5
Yerusalem Nho: Qobo
1 Yerusalem vobyu qe we"- naonhaung" hau" mo" khyo cao" yang tao" phao ge,.
Avai: ayae khyo lhang: qu" ke' ge,- naonhaung" yao: qu" myao: yu ge,-
gai jao: khaung: mae qho: qu" ge,- jo: ru kad' mung: Mao"So re jhaug' zaug nae" qam: ke' ru dayaug re qo" the' myao ko" i?
Naonhaung" qo" the' myao: ngad: re Asang wa Yerusalem re qobo khyad' byid' li" nae".
2 Naonhaung" wa- Asang re caung:pa" ga: phug: ta" hau: ngadqere:-
naonhaung" ta" ru we' kad' ru mazhaung: ngad: ako".
3 Gaigai: yao:- Asang wa jhaug' zaug: rure qho: ra".
Yao: wa naonhaung" re be; ra" ngadqere: naonhaung" wa pe" xan: maseim" byid: ngad: ako". Yao: wa naonhaung" re phyo' pye' ra".
Ngadqere: naonhaung" wa mho" zhao: yu nae" maqad ngad: ako".
Naonhaung" wa sang: dang nhag' lam: qao mung: naonhaung" qobo jham mae" manug: phaug' lo ngad: ako".
4 Ailao" ngo ceru: qhug' myid: cebam wa myaung: mo, we' pe" maba mo, za: angad:- yao: bam wa ako" asho: kad' ako".
Yao: bam wa yao: bam: Mao"So pe" mho' rure maba ngad: ako".
Yao: bam re Asang kad' nhao nug: rure maba ngad: ako".
5 Ngo wa kheim: so' qo" ra" byumyu" jhao" ye: mung: yao: bam we' yejho" jhau nae".
Gaigai: yao:- yao: bam wa yao: bam: Mao"So mho' ra" ja: re ba: ako".
Asang: yang yao: bam re kad' nhao nug: rure ba: ako" ein: qhug' myid:.
Ngadqere: yao: bam alhab' Asang: kheim: so' re ngag: pye' mung: yao: re manug: phug' cao" ngad: ako".
6 Aimung: seyo mae" khang khyi wa yao: bam re se' pye' li" nae"- din"pyad' yo mae" zag nae jham wa yao: bam re adau dau bin" phyo' cad' pye' li" genae".
Aimung: nin tin jham wa yao: bam: vogaung: jham mae qho zo" lae" qin" li" genae".
Ai: byumyu" qe su" thug' lo" ko" re yao: bam phyo' cad' pye' qhug' genae".
Pe"mung:ga"re yao: bam: qobo jham wa abam azao myo: mung: dalhang bin dalhang yao: bam wa Mao"So mae" phaug' lo" ako".
7 Asang wa- ngo wa pe"mung: nga" byumyu" qenho: qobo jham re khyad' byid: gai nae" i?
Yao: bam wa ngore shapye' to: co' mung: gaigai: mangad' ra" so jham re caung:pa" avako".
Ngo wa nga" byumyu" qere yao: bam gyi: sho' zho: jhaug' va".
Ngadqere: yao: bam wa myi: shad' mung: yao: bam: ayo, re shava myhi" qe we' na: pye' ako".
8 Yao: bam wa gyi: gyi: baug baug zho: mung: khau: to" ra" myao: lo: jham we' dau gemung:
yaug khao: ngo" wa yao: yao" yham kyo" nho: yham sang myhi" qere qu" shab' ako".
9 Ngo wa ce: mau" jham: mathao mae yao: bam re qobo dae mabyid: gai i?
Ceru" ra" byumyu" re dae phaug' nae" maang magai i?
10 Ngo wa gyevo qere nhao: ke' mung: nga" byumyu" qenho: sabyi yo jham re zin" pye' nhao nae".
Ngadqere: yao: bam re bin sho' wa maphyo' qheim" nhao nae".
Ngo wa yao: bam re akaung jham cu: pye' nae" qhid' mae" ta" nae".
Pe"mung:ga"re- ai: akaung jham wa nga" mae" mangad: ngad: ako".
11 Israel byumyu" qe we' Yuda byumyu" qe wa ngore bin sho' gye kad' avako".
Ngo Asang ta" to: va"- ga: myid' ra".
Israel Re Asang Ngag: Pye' Ra" Khyo
12 Asang: byumyu" qe wa yao: re ha: pye' mung: ceru ta" ako". Yao: wa gaigai: yao: pe" re: makad' nae". Ngonhaung" qug: khai: qhug' nae" mangad: ngonhaung" wa mang: zin" rure: bao" khug' khug' rure: qhug' nae" mangad: ga: ta" avako".
13-14 Yao: bam wa lapa qe wa pe" mangad: la am za: angad: ako". Aimung: yao: bam mae Asang mae" pe" lau dao: maqo" ngad: ako"- ga: ta" avako". Kheim so' qam: qi" ra" Asang Mao"So wa ngore Yeremia we"- ce: byumyu" qe wa ni" dao: jham re ta" ko" rumung:- ngo wa nga" nho: dao: kheim: jham re ni" nho: nhad' mae myi: we' dakhyo: boe" nhao nae". Ai: byumyu" qe wa thao: we' dau mung: myi: wa- yao: bam re nga" pye' li" nae"- ga: ta" ra".
