28
Yeremia We' Lapa Hanania
1 Ai: zin mae yao:- Zedekia kho:kham kad' ru byid zin ein: zin- lho" ngo" khye' ein: khye' mae Gibeon vogaung: mae" Azu nho: yauggai zo: lapa Hanania wa Caung:pa" Yham mae ngore dao: jhau: ra". Khinjaung qe we' mo, byu qe: qhid' kheim mae yao: wa ngore-
2 Israel nho: Mao"So qam: bo: ra" Asang wa- ngo wa Babelon kho:kham nho: qam: so' re khyug' pye' va".
3 Shid' zin: agyo: mae ngo wa kho:kham Nebugkhaneza yang Babelon khyo sham" cilo" byaug: ra" Caung:pa" Yham jo,nho" jham alhab' re ce: jo, qo khyo dam: cilo nae".
4 Yehoiakim nho: yauggai zo: Yuda kho:kham Yehoiakhin rere: Babelon khyo pyaung" jhui" lo" rumae bobo ko" ra" Yuda byu qe alhab' we' daga" ngo dam: jhui" tug' lo nae". Ngad va"- ngo wa Babelon kho:kham nho: qam: so' re ngo khyug' pye' va". Asang ngo ta" to: va"- ga" ra" dao: ngore ta" ra".
5 Ailao"- khinjaung qe we' Caung:pa" Yham mae ye; jo, ko" ra" mo,byu qe alhab' mo, qhid' kheim: mae ngo wa Hanania re-
6 Mug' pho: lhe"- Asang ceru: kad' nae" rure ngo myid: lao" ra". Ni" lapa dao: re yao: zaui" pyang" li" nae". Jo,nho" jham alhab' re we' kyam: byu qekhyo" Babelon khyo jhui" lo" qhug' ko" ra" mo, byu qe alhab' re Babelon mae" dam: jhui" tug' lo nae" ngad: rure ngo dang za: myid: lao" ra".
7 Ngadqere: nao we' mo,byu qere ngo ta" ra" dao: re tae" gyo: wa,.
8 Ngo we' naonhaung" qhid' au: mae" ganhae" mae" lapa qe wa gye poe- vae: moe' kyaug' ru- no boe" ru jham wa byumyu" myo: sho' we' qam: bo: ra" mung"dan: jham mae boe" li" nae" lapa pa: lo: ako".
9 Ngadqere: ngaui pyo: yaug yo: ra" khyo re lapa pa: ra" lapa pho" re wa lapa pho" nho: lapa dao: jham jab byang" li" lao" za: lapa pho" wa Asang: yang dang za: nhao: ke' ra" lapa dayaug khyo" xam: so" yu byid' ru gai: qhug' ra"- ga: ta" ra".
10 Ailao"- Hanania wa nga" lang zang: mae" nung: kyau: re khyad' yu yang: aire adau dau khyug' pye' ra".
11 Amung: mo,byu qe alhab' mo; qhid' kheim: mae- yao: wa byumyu" alhab' nho: lang zang: mae kho:kham Nebugkhaneza yang vhin: to" ra" nung: kyau: re ceru: khyug' pye' nae" ga: Asang ta" to" ava". Yao: wa ceru re shid' zin agyo: mae kad' li" nae"- ga: ta" ra". Ailao"- ngo wa aimae" thug' lo" va".
12 Dayo, kyo thao re Asang wa ngore-
13 Hanania jhao" ye: mung:- nao wa sag' nung: kyau: re wa qo" khyug' pye' nae". Ngadqere: yao: wa aire jo,to' kyau: dam: ke' byid' li" nae" ga:- ai: Asang ta" to" ava"- ga: ta" ra".
14 Israel nho: Mao"So qam: bo: ra" Asang wa ai: byumyu" alhab' dao mae jo,to' kyau: yao: vhin byid: mung:- yao: bam wa Babelon kho:kham Nebugkhaneza re caung da" byid' li" genae" Asang wa seyo: gug: nyhug' lhae: jham re lhao" re- Nebugkhaneza re caung da" sho' kad' nae"- ga: ta" ra".
15 Ailao" ngo wa cedao: re Hanania re ta" kyo: mung: Hanania we"- tae" gyo: wa,- Asang wa nao re manhao: ke' ngad: ra". Mhug' ra" dao: re ce byu qe lam" genae" qhid' mae" nao kad' na: ra".
16 Airumung: yao: wa nao re yu: pye' nae" ga: Asang yao: yao: ta" ra". Asang re tau: lhan: gye kad' genae" qhid' mae" mo,byu qere nao ta" va" ruyang ce: zin magan shire nao shid: li" nae"- ga: laung: yang: ta" ra".
17 Hanania wa ai: zin mae yao: lho" nhad' khye' ein: khye' mae shid: lo" ra".