31
Israel Yham Khyo Dam Tug' Lo: Ru
1 Asang wa ngo wa Israel byumyu kaung jham alhab' nho: Mao"So boe" li" mung: yao: bam wa nga" byumyu" boe" li" genae" ra" ayo, joe" lo: na: ra".
2 Shid: rumae" loe, mo, re din"pyad' yo mae ngo nhag' khyag' shogu: ru qhu" byid' ra"- Israel byu qe myaung: ngho: nae" rure myid gelao"-
3 Va" ra" jo, qo mae" ngo wa yao: bam re yena: qhu" va". Israel byu qe we"- ngo naonhaung" re khonhae" re: jhid'de; lo: ra". Aimung: ngo wa xo' yang: nga" mabaui mabyo; ra" jhid'de myid naonhaung" re qhu" byid' ra".
4 Naonhaung" re ngo dalhang dam: zao: to' nae". Naonhaung" wa dalhang dam: naonhaung" lo, be, jhu jao kheim" re gaug: yu: yang: ngaui bau: taung" go" li" genae".
5 Naonhaung" wa Samari bug gaung jham mae sabyi khyae dalhang dam: qho: mung: aijham re qho" ra" mo, wa sabyi khyae mae" zaui" ra" ashi: re qhug' zo" li" genae".
6 Ngad va"- lhaug' mo, wa Ephrim bug gaung jham mae"- Ziun khyo do, ye: gelang:- ngonhaung" Mao"So Asang jhao" do, ye: gelang: ga: yao: ke' ra" ayo, joe" lo: li" nae"- ga: ta" ra".
7 Asang wa- byumyu" qe: nho: qi" qhang: thao" ra" Israel mathao mae ngaui bau: nghaui"caung: ge,. Naonhaung" nho: nghaui"caung: khin" ge,- Asang wa yao" byumyu" re khyad' yu: ava". Yao: wa dang: ra" mo, alhab' re khyad' yu: ava".
8 Mug: am: shad' mae" yao: bam re ngo jhui" lo mung: mug: thao" myid thao" mae" ngo yao: bam re zhang: yu nae". Myo, jid we' khyid qeim- gaung la: mo, we' zo:khau nae" jhao" mo, wa yao: bam we' daga" joe" lo: li" genae". Yao: bam wa byumyu" qi: khyo" tug' lo: li" genae".
9 Nga" byu qe wa ngo yao: bam re jhui" tug' lo: au:- ngug byid gyo" yang: akyu" mho' yang: tug' lo: li" genae". Ngo wa yao: bam re qid gyaung: zo: khyo- yao: bam khyid au: mathe' thaung" ra" khyo jhad' khyo jhui" ye: nae". Ngo wa Israel nho: yao: pho" we' dakhyo: ngad mung:- Ephrim wa nga" zoqhid' yauggai zo: ngad: ra"- ga: ta" ra".
10 Asang wa- byumyu qe we"- nga" dao: re tae" gyo: ge,- nga" mungdao: jham re gyagao: yo mae" va" ra" jo, qo khyo ta" hau" kyo: ge,- nga" byu qere ngo nha: sin" pye' va". Ngadqere: yao: bam re ngo dam: zhang: yu nae". Amung: yao lhaug' yaug yao" yao kyaung" re gug: gam byid' ru we' dakhyo: yao: bam re ngo gug: gam byid: nae".
11 Israel byu qere ngo lhoe' ke' byid: va". Qam: bo: ra" byumyu" lo, mae" yao: bam re ngo khyad' yu va".
12 Yao: bam li" mung: Ziun bam dao: mae ngaui bau: nghaui"caung: li" genae". Gaug zo- sabyi qang:- zhanlun xau- yao- nung: jhaung qhu" jham ngad: ra" nga" jhaung qhu" mathao mae bau" li" genae". Yao: bam wa qid nyang" za: sheim" ra" khyae we' dau: li" genae". Yao: bam qo ca" ru ja: khao: ngo" qo" yu: li" genae".
13 Ailao"- myiqe: nau" qe wa go" mung: ngaui pyo" na: li" genae". Amung: yauggai zo: aqi: angai wa ngaui bau" li" genae". Yao: bam re ngo nhag' tang" byid: nae". Yao: bam: kaug' ngug: ru wa bau" ru yao: bam: nhag' kaug' ru wa ngaui bau: ngaui lho" ru boe" lo" nhao nae".
