7
Caung:pa" Yham Mae Yeremia Tarha" Kho" Ru
1-3 Asang wa ngore Yuda byu qe yevao: caung:pa" ko" ra" Caung:pa" Yham kyae" kham: khyo nhao: ke' ra". Yao: wa ngore ai: mae ye; jo,nhao mung: qam: so' bo: thao" ra" Asang Israel qenho: Mao"So: yang yao: bam re ta" ca" ru hau" kyo: nhao: ra". Naonhaung" na: ye; ra" ave, re tha" pye' ge, aimung: naonhaung" kad' na: rure re: lhai: ge,. Ailao" ngo naonhaung" re cemae xo' na nhao nae".
4 Ai: mhug' pyag' ra" dao: jham re dace: lam" na lo: ge,. Ngonhaung" gug: gam qo" na: bam- ce wa Asang: Caung:pa" Yham ngad:- ce wa Asang: Caung:pa" Yham ngad:- ce wa Asang: Caung:pa" Yham ngad: ga" ra" dao: re dalam" ge,.
5 Naonhaung" na: ye; ra" ave, re tha" pye' mung: naonhaung" kad' na: rure to" pye' ge,. Naonhaung" yao: cao: jho" zam" khug: rumae tarha" din: nyang: khyo" kad' ge,.
6 Taung bug byu bang" jham- cug' zonau" jham we' cug' mo" jham re akho: akhang" yu: mung: dadeim" zag zo: ge,. Ce: mug: myid mae qobo maqo" mo, re se' ru thang: pye' ge,- so phara" gaje re caung:pa" ru to" pye' ge,- pe"mung:ga"re airu: kad' ru wa naonhaung" re phyo' qheim" pye' li" nae".
7 Naonhaung" ave tha" gelao" ngo wa- naonhaung" phug' phyid' qere gyag maqhui: jo,nho" khyo" ngo byid' to" ra" ce: mug: myid mae naonhaung" re xo' na nhao nae".
8 Qu" ge,- naonhaung" wa mhug' pyag' ra" dao: jham re myid: lam: to" ako".
9 Naonhaung" wa- khug' ru- byuse' ru- myi: lao shad' ru- mhug' yang: jham tang" ru- Bala re xeim: ngaui" byid:- naonhaung" qhid' phyo: khonhae" re: maba: lo: ra" so alho jham re caung:pa" ako".
10 Naonhaung" wa- ngo nghang" ra" mau" cejham re kad' mung: ai: dao re nga" Caung:pa" Yham mae" nga" nho: qhid' kheim: mae li" ye; bam yang:- ngonhaung" gug: gam: na: bam: ga:- ta" ako".
11 Nga" nho: Caung:pa" Yham wa lhad' zo" ra" cang tau: qe: qhid' mae" vho' jo, qo ngad: ein: jho ko" i? Naonhaung" pe" kad' na ko" rure ngo the' myao byid: va".
12 Ngo re caung:pa" nae" qhid' mae" sao qhid' jo, qo khyo" ngo khyin: to" ra" Shilo khyo ye: mung: nga" byumyu" Israel kad' va" mau" zo" mathao mae aire ngo pe" kad' to" rure ye: qu" qu" ge,.
13 Naonhaung" wa- ce: qobo jham alhab' re shad' avako"- naonhaung" re ngo alhang lhang paug' ta" qere: naonhaung" manug: tae" gyo: ngad: ako". Naonhaung" re ngo khai: ra" au: naonhaung" matau: ngad: ako".
14 Aimung:- Shilo re ngo kad' co' ru we' dakhyo: naonhaung" myid: lam: ra" ce: nga" nho: Caung:pa" Yham re kad' na:- Shilo re ngo kad' co' ru we' dakhyo: yao: naonhaung" phug' phyid' qe we' naonhaung" re ngo byid' to" ra" ce: jo, qo mae re: kad' nae".
15 Ngo wa- naonhaung" ba nam sang: cao Israel qere khe' thug' pye' ru we' dakhyo: naonhaung" re nga" qhid' kheim: mae" khe' thug' pye' nae"- ngo Asang ta" to: va".
Mung" Byu Qe Maphug' Cao" Ru
16 Asang ta" ra"- Yeremia we"- ce: byumyu" qe: qhid' mae" akyu" damho' yao: bam: gaung tha" dahug' yao akyu" re: damho' ngore dace: mho' na:- nao re ngo tae" gyo: byid: nae" mangad:-
17 Yuda vomo" jham mae we' Yerusalem hau" mo" khyo jham mae yao: bam pe" kad' na ko" rure nao the' myao: i?
18 Zoshao qe wa thao: qho: zhang: ako". Yauggai qe wa myi: mad: ako". Aimung myiqe: qe wa- yao: bam: yang mug:gaung: kho:kham myhi" ga: mhang" ra" so myhi" re qhaug' ngaui" byid: nae" qhid' mae" mug cug' phad' nae" ga: cin man" lhag' ako". Yao: bam wa ngore myid no nhao nae" khyo" gatau: so jham rere:- sabyi qang: vhe' sheim: xeim: ngaui" byid' ako".
19 Ngadqere: gaigai: yao:- yao: bam myid no nhao ru wa ngore ngad: i? Mangad:- yao: bam yao: dae no: yu mung: qho' zai" phau" yu: ako".
