19
Sina Bam Dao Mae" Elia
1 Kho:kham Ahab wa Elia kad' ra" khyo alhab' we' Bala lapa qe alhab' re yao: khoru: se' pye' ra" khyo ja: khao: ngo" re yao" yham sang myhi" Yezebe re ta" kyo" ra".
2 Yezebe wa Elia re- ne, kao ce: ayo, mae nao: yang lapa qere kad' ruru: ngo makad' re wa so jham: yang ngore se' pye' vageshao:- ga: mungdao: vhin: ke' ra".
3 Elia wa gyaug mung: yao" kao so' loe, nae" phao: lo" ra". Yao" daui daui yaug re jhui: mung: Yuda mung" mae" Bersheba khyo ye" lo" ra".
Daui daui yaug re to: co' mung:-
4 Elia wa ba gyam sho' din"pyad' yo khyo su" ye" ra". Yao: wa gam" gyo" mung: sag' sham gae qao: mae gyo" zaung: ra". Yao: shid nug nug: ava". Asang we"- saung" yao: xo: kyi: va"- nga" kao so' re yu: pye' byid: la,- ngo wa shid: re lam: gai va" ga: akyu" mho' ra".
5 Yao: wa sag' gae qao: mae lang" jo, mung: yab: myhid' lo" byaug: ra" nyag din taung" mug: lagyo: dayaug yao: re li" tin: mung: to" mung: zozo: wa,- ga: ta" ra".
6 Yao: lhang qu" ke' re yao" au: nhae mae mug dakhai" we' qid dakang: jo; rure myao: ra". Yao: aire zo:- shaug' mung: dam: lang" jo; ra".
7 Asang: mug: lagyo: wa tug' lo mung: shid' lhang ein: lhang to" mung: zozo: wa,- ni" qhid' mae" gyaung: khyo gyai qhang nae"- ga: nhug' yang: ta" ra".
8 Elia wa to" mung: zo: shaug' ra". Zo: ve wa yao: re gyang" lho" bam ngad: ra" Sina bam khyo byid xe ba khyo qo " su: nae" qam: bo nhao: ra".
9 Ai mae yao: wa myi" re thang: na nae" qhid' mae" laug aug' dalam: khyo vao ye" ra". nyag din taung" Asang wa yao: re Elia we"- nao cemae pe" kad' na: i? ga: ta" ra".
10 Yao: wa qam: bo: thao" ra" Mao"So Asang we"- ngo wa nao dayaug re za: khonhae" re: caung da" byid: va"- ngadqere: Israel byu qe wa nao we' to" ra" dao: thang" re phyo' pye' avako". Ni" phan jham re phyo' pye' mung: ni" lapa qe alhab' rere: se' pye' avako". Ngo dayaug za: adang lo"- yao: bam wa ngore se' pye' nae" seim" na: ako"- ga: tau" ra".
11 Asang wa yao: re thug' li" mung: bam nyaug mae nga" qhid' kheim: mae li" ye; jo, wa,- ga: ta" ra". Ai: thao Asang wa lai: lo" mung: bug gaung jham re hug' kho' mung: laug bam jham re qo" hug' mhan" pye' ra" gyai thin: ra" la re nhao: ke' ra". Ngadqere: Asang wa la khug mae mabo ngad: ra" la hug' ru thang: lo" ra". Ailao"- myid lab: lab' li" ra". Ngadqere: Asang wa ai: myid lab: mae mabo ngad: ra".
12 Myid lab: lab: thao re myi: joe" lo: ra". Ngadqere: Asang wa myi:khug' mae mabo ngad: ra". Amung: myi: thao re nau" nhae" ra" dao: so' so' thoe thug' li" ra".
13 Elia wa aire the' gyo: lao"- yao" bau: qhang: yang yao" myo, khung: re nghoe' ci yang: thug' ye: mung: laug aug' nhad' mae ye ye; jo; ra". Thoe dathoe wa yao: re- Elia we"- cemae nao pe" kad' na: i? ga: ta" ra".
14 Yao: wa qam: bo: ra" Mao"So Asang we"- ngo wa nao dayaug re za: khonhae" re: caung da" byid: va"- ngadqere: Israel byu qe wa nao we' to" ra" dao: thang" re phyo' pye' avako" ni" phan jham re phyo' pye' mung: ni" lapa qe alhab' rere: se' pye' avako". Ngo dayaug za: adang lo"- yao: bam wa ngore se' pye' nae" seim" na: ako"- ga: tau" ra".
15 Asang wa Damasku nhae mae" din"pyad' yo khyo dam: tug' lo" wa,- vogaung: khyo vao ye: mung: Suri kho:kham khyo" Hazae re xau gyad byid: wa,.
16 Israel kho:kham khyo" Nimshi nho: yauggai zo: Yehu re xau gyad byid: wa,- amung: Abela Mehola mae" Shaphad nho: yauggai zo: Elisha re ni" khu mae xo' kad' nae" lapa khyo" xau gyad byid: wa,.
17 Hazae yang se' rumae" phao: loe; ra" yaug re Yehu yang se' pye' vashao:- Yehu lo, mae" phao: loe; ra: yaug re Elisha yang se' pye' li" nae".
18 Ngadqere: ngore jhaug' zaug: ra" mo,- bale re magoe; pa" ko" ra" mo,- Bala so alho re bobaug mabaug mo, ngad ko" ra" byu nhad' taung re ngo Israel mung" mae nha: to"- ga: ta" ra".
Elisha Re Khai: Yu: Ra" Khyo
19 Elia wa thug' lo" mung: nung: jaung lo: dazam" we' yophaug' na: ra" Elisha re yeqhug' ra". Yao" qhid' au: mae daxe: shid' zam" phaug' lo" mung: yao: wa lo" thao" zam" ngad: ra". Elia wa yao" bau: qhang re khyad' yu mung: Elisha re vhe' byid' ra".
20 Ai: thao Elisha wa yao" nung: lo: jham re to: co' yang: Elia thao cao" tao" ye: mung: nga" pho" re bobaug baug mung: nga" myhi" re lo" au: co' nhao la,- ailao" ngo nao we' daga" cao" nae"- ga: ta" ra". Elia wa- gai va"- tug' lo" wa,- nao re ngo matam"- ga: tau" ra".
21 Ailao" Elisha wa yao: nho: nung: lo: zam" jham khyo ye: mung: aijham re se' mung: nung: kyau: jham re wa myi: qhid' mae" thao: khyo" ci: mung: sho: re yhaung" ra". Yao: wa sho: re mo,byu qere byid: zho: mung: yao: bam aire zo" ako". Ai: thao re Elisha wa ye" lo" mung: Elia re bao" thaug' yaug khyo" yao" thao cao" ra".