10
Amori Byu Qere Khe' Aung: Pye' Ru
1 Yerusalem Ai kho:kham Adonizedeg Yerikho vogaung: re we' kho:kham kad' lo: ru we' dakhyo: Yoshu wa Ai: vogaung: re sang: yu: pye' mung: bin sho' phyo' pye' yang: kho:kham pho" re se' pye' rure the' gyo" ra". Yao: wa Gibeon byu qe Israel byu qe we' mang dae jho" tae" mung: yao: bam: phaung mae na: jo, ko" ra" thoe rere: the' gyo" ra".
2 Kho:kham zaung: ra" vogaung: jham mae" Gibeon vogaung: qhi" qi" ra" vogaung: dalam: re: majo; ruyang Yerusalem vobyu qe wa qi: sho' gyaug din: na: ako". Gibeon wa ai: vogaung: tho' je: qi: mung: aimae" byu qe wa gyekhe' sulhe: gai qe ngad: ako".
3 Airumung: Adonizedeg wa Hebron kho:kham Hoham- Yamud kho:kham Piram- Lakhi kho:kham yaphia- Eglon kho:kham Debi o mae" we' dakhyo: mungdao: vhin: ke' ra".
4 (Aiwa- Gibeon vogaung: re ngore gye li" bobao" zin: gela,- pe"mung:ga"re ai: vobyu qe wa Yoshu we' Israel byu qe we' mang: dae tae" to" avako"- ga" ru ngad: ra".)
5 Ai: Amori kho:kham ngo" zo: ngad ko" ra" Yerusalem- Hebron- Yamud- Lakhi- Eglon kho:kham jham wa- gyetab qhan: mung: Gibeon re li" vang: mung: aire gye zin" ako".
6 Gibeon byu qe wa Gigala jo, qo mae jamu kad' na: ra" Yoshu jhao"- lau: de, pho" we"- ngonhaung" re da shapye' to la,. Ana" jao" yao: ngonhaung" re li" bao" yu la,. Ngonhaung" re li" khyad' yu la, bam mug: mae na ko" ra" Amori kho:kham alhab' wa gyetab jho" qhan: mung: ngonhaung" re gye li" zin" avako" ga:- dao: pyang: ke' ra".
7 Ailao"- Yoshu we' yao" gyetab geim"- gai: thao" ra" gyezo: qe bobo mung: Gigala mae" to" ye" lo" ako".
8 Asang wa Yoshu re aibam re dagyaug wa,- ngo wa nao re aung doe; ru byid' to: gau ngad va". Yao: bam mae" dayaug re: nao re gye maqo" kad' genae"- ga: ta" ra".
9 Yoshu we' yao" gyezo: qe wa myi geim" Gigala mae" Gibeon khyo ye" lo" ako". Yao: bam wa Amori byu qere nyag din taung" gye yezin" ako".
10 Asang wa Amori byu qere Israel gyetab myao jao: mae byodin byosho: boe" nhao pye' ra" Israel byu qe wa Gibeon mae yao: bam re se' pye' mung: Bed Horon bam gyo: to' cao" yang: mug: thai: shad' Azeka we' Makeda joe" sho' xo' yang: cao" khe' zin" ako".
11 Amori byu qe Israel gyetab mae" bam gyo: khyo" tao" phao: gyo" lo" na ko" au: Asang wa Azeka khyo joe" sho' yao: bam: dao mae lagqu ce' qi: gyo" bam" byid' ra". Israel byu qe: lo, yang se' pye' qhug' mo, tho' lagqu: yang se' pye' qhug' mo, je: myo" ako".
12 Israel byu qere Asang: yang Amori byu qere aung doe; nhao: ra" ba na mae Yoshu wa Asang re dao: jhau: ra".
Yao: wa Israel byu qe: qhid' kheim: mae- ba we"- Gibeon dao mae thang: jo, wa
lho" we"- Aiyalon lao:khaung: dao mae thang: jo, wa- ga: ta" ra".
13 Ba wa thang: jo, mung: lho" wa amyu" byu qe gyevo qere aung: pye' sho' maqhui: ngad: ra". Cekhyo re Yasha nho: tung" paug' mae tung" to" ako". Ba wa mug:gaung: mae thang: jo, mung: ba geim" mavao ngad: ra".
