21
Nabod Nho: sabyi Khyae
1 Yezre mae" Ahab nho: kho:kham kho" nhae mae Nabod ga: mang yaug sang: ra" sabyi khyae dakhyae jo; ra".
2 Daba mae Ahab wa Nabod re ni" sabyi khyae ngore sang nhao la,- ai wa nga" kho:kham kho" we' re: jhao" ra"- ngo wa ai: myid gaung re ao: pho' khyae kad' nug: ra". Ai: qhid' mae" ngo wa je: gai: ra" sabyi khyae dakhyae nao re byid: nae". Mangad: lao"- nao o: ngad: re wa ai we' man" ra" aphug' byid: nae"- ga: ta" ra".
3 Nabod wa ngo wa ce: khyae re nga" phug' pho" qe: lo, mae" ngo qo" yu: to" ru ngad:- aire ngo nao re sang nhao: nae" rure Asang tam" pye' shao:- ga: phaug' tau" ra".
4 Ahab wa Nabod yang yao: re ta" ra" dao: re myid myo:- nhag' yo: mung: yham phao: lo" ra". Yao: wa yao" yab jaung: mae khinqae shad' khyo myo, khung qang: to: mung: zo re: mazo: lo: lo" pag' lang" jo; ra".
5 Yao" yham sang myhi" Yezebe wa yao: jhao" vao ye: mung:- nao aiqhi" pe"mung: myid myo" na: i? Pe"mung: zo mazo: i? ga: myid' ra".
6 Yao: wa Nabod yang ngore ta" ra" dao" yang ngad: ngo wa yao" sabyi khyae re vai nae"- mangad: lao" yao: o: ngad re ai: qhid' mae" ngo yao: re gatau khyae dakhyae byid: nae" ein: ngo yao: re myid'- ngadqere: yao: wa ngo magai: sang ga: ngore ta" li"- ga: tau" ra".
7 Yezebe wa gai va"- nao wa kho:kham ngad: ra"- mangad: i? Yab jaung: mae" to" wa,- myid pyo: pyo: za: zo zo: wa,- ngo wa Nabod nho: sabyi khyae re the' sho' kad' byid: nae"- ga: phaug' tau: byid' ra".
8 Ai: thao yao: wa vhin tung" jham tung"- aijham mae Ahab nho: mang aso: tung" te'- dazid thaung: mung: aijham re Yezre mae" gyezug: qe- au: jhaung qere vhin: ke' ra".
9 Vhin tung" jham mae- zo:ve jao" nae" ba na daba re ta" pyo mung: mo,byu qere khai: zhang" yu ge,- amung: Nabod re nga: yhe' jo, qo byid: ge,.
10 Makhyang" ra" byu shid' yaug re kho:kham re we' Mao"So re nhang" ra" ein: Nabod re qobo zhaug' dao: ta" nhao ge,- ailao" yao: re vogaung: taung gaung shad' khyo jhui" thug' ye: mung: yao: re laug baui: yang pye' se' pye' ge,- ga" ru ngad: ra".
11 Yezre mae" gyezug: qe we' au: jhaung qe wa Yezebe nho: amyin" re kad' cao" ako".
12 Yao: bam wa zo:ve jao" nae" ba na daba ta" pyo mung: mo,byu qere khai: zhang" yu: ako". Amung: Nabod re nga: yhe' jo, qo mae nha: to" ako".
13 Ai: makhyang" ra" byu shid' yaug wa mo,byu qe qhid' kheim: mae Nabod re Mao"So re we' kho:kham pho" re nhang" ra"- ga: qobo zhaug' ako". Aimung: yao: re vogaung: taung gaung shad' khyo jhui" thug' lo" mung: laug baui: yang ye pye' se' pye' ako".
14 Nabod re se' pye' va" ga:- lau dao: Yezebe re pyang: ke' ako".
15 Yezebe wa ai: lau dao: re the' gyo: we' Ahab jhao" ye: mung:- Nabod shid va"- nao re maaung: byid: nug: ra" sabyi khyae re ana"- yesang: yu se,- ga: ta" ra".