15 Israel byumyu" qe we"- Asang wa naonhaung" re khe' zin: nae" qhid' mae" mug: va: mae" byumyu" damyu" re jhui" lo: li" naeva". Ai: byumyu" wa qam: bo mung: yao: bam: myan" re naonhaung" maba: gyo" ra" ganhae" gaco' mae" byumyu" damyu" ngad: ako".
16 Yao: bam: lo, la: ci mo, wa nhag' makhyag' lasho' byu se' ra" qam: bo: ra" gyezo: qe ngad: ako".
17 Yao: bam wa naonhaung" qhovo: jham we' zo:ve jham re lhad' zo" pye' li" genae". Yao: bam wa naonhaung" yauggai zo: qe we' myiqe: zo: qere se' pye' li" genae". Yao: bam wa naonhaung" cad'- yao kyaung" jham we' nung: kyaung" jham re se' pye' mung: naonhaung" sabyi naui jham we' pho' ham" gae jham re phyo' qheim" pye' byid' li" genae". Naonhaung" lam khug: na: ra" gyetab vomo" jham wa- yao: bam: gyetab: yang phyo' qheim" pye' ru qhug' li" genae".
18 Asang wa- ai: ba na gu: mae lhao" re: ngo wa nga" nho: byumyu" qere bin sho' maphyo' qheim" pye' nae".
19 Yeremia we"- ngo pe"mung: cegu: re kad' laug i? ga: yao: bam myid' lo ko" re yao: bam re ceru: ein: ta" kyo: wa,. Yao: bam ngo mae" phaug' lo" mung: yao: bam yao" mug: mae taung bug: so jham re caung: da" byid: ko" ru we' dakhyo:- yao: bam wa yao: bam yao" mug: mangad' rumae- bang" vo qere caung da" byid: ca" genae" ein: ta" kyo: wa,- ga: ta" ra".
Mao"So Yao" Byumyu" Qere Ta" Peim" Ra" Khyo
20 Asang wa- Yaku nho: myid:zo: qere ta" kyo: wa,- Yuda byumyu" qere ta" kyo: wa,
21 Myo,jid' de, qere: mathe' myao: no: khye' de, qere: mathe' gyo: ko" ra" kopyad' we' atug' akhyug' mung: ra" byumyu" naonhaung" we"- nyang" za: tae" gyo: ge,.
22 Ngo wa Asang ngad: naonhaung" ngore pe"mung: magyaug ko" i? nga" qhid' kheim: mae pe"mung: naonhaung" ko, ko, ma nin" ko" i? Ngo wa panglai: nho: mug: kyo: khyo" ma dam: re to" to: byid: va". Aiwa maqo" gai lai: phyid' ye" ra" gyag maqui: ra" mug: kyo: ngad: ra". Pang:lai:: qid bug jham to" re to" nae" ngadqere: ai wa- ai: mug: kyo: mae" maqo" lai ngad: ra". Bang: lhung" jham myang: re myang genae" ngadqere: aijham wa maqo" lai phyid' genae".
23 Ngadqere: byu naonhaung" we" naonhaung" wa nhag' lam: qao mung: tau: lhan: myid bo: ako". Naonhaung" wa khyothaung" vao mung: ngore to: co' ako".
24 Naonhaung" wa ngo: yang naonhaung" qhid' mae" byao gin mae" la jham: mug: we' xaung: thug' qid mug: qu nhao mung: zin khao: ngo" gaug yad yo, byid: ngad sho' ngadqere: ngore nga: yhe' nae" ga: khonhae" re: mamyid ngad: ako".
25 Ai: atha" naonhaung" qobo jham: yang ce: gai: ru jham re tam" pye' byid' ako".
26 Makhyang: mashab: ra" byu qe wa nga" nho: byumyu" qe: phaung gaung: mae bo: na: bam: ako". Yao: bam wa ngho' jham re taung: nae" qhid' mae" yao: bam: geim re myhung" to: mo, we' dakhyo: gug' lham: na: ako". Ngadqere: yao: bam wa byu qere kung" yu nae" qhid' mae" yao: bam: lha" jham re thaung: to" ako".
27 Mug khyu wa yao" kyam: khug mae ngho' jham byang" sho' ke' ci: ru we' dakhyo:- yao: bam wa yao: bam: yham jham: khug mae lanyab zai byang" sho' ke' to" ako". Ceru: mung: yao: bam wa qam: so' qi: mung: jo,nho" qo" ako".
28 Aimung: yao: bam wa xau: ru we' zo: shaug' nyang" qo" zo" ako". Yao: bam: makhyang" mashab: ra" mau" jham wa thao" ga: ru majo, ngad: ako". Yao: bam wa cug' zonau" qere yao: bam: akho: akhang" mabyid: lo: zag zo: qhug' mo, re tarha" din: nyang: ru maqhu" byid: ngad: ako".
29 Ngadqere: ngo Asang wa ce: ra" qhid' mae" yao: bam re qobo dae byid: nae". Ngo wa ce: byumyu" dao mae lage, phaug' nae".
30 Ai: mug: myid mae gyai gyaug pho: we' din: mug' pho: jham boe" lo va".
31 Lapa qe wa mhug' dao: za: ta" thug' ako". Khinjaung qe wa lapa qe amyin" byid' ra" khyo" eib: ako". Aimung: nga" byumyu" qe wa pe" dakheim: mangag ngad: ako". Ngadqere: cegu: alhab' lo" thao" gan: byaug: re yao: bam pe" kad' li" genae" i?