14 Asang xao su byu: mho dao: re gyo: byid: yang:- airu" ra" ba na qhid' phyao: khonhae" re: majo; qu" aimae" thao phyao: khonhae" re: maboe" qu" ngad: ra". Asang wa Israel shad' mae gye bokhe' byid' ra".
15 Ceru thao Yoshu we' yao" gyezo: qe wa Gilgala jo, qo jamu khyo tug lo: ako".
Amori Kho:kham Ngo" Yaug Re Yoshu Taung" Yu: Ra" Khyo
16 Ngadqere: Amori kho:kham ngo" yaug wa phao: loe; lo" gemung:- Makeda laug khyaung mae vho' na: ako".
17 Yao: bam re byu dayaug: yang yemyao mung: yao: bam vho' jo; ra" jo, qo re Yoshu re lota" kyo" ra".
18 Ailao" Yoshu wa ai: laug khyaung nhad' mae laug zang qi: jham: yang lhang" jhid' to: wa, gug: gam daqhae: re nha: to: wa,-
19 Ngadqere: naoyao: wa aimae dana: jo, gyevo thao xo' yang: cao" khe' mung: nhaung thao" khyo" yao: bam re khe' zin: wa,- yao: bam: vogaung: jham khyo dajoe" nhao wa,- ni" Mao"So Asang wa nao re yao: bam re aung doe, nhao: ava"- ga: ta" ra".
20 Yoshu we' Israel byu wa yao: bam re se' pye' ako". Ngad sho' ngadqere: daqhae: wa yao: bam: vogaung: vang khug mae gug' vho' na: gemung: se' pye' ru maqhug' ko" ngad: ra".
21 Ai: thao Yoshu byu qe alhab' wa Makeda jo, qo mae" jamu khyo yao: jhao" pe" maqo lo: tug' phao: joe" lo: ako".
Ai: mung"dan: mae na mo, dayaug re: Israel byu qere qobo vhin: ra" dao: lhao" re: mavae" jhau ngad: ako".
22 Alao" Yoshu wa laug khyaung nhad' re phung" mung: ai: kho:kham ngo" zo: re ngojhao" jhui" lo geri:- ga: ta" ra".
23 Aimung: laug khyaung re phung" ke' yang: Yerusalem kho:kham- Hebron kho:kham- Yamud kho:kham- Lakhi kho:kham- Eglon kho:kham jham re jhui" thug' lo: mung: Yoshu jhao" jhui" lo: ako".
24 Ailao" Yoshu wa Israel byu alhab' re yao: jhao" khai: yu yang: yao: we' daga" bocao ko" ra" zug: qe alhab' li" genae" we' yao: bam: khyid re ai: kho:kham ngo" zo" nho: lang zang: mae zab genae" qhid' mae" amyin" byid' ra". Yao: bam airu: kad' ako".
25 Ai: thao Yoshu wa yao" zug: qere dagyaug ge,- byo dalae" ge, nhag' lam: myid qam: to' mung: lam lam na ge,- pe"mung:ga"re ceru wa naonhaung" gyevo jham alhab' re Asang kad' nae" ra" khyo ngad: ra"- ga: ta" ra".
26 Aimung: Yoshu wa kho:kham jham re se' pye' mung: sag' gae ngo" gae mae ai bam re lhao" to" ra". Yao: bam: maogaung wa aimae myi" thao" joe" sho' lao" jo; ako".
27 Ba vao yo, re Yoshu wa yao" bam: maogaung re yu: khyo" mung: azhao yao: bam vho' na ko" ra" laug khyaung mae yao: pye' zaui: pye' nae" amyin" byid' ra". Laug khyaung nhad' mae laug bam qi: zang jham lhang" to: mung: ana" ba joe" sho' yao: bam bo: jo; ako".
Amori Mug Myid Je: Myo: Sho' Yoshu Sang: Yu: Ra" Khyo
28 Yoshu wa ai ba na mae Makeda we' yao" kho:kham re gye zin: mung: sang: yu: pye' ra". Yao: wa ai: vogaung: mae na mo, yaug khao: ngo" re se' pye' ra" dayaug re: madang ngad: ako". Yao: wa Yerikho kho:kham re kad' lo: ra" khyo" Makeda kho:kham re kad' ra".