20 Aimung:- ngo kho:kham Asang wa ce: Caung:pa" Yham dao khyo nga" nho: gyaug pho: nhag' yo" re vhe' sheim" ke' nae". Ngo wa ai: nhag' yo" re- vobyu qe we' gug'nyhug' jham: dao khyo vhe' sheim" ke' nae". Aimung: sag' gae jham we' qhovo: qhoshi: jham: dao khyo lao" re: vhe' sheim" ke' nae". Nga" nhag' yo" ru wa- khag' yang maqo" se' pye' ra" myi: we' dau nae".
21 Nga" byumyu" qe we"- naonhaung" wa ngaui" xeim: damyo" gu: re phan mae bin sho' phad' ngha" ako". Aimung: damyo" gu: re wa naonhaung" zo: nae" akhang" byid' to: va". Ngadqere: ngo Asang ta" nug: ru wa- naonhaung" aigu: alhab' re zo" pye' ge,.
22 Ngo wa naonhaung" phug' phyid' qere- Egutu mae" ngo jhui" phao: thug' lo: au:- phad' ngaui" xeim: jham we' sin: yang: re: mangad: lao"- gatau: ngaui" xeim: jham we' sin: yang: re: pe" amyin" mabyid' to: co'-
23 Ngadqere:- ngo wa yao: bam: Mao"So boe" mung: yao bam wa nga" byumyu" doe, genae" qhid' mae" ngore phug' cao" nae" qhid' mae" kam" wa yao: bam re ngo amyin" byid' to: va". Aimung: yao: bam: qhid' mae" na gai ye, gai genae" qhid' mae"- yao: bam re ngo amyin" byid' to" ra" khyo" na genae" khyo" ngo ta" to: va".
24 Ngadqere: yao: bam wa maphug' cao" tae" re: matae" gyo: ngad: ako". Ai: atha" yao: bam wa- yao: bam: sang dang: ru we' makhyang" ra" nhag' lam: jham: yang yao: bam re kad' nhao: ra" khyo" pe" ngad ngad kad' mung: yao: bam wa je: gai: li" nae" atha" je: magai lo: dae xo: lo" ako".
25 Naonhaung" nho: phug' phyid' qe Egutu mae" phao: thug' lo: ra" ba na mae" ce: ana" ba joe" sho' yao:- ngo wa naonhaung" jhao" nga" nho: daui nhao o: kaung lapa qere nhao: ke' byid: va".
26 Ngadqere: khag' matae" gyo: pe" xan: re: masun: byid: ngad: ako". Ai: atha" naonhaung" wa naonhaung" phug' phyid' bam tho' je: nhag' lam: qao mung: je: tau: lhan: myid bo: li" ako".
27 Aimung: Yeremia we"- nao wa nga" byumyu" qere ce: dao: kheim: alhab' re ta" kyo: ca" li" nae". Ngadqere:- yao: bam wa nao re tae" gyo: genae" mangad: nao wa yao: bam re yao: li" nae"- ngadqere: yao: bam tau: genae" mangad:.
28 Nao wa yao: bam re- yao: bam: byumyu" wa yao: bam: Asang Mao"So ngore maphug' cao" gengad: ako" ein: ta" kyo: ca" nae"- mangad: lao" yao: bam: nho qobo dae mae" mho" yu: li" genae" ein: ta" kyo: ca" nae". Jhaug' zaug: ru wa shid: byaug va"- ai: khyo re ta" lao" khag' mata" lo:ngad: ako".
Hinon Lao:khaung: Mae" Qobo Mau" Zo" Jham
29 Yerusalem mae" vobyu qe we"-
kaug' ngug ge, naonhaung" xae re lhai" phyid' pye' mung: shapye' pye' ge,.
Bug gaung au: mae sushid ngug ji: doe, ge,.
Pe"mung:ga"re- ngo Asang nhag' yo: mung: nga" byumyu" re shalhaui" pye' va".
30 Yuda mung" byu qe wa makhyang: mashab: ru daja: kad' avako". Yao: bam wa ngo nghang" ra" solho jham re nga" nho: Caung:pa" Yham mae to: mung: aire masan masin" boe" nhao: avako".
31 Hinon Lao:khaung: mae- yao: bam wa yao: bam: yauggai zo:- myiqe: zo: qere myi: mae phad' ngaui" nae" qhid' mae" Tophed ga: mang: ra" phan daphan zhaug' to" ako". Ngo wa yao: bam re ceru: makad' nhao airu wa nga" nhag' lam: khug mae bo lao" mabo-
32 Aimung: ai: rure Tophed ga: re mamang Hinon Lao:khaung: ga: re: mamang lo: Byu Se' Lao:khaung: ga: mhang" ra" ayo, joe" lo: li" nae". Yao: bam wa gatau khokhyi" re: sushid nyab' nae" jo, qo majo, mung: ai: jo, qo mae sushid nyhab' li" genae".
33 Sushid mao gaung jham wa- ngho' jham we' seyo: gug'nyhug' jham: qhid' mae" zo:ve boe" mung:- ai: jham re khe' pye' nae" byu khag' mana genae".
34 Ai: mug: myid wa- din"pyad' yo boe" lo: li" nae". Yuda vomo" jham: khug mae we' Yerusalem mae" hau" mo" khyo jham mae ngaui bau: ngaui lho" ra" thoe jham re ngoyang tae" byaug nhao mung: lo,xo' poe jham mae" ngaui bau: thoe jham re thao" byaug nhao nae".