14 Khinjaung qere zo:ve gai we' ngo pyang" byid: nae". Nga" byu qe: qo ca" ru alhab' re ngo nhag' dag nhao nae". Asang ngo ta" to: va"- ga: ta" ra".
Israel Dao Mae To" Ra" Asang: Nhag' Khyag' Shogu: Myid
15 Asang wa- Rama jo, qo mae thoe the' gyo" ra". Alo kho: sho' ngug: na: ra" thoe re the' gyo" ra". Rakhela wa yao" zoshao qe: mathao mae ngug: na: ra". Yao: bam mana loko" ngad: ra". Nhag' tang" byid' rure yao: ha: pye' ava".
16 Nao gyi: ngug: ru thang: pye' wa,- ni" ngug byid jham re sad' pye' wa,- ni" zoshao qe: qhid' mae" nao kad' va" mau" alhab' aphug' jhaung qhu" maqo" lo: maboe" nae". Yao: bam wa gyevo qe: mung"dan: mae" dam: tug' lo: li" genae".
17 Joe" lo nae" ayo, qhid' mae" ni" myid: lao" khyo jo; ra". Ni" zoshao qe wa yham dam: phao: lo: li" genae". Asang ngo ta" to: va".
18 Israel byu qe wa kaug' yang:- Asang we"- ngonhaung" wa yin sho' mamho" to" ra" gug'nyhug' we' dakhyo: ngad: bam va". Ngadqere: nao ngonhaung" re mho dao: gyo: nae" mho" byid' ava". Ngonhaung" re dam: jhui" tug' lo" la,- ngonhaung" nho: Mao"So Asang jhao" dam: tug' lo nae" ngonhaung" jin" jin" ngad:-
19 Ngonhaung" nao mae" phaug' lo" bam va". Ngadqere: aijao" ngonhaung" dam: tug' lo nug va". Nao ngonhaung" re qobo dae bin: byid: thao kaug' yang: au: phyug: lhao" ci va". Ngonhaung" qho' phau: mung: nga: yeim va". Pe"mung:ga"re ngonhaung" ngai shi" au: ngonhaung" qobo shad' lhoe" bam va" ga: ta" na ko" rure ngo the' gyo: va".
20 Israel we"- naonhaung" wa nga" nho: jhid: de; thao" ra" yauggai zo:- nga" jhid'de; thao" ra" zoshao ngad: ra". Ni" mang re ngo ta" khao: ngo" jhid'de; myid we' ngo nao re myid: ra". Nga" nhag' lam: nao we' daga" ngad mung: nao re ngo nhag' khyag' shogu byid: nae".
21 Aso: tau: to' mung: khyodang re axam: kad' ge,- naonhaung" lai: to: co' ra" khyodang re dam: qho ge,- Israel byu qe we"- dam: tug' lo geri:- naonhaung" to: co' ra" vogaung: jham khyo lo geri:-
22 Lam khug myid mabo: ra" byu qe we"- khamyhao" joe" sho' yam" na genae" i? Ngo wa shai" ra" thung" li asag' daja: re phan" to: va". Aiwa myiqe: dayaug wa- yauggai dayaug re gug: gam byid' ra" qhi" jho" shai" ra".
Joe" Lo Nae" Ayo, Mae" Mao"So: Byu Qe: Na: Dai Ye, Dai Khyo
23 Israel nho: Mao"So Asang qam: bo: ra" Asang wa byumyu" qere yao: bam: mug: myid re dam: nyhang" byid: lao" yao: bam wa Yuda mung" we' ainho: vogaung: jham mae-
Asang wa yao: na: ra" gyang" lho" jo, qo Yerusalem nho: gyang" lho" bug gaung re shaman" byid: vashao:- ga: dalhang dam: ta" li" genae".
24 Mang: byu qe wa Yuda we' ainho: vogaung: alhab' mae na: li" genae". Ai mae yo kad' zo: mo, yao: bam: yao kyaung" re lhaug' mo, ngad: li" genae".
25 Myaung: mo, re ngo qam: dam: myhaug' byid: nae". Vae: moe' myad mo, yaug khao: ngo" re zo:vae: yang nhag' dag nhao nae".
