39
Yerusalem Gyo" Seim" Lo" Ra" Khyo
1 Zedekia Yuda kho:kham kad' ru gug zin ein: zin lho" daxe khye' ein: khye' Babelon kho:kham Nebugkhaneza wa yao" gyetab alhab' we' joe" li" mung: Yerusalem re gye li" khe' ra".
2 Zedekia kho:kham khyo" eib: ru daxe: dazin ein: zin- lho" byid khye' ein: khye' gug ba: ba mae vogaung: vang jham byo; gyo" lo" byaug: ra".
3 (Yerusalem re aung: yu: pye' lao"- Babelon kho:kham nho: aya: qi" ra" gyezug: qe alhab' joe" li" mung: Nerga Shareze- Samga- Nebo- Sarsekhim we' gatau Nerga Shareze bobo mung: agaung: kham mae yao: bam jo, qo yu: ako".)
4 Kho:kham Zedekia we' yao" gyezo: qe wa pe" boe" na: rure the' myao mung: yao: bam wa myi" ayo, mae vogaung: mae" phao: thug' nae" seim" ako". Yao: bam wa kho:kham khyae gau: khyo" thug' lo" mung: vang shid' lam: jho" xo' to" ra" kham: dung: khyo" lai: thug' lo" mung: Yodan lao: khaung: shad' khyo phao loe; lo" ako".
5 Ngadqere: Babelon gyezo: qe yao: bam: thao cao" khe' mung: Yerikho nhae mae" pa" din" mae Zedekia re the' taung" yu: ako". Ailao" yao: bam wa yao: re Hamad mug: myid mae" Ribla vogaung: mae na: ra" kho:kham Nebugkhaneza jhao" jhui" ye" lo" ako". Amung: Nebugkhaneza wa yao: re dao: kho' ra".
6 Yao: wa Ribla jo, qo mae Zedekia nho: myo, de: mae yao: se' pye' ra". Yao: wa Yuda gyezug: qere re: se' pye' ra".
7 Ai: thao re- yao: wa Zedekia nho: myo,jid' re thad' pye' byid: mung: Babelon khyo jhui" lo" nae" qhid' mae" jao co: vhe' to" ra".
8 Ai: au: re Babelon byuqe wa kho:kham kho" re we' mang byu yham jham re ngha" pye' mung: Yerusalem vang jham re phyo' khyo" pye' ra".
9 Lo" thao" mae gyezug: pho" Nebuzaradan wa yao: jhao" lo phao: na ko" ra" mo, we' daga"- kyam: byu khyo" Babelon khyo jhui" lo" nae" vogaung: mae na dang: ra" mo, re jhui" lo" ra".
10 Yao: wa Yuda mung" mae pe" maqo" ra" mo, myaung: thao" ra" mo, daqhae: re nha: to: co' mung: yao: wa yao: bam re sabyi khyae jham we' yothaung: jham re byid: co' ra".
Yeremia Re Lhoe' Ke' Ru
11 Ngadqere: Nebugkhaneza wa gyezug: pho" Nebuzaradan re o mae tung" to" ra" amyin" re byid' ke' ra". Aiwa-
12 Yeremia re yeqho mung: yao: re nyang" za: gun caung byid: wa,- yao: re pe" dae date' yao: o: rure pe" ja: rere: kam" wa kad' byid: wa,- ga" ru ngad: ra".
13 Aimung: Nebuzaradan- aya: qi" ra" gyezug: qe ngad: ra" Nebushazban- Nerga- Shareze we' Babelon gyezug: gaje qe alhab' bam wa- kho:kham vang" khug mae" yao: re li" jhui" yu: ako".
14 Yao: bam wa ngore Shaphan nho: yao: myid:- Ahikam nho: yauggai zo: Gedalia yang gun caung: ra" qao: mae nha: to" ako". Ai: yaug wa ngo yham khyo gug: gug: za: joe" lo" rure qu" nae" yaug ngad: ra". Amung: ngo wa aimae mo, byu qe: phaung mae na: jo; ra".
Ebedmeleg Re Myid: Lao" Ru
15 Kho:kham vang" khug mae ngo thaung: laung" na: jo,shi" au: Asang wa-
16 Qam: bo: ra" Israel nho: Mao"So Asang wa Ethiopia byu Ebedmeleg re ta" nae" qhid' mae" ngore ta" ra". Ai: Asang wa ngo ta" rure ngo kad' va" ru we' dakhyo:- byumyu" nho: jo,nho" re mangad:- ce: vogaung: re phyo' qheim" pye' nae". Ceru: boe" lao"- aire the' myao nae" nao na ca" li" nae".
17 Ngadqere: Asang ngo wa nao re gug: gam byid: nae". Nao gyaug: na: ra" mo; lo, mae" ngo nao re ma ab byid: nae".
18 Ngo wa nao re gug: gug: za: na nhao nae". Amung: nao se' pye' ru maqhug' nae". Nao ngore lam khug: na: ruyang ni" kao so' we' nao phao: loe, nae". Asang ngo ta" to: va".