17
Elia We' Mug: Maqu: Ra" Khyo
1 Gilead mung" Tishbe mae" Elia ga mang: ra" lapa dayaug wa kho:kham Ahab re- ngo caung da" byid' na: ra" kao so' daui: ra" Israel Mao"So Asang: mang mae- ngo dam: ta" ra" ayo, joe" sho' thao shid' we' sam zin gyo: mae nghin we' mug: maqu nae" ein: ra" khyo nao re ngo ta" li"- ga: ta" ra".
2 Ai: thao Asang wa Elia re-
3 Ce: jo, qo mae" thug' mung: ba thug' shad' khyo ye: yang: Yodan gyaung: ba thug' shad' mae yug: ra" Kherid gyaung: zo: nhae mae yevho' na wa,-
4 Gyaung: zo: wa nao re shaug' qid qo" nhao mung: aimae nao re zo:ve dai" zho: nae" qhid' mae" ngo wa kano, jham re amyin" byid' to: va"- ga: ta" ra".
5 Elia wa Asang amyin" dao: re mho dao: gyo: mung: yao: wa ye" lo" mung: Kherid gyaung: zo: nhae mae yena: ra".
6 Yao: wa qid zo: gyaung: mae" qid shaug' mung: kano, jham wa yao: re sho: we' mug jham dai" byid: yang: myi" xeim ne,xe: ba khao: ngo" zo" ra".
7 Mataung" myao" re mug: maqu yang: qid zo: gyaung: kin" lo" byaug: ra".
Elia We' Zarephad Mae" Cug' Mo" Myhi"
8 Ai: thao Asang wa Elia re-
9 Ana"- Sidon nhae mae" Zarephad vogaung: khyo ye: mung: aimae yena wa,- nao re zo:ve zho: nae" qhid' mae" aimae na: ra" cug' mo" myhi" dayaug re ngo amyin" byid' to: va"- ga: ta" ra".
10 Aimung: Elia wa Zarephad khyo ye" lo" ra". Yao: vogaung: kham: khyo joe" lo: au:- Thao: qho na: ra" cug' mo" myhi" dayaug re myao: ra". Elia wa yao: re ngore shaug' qid byid: jhaug' la,- ga: mho' ra".
11 Yao: qid lo" yu nae" lo" na: au:- Elia wa jeju khyo" mug re: dajhid' cili" byid: la,- ga: cao" ta" ke' ra".
12 Cug' mo" myhi" wa- kao so' daui: ra" ni" Mao"So Asang: mang re lao: yang: ngo mug dazhab' re: maqo" ra" khyo ngo jham tang" ra". Ngo wa khug' mae cin man" phaui: dazhab' we' yae: mae zhanlun xau dazo, za: aqo" lo"- ngo cekhyo li" mung: thao dajhid' qho: vin mung: yham khyo dam lo" yang:- ngo qo" ru dajhid' re ngo we' nga" yauggai zo" qhid' mae" lo" nyhang" nae". Airu wa lo" thao" myo: ngad nae". Ai: thao re nga" shid' ma: moe' kyaug' shid nae" ngad:- ga: tau" ra".
13 Elia wa yao: re- dagaung yug wa,- ni" zo:ve re lo" nyhang" wa,- nao qo" ra" gu: mae" sao qhid' mug khai" angai dakhai" shi" kad' mung: ngore cili" byid: la,- amung: dang: ra" gu: re nao we' ni" yauggai zo: qhid' mae" lo" kad' wa,-
14 Pe"mung:ga"re Israel nho: Mao"So Asang wa- Asang ngo mug: qu nhao: ra" ba na majoe" lo shire khug' mae" cin man" phaui: magan nae"- yae: mae" xau re: magan nae" ga: ceru: ta" ra"- ga: ta" ra".
15 Elia yao: re ta" va" ru we' dakhyo: cug' mo" myhi" airu: lo" kad' ra". Yao: bam alhab' mo, myo: sho' ba zo:ve qo" zo" ako".
16 Elia nhad' khyo" Asang dao:so: byid' to" ru we' dakhyo: khug' mae" cin man" phaui magan yae: mae" re: xau magan ngad: ra".
17 Ai: thao mataung" myao" re cug' mo" myhi" yauggai zo: no: li" ra". Yao: wa je: no: li" mung: lo" thao" mae shid: lo" ra".
18 Yao: wa Elia re- Mao"So: byu we"- nao ngore pe"mung: ceru: kad' i? Mao"So re ngo shad' ra" nga" qobo jham re ta" peim: nae" we' nga" yauggai zo: re shid: nhao: nae" qhid' mae nao cekhyo li" i? ga: ta" ra".
19 Elia wa ai: yauggai nau" ngore byid: la,- ga: ta" ra". Elia wa ai yauggai nau" re yao" lo, mae" vo; yu mung: yao: thang: na: ra" tho' pyae: qe, khyo vo; do; lo" yang: yab jaung: mae lo" lhang" to" ra".
20 Ailao" yao: wa thoe qi: we' o"- nga" Mao"So Asang we"- ce: cug' mo" myhi" re ceru" ra" qu" gyaug pho: sho' ru nao pe"mung: kad' i? Yao: wa ngore pe" maqo losho' caung: lo: ra" yaug ngad: ra". Ana" nao wa yao" yauggai zo: re se' pye' byid' ava" ga: akyu" mho' ra".
21 Ai: thao Elia wa yao" gaung re yauggai nau" dao mae sam lhang gam" nghoe' mung: o"- nga" Mao"So Asang we"- ce: zoshao re dam: daui: li" nhao: byid: la,- ga: akyu" mho' ra".
22 Asang wa Elia nho: akyu" mho' dao: re tae" gyo: byid' ra". Zoshao wa so' dam: she: li" mung: dam: daui: li" ra".
23 Elia wa ai: yauggai nau" re o: pyae yao: myhi" jhao" dam: jhui" gyo" lo byid: mung: yao: re qu" wa,- ni" yauggai zo: daui: ava"- ga: ta" ra".
24 Cug' mo" myhi" wa nao wa Mao"So: byu ngad: rure we' Asang wa ni" nhad' khyo" gaigai: yao: dao: jhau: rure ana" ngo ba va"- ga: tau" ra".