jin jin kad' mung: kheim" te' to" ra" gyid khaung: shi: byid yo ce'-
Lhin" daxe lam:
Jarung: daxe lam:
Qid kyaung"
Qid kyaung" re vin: ci: ra" nung: jaung lo: lho daxe: shid' lam:
Ug' jham- qe, gag khao: jham- khug' jham
Huram yang Sholamon qhid' mae" kad' byid' ra" Caung:pa" Yham qhid' mae" zai khin jham wa boe; qhui: to" ra" gyid' yang kad' ra" zai jham ngad: ra".
46 Kho:kham pho" wa aijham re Yodan gyaung: lao: khaung: mae jo; ra" Sukhod we' Zarethan agyo: mae" zhogam: zung mae sheim: nhao: ra".
47 Sholamon wa ai: gyid: zai jham re malag ngad: ra"- pe"mung:ga"re aijham wa saung" laug: ra". Aimung: aijham khonho" la" rure khonhae" re: maqo" ta" phyid' ngad: ra".
48 Sholamon wa Caung:pa" Yham qhid' mae" qhang shaung zai jham rere: kad' ra". Aijham wa phan- Mao"So re qhaug' byid' ra" mug saboe".
49 Gyang" lho" thao" jo, qo qhid' au: mae mug: thao shad' ngo" lam:- mug: am: shad' ngo" lam: zhaung: to" ra" myikaug' tao" daxe lam:- bin: jham- myikaug' jham- nye,zai" jham-
50 Khug' jham- myikaug' nyhae:- khug' jham- sheim nae pyo: ke' ban jham- myi:gyoe: gyang" ke' ci nae" myi ug: jham- Gyang" lho" thao" jo, qo we' Caung:pa" Yham taung gaung shad' kham: jham: qhid' mae" kham: lhang pye: jham ngad: ra". Ce: shaung zai alhab' wa qhang: yang kad' to" ru ngad: ra".
51 Kho:kham Sholamon wa Caung:pa" Yham mau" alhab' re bin: kad' lao"- yao: wa yao: pho" Davi yang Asang re qhaug' to: co' ra" ngaui- qhang- zai gaja: jham alhab' re Caung:pa" Yham mae" zai to: qe, mae ke' to" ra".