15
Yuda Kho:kham Abiya
(2 Km 13.1-14.1)
1 Israel kho:kham Yeroboam eib: ru daxe: she' zin ein: zin mae Abiya wa Yuda kho:kham boe" lo: ra".
2 Yao: wa Yerusalem mae sam zin eib: ra". Yao: myhi" wa Absalom nho: myiqe zo: Makha ngad: ra".
3 Yao: wa yao: pho" we' dakhyo: ai: qobo re yao: shad' lhoe" mung: yao: phug' Davi kad' lo: ru we' dakhyo: yao" Mao"So Asang re bin sho' jhaug' mazaug ngad: ra".
4 Ngadqere: Davi mathao mae yao" Mao"So Asang: yang Abiya re Yerusalem mae yao" thao kho:kham kad' nae" we' Yerusalem re gug: gam byid: nae" qhid' mae" yauggai zo: dayaug byid' ra".
5 Asang wa yao: re Davi bau: nhao: ra" lo,mau" mathao mae we' Hiti byu Uria nho: mau" zo" mae" je: yang: yao" amyin" dao: re daja: rere: maphug' cao" lo: makad' ruyang ceru: kad' ru ngad: ra".
6 Rehoboam we' Yeroboam boe" qhid: ra" gyekhe' poe wa Abiya nho: pyad jao: sho' xo' boe" ra".
7 Abiya nho: lo,mau" gatau ja: khao: ngo" re Yuda kho:kham qenho: mhomyi: paug' mae tung" xam" to" ako".
8 Abiya wa shid: lo" mung: Davi nho: vogaung: mae nyhab' pye' ako". Yao" yauggai zo: Asa wa yao" khu mae kho:kham xo' kad' ra".
Yuda Kho:kham Asa
(2 Km 15.16-16.6)
9 Israel kho:kham Yeroboam eib: ru shid' xe zin ein: zin mae Asa wa Yuda kho:kham boe" lo: ra".
10 Yao: wa Yerusalem vogaung: mae byid xe: dazin eib: ra". Yao: phyid' wa Absalom nho: myiqe: zo: Makha ngad: ra".
11 Asa wa yao" phug' pho" Davi kad' ru we' dakhyo: Asang re o ngaui nhao: ra" lo,mau" kad' ra".
12 Yao: wa tarha" taung bug so re caung:pa" ra" jo, qo jham mae caung da" byid' na ko" ra" shava pho"- shava myhi" jham alhab' mo, re mung"dan: mae" khe' thug' pye' ra". Amung: yao" qhid' au: mae" mo, kad' to: co' ko" ra" so alho alhab' re yu: pye' ra".
13 Yao: phyid' Makha re kho:kham myhi" nho: yao: myhi" aya: khyo" to" rumae" khyo" pye' byid' ra". Pe"mung:ga"re yao: wa myid xau gai byid' ra" maca' majhad' so myhi" Ashe alho re kad' to: yang: ngad: ra". Asa wa so alho jham re qam" khyo" pye' mung: Kidron lao: khaung: mae aijham re ngha" pye' ra".
14 Ngad sho' ngadqere: Asa wa tarha" taung bug so jham re caung:pa" byid' ra" jo, qo jham alhab' re maphyo' pye' ngad: ra". Yao" pyad geim" mae Asang re jhaug' zaug za: kao so' daui: lo: ra".
15 Yao: wa yao: pho" yang Mao"So re qhaug' byid' to" ra" zai alhab'- yao: yao: qhaug' byid' to" ra" ngaui we' qhang zai jham alhab' re Caung:pa" Yham mae yeke' to" ra".
16 Yuda kho:kham Asa we' Israel kho:kham Basha wa yao: shid' yaug kheim: so' qo" ko" ra" myhao" yao: cao: abang mabyid gye jho" khe' ako".
17 Basha wa Yuda mung" khyo khe' zin" jhin" vao ye: mung:- thug' lo" ra" khyodang re phyid' pye' nae" qhid' mae" Rama jo, qo mae gyetab yekad' to" ra".
18 Ailao"- kho:kham Asa wa Caung:pa" Yham mae we' kho:kham kho" mae dang: ra" ngaui we' qhang alhab' re yu: yu mung: yao" zug: daqhae: qe: lo, khyo" Hezion yao: myid:- Tabrimon nho: yauggai zo: Suri kho:kham- Benhadad jhao" ce: mungdao: we' daga" Damasku khyo vhin: ke' mung:-
19 Nga" shid' yaug: yao: pho" shid' yaug we' dakhyo: nga" shid' yaug myid vang" ba nam kad' lang:- ce: ngaui we' qhang jham wa ni" qhid' mae" jhaung qhu" ngad:- yao" gyezo: qere nga" mug: myid mae" yao: dam: jhui" yu nae" qhid' mae" Israel kho:kham Basha we' nao myid vang" ba nam jho" kad' to: ko" rure ana" phyo' pye' wa,- ga: ta" nhao: ke' ra".