16 Ai jao"- Ahab wa aire yesang: yu nae" qhid' mae" sabyi khyae khyo ye" lo" ra".
17 Ailao" Asang wa Tishbe mae" lapa Elia re-
18 Samari kho:kham Ahab jhao" ye: wa,- nao wa yao: re Nabod nho: sabyi khyae sang: yu nae" seim" na: rure yeqhug' li" nae".
19 Yao: re nao wa byu dayaug re bin: se' thao- yao" jo,nho" rere: sang: yu shinae" i? ga: ngo Asang yao: re ta" ra" ein: yao: re ta" kyo: wa,- lakha: jham Nabod nho: sa: re yo, zo" ra" jo, qo mae yao:- aijham wa ni" sa: rere: yo, zo" li" genae"- ga" ein: ngo ta" ra" ce dao: re yao: re ta" kyo: wa,- ga: ta" ra".
20 Ahab wa Elia re myao lao"- nga" gyevo pho" we"- nao ngore the' myao va" i? ga: ta" ra". Elia wa ngad:- ngo myao va"- nao wa Asang: qhid' kheim: mae shad' ra" mau" kad' nae" qhid' mae" nao yao" gaung re bin sho' ab: pye' ava".
21 Aimung: Asang wa nao re- ngo wa ni" dao mae qug: khai: kyi" khyag' ru boe" nhao nae"- ngo wa nao re yu: pye' mung:- angai aqi: re dakhyo: za: ni" yham khaung mae" yauggai qe yaug khao: ngo" rere: ngo yu: pye' nae".
22 Ni" yham khaung wa Nebad nho: yauggai zo: Yeroboam nho: yham khaung we' dakhyo:- Ahiya nho: yauggai zo: kho:kham Basha nho: yham khaung we' dakhyo: ngad: li" nae". Pe"mung:ga"re nao wa Israel byu qere qobo shad' lhoe" nhao: ra" khyo" yang ngore nhag' jam: yo: nhao: ava".
23 Asang wa Yezebe khyo we' sin: yang: yao" mao gaung re Yezre vogaung: mae lakha: jham zo" li" genae" ga: Asang ta" ra".
24 Ni" amyu" ba nam qe mae" vogaung: khug mae shid' ra" yaug re lakha: jham: yang zo" pye' li" genae". Amung: pa: din" mae shid: ra" yaug re wa lang da jham: yang zo" pye' li" genae"- ga: tau" ra".
25 (Yao" yham sang myhi" Yezebe yang jhan" ra" gu: alhab' re kad' ra" Ahab re" ru: Asang: qhid' kheim: mae shad' ra" mau" kad' nae" qhid' mae" yao: yao" gaung re bin sho' ab byid' pye' ra" byu gatau khag' mana qu" ngad: ra".
26 Israel byu qe qhid' au: khyo jhin" vao ye" lo" ko" au: ai: mung"dan: mae" Asang: yang khe' thug' pye' ra" Amori byu qe kad' ko" ru we' dakhyo: so alho jham re caung:pa" byid' ra" khyo" aqho' axag' boe" thao" ra" qobo jham re yao: shad' lhoe" pye' ra".)
27 Elia dao: bin jhau lao" Ahab wa yao" mai bau: jham re lao" cad' pye' mung:- aijham re khyad' pye' ra". Amung: jid: mo" mai bau: ve; ra". Yao: wa zo mazo: lo: jid: mo" mai bau: dao mae yab mung: myid myo: myid laug nhag' lam: ngai na: ra".
28 Asang wa lapa Elia re-
29 Ahab wa nga" qhid' kheim: mae yao: yao" gaung re khoru: nhag' lam: nyham: khyo" na: rure myao: i? Yao: ceru: kad' va" ruyang yao" apyad gyo: gu: mae yao" dao mae qug: khai: kyi" khyag' rure ngo maboe" nhao nae". Ahab nho: yham khaung dao mae ngo boe" nhao nae" ra" qug: khai: kyi" khyag' ru wa yao" yauggai zo" nho: pyad mae ngad: li" nae"- ga: ta" ra".