43
Yeremia Re Egutu Mung" Khyo Jhui" Lo" Ru
1 Yao: bam: Asang Mao"So: yang yao: bam re ta" nae" ngore nhao: ke' ru ngad: ra" khyo ja: khao: ngo" re amyu" byu qere ta" kyo" ra" khyo re ngo pin" pye' ra".
2 Ailao"- Hoshaia nho: yauggai zo: Azaria- Karea nho: yauggai zo: Yohanan we' gatau ngad beim" ra" byu gaje alhab' wa ngore- nao mhug' na: ra". Ngonhaung" re Egutu mung" mae maye: na nae" qhid' mae" ngonhaung" re ta" nae" ngonhaung" Mao"So Asang nao re manhao: ke' ngad: ra".
3 Babelon byu qe ngonhaung" re qo" eib: pye' mung: ngonhaung" re qo" se' pye' nae" mangad: lao"- Babelon khyo qo" jhui" lo" nae" qhid' mae" Neria nho: yauggai zo: Barug yang ngonhaung" re gye kad' sho' nao re lhau: zhung" ke' ava"- ga: ta" ako".
4 Airumung: Yuda mung" mae na: dang: jo, nae" ta" ra" Asang: amyin" dao: re Yohanan re:- gyezug: dayaug re:- mo,byu dayaug re: mho dao: manug: tae" gyo: ngad: ako".
5 Airumung: Yohanan we' gyezug: qe wa yaug khao: ngo" re jhui" yu mung:- na: sin" jo; ra" yauggai- myiqe:- zoshao: qe we' kho:kham nho: myiqe: zo: qe- mung"dan: jham mae" dam: tug' lo ko" ra" byu qe alhab' we' daga" Yuda mae" Egutu khyo to" lo" ako".
6 Yao: bam wa Barug we' ngo bobo mung: gyezug: pho" Nebuzaradan yang Gedalia nho: gun caung: ra" qao: mae nha: to" ra" mo, yaug khao: ngo" re jhui" yu: ako".
7 Yao: bam wa Asang: amyin" dao: jham re mho dao: matae" gyo: mung: Egutu mung" khyo vao ye: mung: Taphanhe vogaung: joe" sho' lo" ako".
8 Aimae Asang wa ngore-
9 Laug baui qi: damyo" re gaug: yu yang: aijham re zhogam: myhung" to" ra" khyodang ce: vogaung: mae jo; ra" Asuya yham khyo vao ye" ra" kham: dung: qhid' kheim: mae aijham re nyhab' wa,- nao airu: kad' rure Israel byu daqhae: re myao nhao wa,-
10 Ai: thao yao: bam re Israel nho: Mao"So qam: bo: ra" Asang ngo wa- nga" daui daui yaug Babelon kho:kham Nebugkhaneza re ce: jo, qo khyo ngo jhui" lo nae". Yao: wa nao ce laug bam nyhab' to" ra" jo, qo dao mae yao" kho:kham tao" re lo to" li" nae". Amung: ai: dao mae kho:kham zaung lophyid: nghoe' to" li" nae".
11 Nebugkhaneza wa joe" li" mung: Egutu re li" aung: pye' li" nae". No boe" yang: shid nae" yaug wa no boe" yang: shid: li" nae". Thaung: byu qekhyo" jhui" lo" qhug' nae" mo, wa kyam: byu khyo" jhui" lo" ru qhug' li" nae". Gye poe mae se' pye' qhug' nae" yaug wa gye poe mae se' pye' qhug' li" nae".
12 Ngo wa Egutu nho: so jham: Caung:pa" Yham re myi: ngha" pye' nae". Babelon kho:kham wa yao: bam: so jham re- ngha" pye' re ngha" pye' nae". Mangad: lao" aijham re tai: lo" li" nae". Yao lhaug' yaug yao" mai bau: re gaug: yu yang shin: phyu jham re taung" pye' ru we' dakhyo: Babelon kho:kham wa Egutu mung" re gaug: yu yang: ko: pye' mung: aung: yu: pye' li" nae".
13 Yao: wa Egutu mung" mae jo; ra" Heliopoli mae" gyang" lho" ra" laug aso: daung" zang jham re phyo' qheim" pye' mung:- Egutu so jham: Caung:pa" Yham jham re ngha" pye' li" nae" ga: ta" rure yao: bam re ta" kyo: wa,- ga: ta" ra".