20 Kho:kham Benhadad wa Asa ta" rure myid vang" mung: yao" gyezug: qe we' gyetab jham re Israel vogaung: jham re gyekhe' zin: nae" nhao: ke' ra". Yao: bam wa Iyon- Dan- Abel Bed Makha- vogaung: jham we' Galile tham: nhae mae" mug: myid jham- Nabhtali mug: myid geim" re sang: yu: ako".
21 Kho:kham Basha wa boe" ra" khyo re the' gyo: lao" Rama mae gyetab kad' na: rure thang: pye' mung: Tiza khyo ye" lo" ra".
22 Ai: thao Asa wa Yuda mung" geim" khyo jao: sho' yaug khao: ngo" cao" nae" amyin" dalam: khyo" ke' ra". Aiwa Rama jo, qo mae Basha gyetab kad' rumae ci: ra" laug baui jham- sag' the: jham re yetai: yu nae" amyin" ngad: ra". Ce: yham vo: jham we' Asa wa Mizpa we' Benyamin amyu" kaung: nho: mug: myid mae jo; ra" Geba vogaung: mae gyetab kad' ra".
23 Kho:kham Asa kad' ra" lo,mau" gatau- yao" mazag mavae ra" lo, mau"- vogaung: jham re gyetab kad' ra" khyo jham re Yuda kho:kham qe: mhomyi: paug' mae tung" xam" to" ako". Ngadqere: yao: mao" lo" yo, mae khyid mae no boe" yang khyid qeim: lo" ra".
24 Asa wa shid: lo" mung: Davi nho: vogaung: mae" kho:kham lab mae nyhab' pye' ako". Yao" yauggai zo: Yehoshaphad wa yao" khu mae kho:kham kad' ra".
Israel Kho:kham Nadab
25 Yuda kho:kham Asa eib: ru shid' zin ein: zin mae Yeroboam nho: yauggai zo: Nadab wa Israel kho:kham boe" lo mung: shid' zin eib: ra".
26 Yao" qhid' au: mae" yao: pho" ru: yao: wa Asang re qobo shad' lhoe" mung: Israel byu qere qobo kad' nhao: ra".
27 Isakha amyu" kaung mae" Ahiya nho: yauggai zo: Basha wa Nadab re gye kad' mung: Nadab we' yao" gyezo: qe Philisti mung" mae" Gibethon vogaung: re vang" ci: au: Nadab re se' pye' ra".
28 Ce wa Yuda kho:kham Asa eib: ru sam zin ein: zin mae boe" ru ngad: ra". Aimung: Basha wa Nadab nho: khu mae Israel kho:kham xo' kad' ra".
29 Yao: kho:kham do, we' dalhang: dae za: Yeroboam nho: yham khaung byu qe alhab' re se' pye' ra". Shilo mae" yao" daui daui yaug lapa Ahiya nho: nhad' khyo" Asang ta" to" rure cao" yang:- Yeroboam nho: yham khaung: byu qe alhab' se' pye' qhug' ako"- dayaug re madang loko" ngad: ra".
30 Ceru wa Yeroboam yao: shad' lhoe" ra" qobo we' yao" yang Israel byu qere qobo shad' nhao: ra" khyo" yang Israel Mao"So Asang re nhag' jam: yo: nhao mung: boe" ru ngad: ra".
31 Nadab kad' ra" lo, mau" gatau ja: khao: ngo" re Israel kho:kham qenho: mhomyi: paug' mae tung" xam" to" ako".
32 Yuda kho:kham Asa we' Israel kho:kham Basha wa yao: shid' yaug kheim: so' qo" ko" ra" myhao" yao: cao: abang mabyid gye jho" zin" ako".
Israel Kho:kham Basha
33 Yuda kho:kham Asa eib: ru sam zin ein: zin mae Ahiya nho: yauggai zo: Basha wa Israel mung" geim" nho: kho:kham boe" lo: ra". Yao: wa Tiza mae na mung: shid' xe: byid zin eib: ra".
34 Yao" qhid' au: mae" kho:kham Yeroboam re" ru: yao: wa- Asang re qobo shad' lhoe" mung: Israel byu qere shad' nhao: ra".