29 Ceru thao Yoshu we' yao" gyezo: qe wa- Makeda mae" Libna khyo xo' ye" lo" mung: aire gye yezin" ako".
30 Asang wa ce: vogaung: we' kho:kham rere: Israel byu qere aung doe; ru byid' ra". Yao: bam dayaug rere: matang" lo: aimae na mo, yaug khao: ngo" re se' pye' ako". Yao: bam wa Yerikho kho:kham re kad' lo: ra" khyo" ai: kho:kham re kad' ako".
31 Ceru thao- Yoshu we' yao" gyezo: qe wa Libna mae" Lakhi khyo xo' ye" lo" mung:- aire yevang: yang: gye yezin" ako".
32 Asang wa gyekhe' poe shid' ba ein: ba mae Israel qere Lakhi re aung doe; ru byid' ra". Yao: bam wa Libna mae kad' lo ko" ru we' dakhyo: khag' rere: matang" to: lo: ai vogaung: mae na mo, yaug khao: ngo" re se' pye' ako".
33 Geze kho:kham Horam wa Lakhi re bao" nae" joe" li" ra". Ngadqere: Yoshu wa yao: we' yao" gyetab re khe' aung: pye' mung: yao: bam mae" dayaug re: maloe, beim ko" ngad: ra".
34 Ai: thao Yoshu we' yao" gyezo: qe wa Lakhi mae" Eglon khyo xo' ye" lo" mung: aire yevang: mung: gye yezin" ako".
35 Yao: bam wa ai ba re yao: ai: vogaung: re sang: yu mung: Lakhi re yao: bam kad' Lai co' ru we' dakhyo: aimae" yaug khao: ngo" re se' pye' ako".
36 Ceru thao Yoshu we' yao" gyezo: qe wa Eglon mae" bam mug: Hebron khyo do, ye: mung: gye yezin: mung: sang: yu: pye' ako".
37 Yao: bam kho:kham pho" re we' vogaung: mae na mo, we' vogaung: nhae mae na mo, gaje yaug khao: ngo" rere: se' pye' ako". Yoshu wa Eglon re kad' lo: ru we' dakhyo:- ai: vogaung: re bin sho' phyo' sin" pye' nae" dao: phyid' ra". Aimae na mo, dayaug re: madang ngad: ako".
38 Alao" Yoshu we' yao" gyezo: qe wa Debi khyo tug' lo mung: aire gye lozin" ako".
39 Yao: wa ai: vogaung: re kho:kham re we' vogaung: nhae mae" mo, re sang: yu: pye' ra" yao: bam wa aimae yaug khao: ngo" re se' pye' ako". Yoshu wa Hebron Libna we' yao" kho:kham pho" re kad' lo: ra" khyo" Debi we' yao" kho:kham re kad' ra".
40 Yoshu wa mung" geim" re aung: pye' ra". Yao: wa bam mug:- ba thug' shad' to' zhaung- ba vao shad' bam khyid- ai: mung" nho: mug: thao shad' mug: kyaug' mang: khaung: mae" kho:kham qere khe' aung: pye' ra". Yao: wa dayaug re: matang" to: ngad: ra". yaug khao: ngo" re se' pye' ra". Ce wa Israel nho: Mao"So Asang byid' to" ra" amyin" ngad: ra".
41 Yoshu nho: gyekhe' du" lhau: ru wa mug: thao shad' Kade Barne mae" qid yae nhae mae" Gaza joe" sho'- Goshen mug:myid bobo mung:- mug: am: Gibeon joe" sho' ngad: ra".
42 Yoshu wa ai: kho:kham qe we' yao: bam: mug:myid re gye dalhang to" ye" rumae aung: pye' ra". Pe"mung:ga"re Israel nho: Mao"So Asang wa Israel qhid' mae" gyekhe' byid: yang: ngad: ra".
43 Ceru thao re Yoshu we' yao" gyezo: qe wa Gilgala jo, qo mae" jamu khyo tug' lo: ako".