3
Israel Byu Qe Yodan Gyaung: Gau" De, Ko" Ru
1 Thao: ba ne, seim no'- Yoshu we' Israel byu qe alhab' mo, to" mung: Shithim jamu mae" to" ye: lo" ako". Yodan gyaung: khyo ye: lo" gemung: aire gau: nae" ye lao" na: ra" gyo: gu: mae ai tau mae jamu yekad' na: ako".
2 Sam ba thao re au: jhaung qe wa jamu jham jao: sho' khyo ye: mung: amyu" byu qere-
3 Naonhaung" Mao"So Asang: Dao: Thang" Ban" re khinjaung qe vo; ci rure myao gelao"- jamu mae" to" mung: yao: bam: thao cao" ye: ge,.
4 Cemae naonhaung" khonhae" re: majoe" qu" ko" ruyang naonhaung" ye" lo" nae" khyo re yao: bam shid' byid' li" genae". Ngadqere: Dao: Thang" Ban" khyo date' ye: ge,- aimae" khyo man: agaung: daqi" kyo yang: na ge,- ga: ta" ako".
5 Yoshu wa amyu" byu qere naonhaung" yao" gaung re: kyang" san: pye' ge,. Pe"mung:ga"re Mao"So wa ne, mo" ba naonhaung" phaung mae mug' pho" ve, lho kad' qhu" li" nae"- ga: ta" ra".
6 Ai: thao yao: wa khinjaung qere ai Dao: Thang" Ban" re gaug: vo, mung: ai we' daga" amyu" byu qe: qhid' au: mae ye" lo" genae" qhid' mae" ta" ra". Yao: bam wa yao: ta" ru we' dakhyo: kad' ako".
7 Asang wa Yoshu re- ngo ana" ba kad' nae" mau" zo" wa Israel byu alhab' mo, re byuqi: dayaug khyo" nao re nga: yhe' qhid nhao: li" nae". Aimung: ngo wa Moshe we' daga" na: lo: ru we' dakhyo: nao we' re: daga" na: rure yao: bam ba: li" genae".
8 Dao: Thang" Ban" vo; ci: ra" khinjaung qere- yao: bam qid gyaung: khyo joe" gelao"- yao: bam nag: vao ye: mung: qid yae mae yeye; jo, ca" ein: ta" wa,- ga: ta" ra".
9 Ai: thao Yoshu wa amyu" byu qere cekhyo lo mung: naonhaung" Mao"So Asang ta" rure tae" gyo: ge,.
10-11 Naonhaung" qhid' au: khyo jhin" ye" lo" ru we' dakhyo:- yao: wa Khanan Hiti- Hivi- Perizi- Girgashid- Amori we' Yebusi byu qere gaigai: yao: khe' thug' pye' li" nae". Myidgaung alhab' nho: Asang: Dao: Thang" Ban" wa naonhaung" qhid' au: mae Yodan gyaung: re gau" de, ye" lo" au: kao so' daui: ra" Mao"So wa naonhaung" phaung mae na: jo; rure naonhaung" ba: li" genae".
12 Ana" Israel byu amyu" kaung dalam: mae" dayaug yaug kad' yang: byu daxe: shid' yaug re khyin: yu ge,.
13 Myidgaung alhab' nho: Asang: Dao: Thang" Ban" re vo, ko" ra" khinjaung qe yao: bam: khyid qid mae yezab: ke' gelao". Yodan qid wa yug: ru thang: lo" li" nae"- yug: gyo" li" ra" qid wa dajo, qo mae za: dang: jo; li" nae"- ga: ta" ra".
14-15 Ai: ayo, wa gaug yad yo, ngad mung: qid gyaung: wa qid je" jo; ra".
Amyu" byu qe Yodan gyaung: re gau" de, nae" jamu mae" to" lo" gelao"- khinjaung qe wa ai: Dao: Thang" Ban" re vo; ci mung: yao: bam: qhid' au: mae ye" lo" ako". Khinjaung qe wa qid gyaung: mae yezab: ke' we'-
16 Qid yug: ru thang: lo" mung: Zarethan nhae mae" Adam vomo" joe" sho' dang: do, lo" byaug: ra". Tham: shid khyo yug: gyo" lo" ra" qid re: saug za: yug: byid: lo" byaug mung: amyu" byu qe wa Yerikho vogaung: ang khyo" qo" su" lai: ye" lo" ako".
17 Amyu" byu qe myid ho yo mae su" lai: ye" lo" na ko" au:- Asang: Dao: Thang: Ban" vo; ci ko" ra" khinjaung qe wa Yodan gyaung: agaung: myid ho yo mae amyu" byu qe alhab' mo, bin: lai: de; ye" gesho' ye; jo; ako".