26 Ailao"- amyu" byu qe wa- ngo yab myhid' lo" mung: qam: sag' we' dam: so" li"- ga: ta" li" genae".
27 Asang ngo wa- Israel we' Yuda mung" re ngoyang byu we' gug'nyhug' jham byang" nhao nae" ra" ayo, joe" lo: na: ra".
28 Phan" pye' nae"- lao" khyo" pye' nae"- shapye' pye' nae"- phyo' qheim" pye' mung: phyo' khyo" pye' nae". Yao: bam re yhin" lo: ru we' dakhyo:- yao: bam re ngo dam: qho" yhaug' mung: zao: to' byid: nae".
29 Ai: ayo, joe" lo lao"- amyu" byu qe wa- myhi" pho" qe sabyi shi: ajhin zo: mung: zoshao qe zaui kyam: ako"- ga: mata" lo: genae".
30 Ai: atha"- sabyi shi: ajhin zo: yaug khag' ngadqere: yao: yao" zaui kyam: li" nae". Yaug khao: ngo" wa yao: yao" qobo mathao mae shid: li" genae"- ga: ta" ra".
31 Asang wa Yuda byu we' Israel byu qe we' ngo dao: thang" kad' nae" ra" ayo, joe" lo: na: ra".
32 Ngo yao: bam re lo, mae" she yang: Egutu mung" mae" jhin" thug' lo: au: yao: bam: phug' pho" qe we' ngo kad' to" ra" dao: thang" axug' we' dakhyo: madau nae". Ngo yao: bam re yham sang pho" we' dakhyo: kad' sho' ngadqere: yao: bam nga" dao: thang" re maphug' cao" ngad: ako".
33 Israel byu qe we' ngo kad' nae" ra" dao: thang" asag' wa ceru ngad: ra". Nga" tarha" re yao: bam: khug mae ke' byid: mung: aire yao: bam: nhag' lam: khug mae tung" te' to: nae". Ngo wa yao: bam: Mao"So boe" mung: yao: bam wa nga" byumyu" qe boe" li" genae".
34 Yao: bam mae" khag' dayaug re: yao: bam: mao:nhaung: qere Asang re ba nae" qhid' mae" mho" shid' byid: maca" genae". Pe"mung:ga"re ngai: thao" mae" qi" thao" yaug joe" sho' alhab' mo, ngore ba: li" genae". Yao: bam: qobo jham re ngo khyad' pye' byid: mung: yao: bam: shad' ra" lo,mau" re ngo mamyid: beim: lo nae". Asang ngo ta" to: va".
35 Asang wa na" mae bao nae" ba re:- myi" re bao nae" lho" we' kyi jham re: byid' to" ra". Yao: wa panglai: re lhau: zhung" ke' mung: aire myang nhao: ra".
Yao" mang wa qam: bo: ra" Asang ngad: ra".
36 Jo,gyae: tarha" khomyhao" myao: re myao: qhi"- aimyhao" yao: Israel wa byumyu" damyu" boe" jo; li" nae" ga: yao: dao:so: byid' to" ra".
37 Mug:gaung re ka" mung: myid gaung: nho: apan aqao: re ca: qu" ra" ba na daba jo; re za: yao: bam kad' ru alhab' mathao mae
Israel byu qere yao: ha: pye' li" nae" Asang ta" to" ava".
38 Asang wa Hanane gyebyu zaung mae"- ajheim kham: mo" joe"sho'- Yerusalem alhab' re nga" vogaung: khyo" kad' ra" ayo, joe" lo: li" nae".
39 Kyo: dam: wa ai: mae" Gareb bug gaung joe" sho'- aimae" Goa lhang" gam: joe" sho' xo' ye" lo" li" nae".
40 Sushid jham re nyhab' ra" jo, qo we' basad bam: to" ra" lao: khaung: geim" we'- ba thug' shad' Myao: Kham: joe" sho' mae" Kidron gyaung: zo: tho' tam" mae yothaung: alhab' wa nga" qhid' mae" gyang" lho" jo, qo ngad: li" nae". Vogaung: wa khonhae" re: phyo' khyo" pye'- phyo' qheim" pye' maqhug' lo nae"- ga: Asang ta" ra".