12
Asang Re Yeremia Dao: Myid: Myid' Ru
1 Asang we"- nga" mung mau" zo" re nao we' ngo jho" ta" ngag: re nao: jo: rure nao sagse qhu" byid' li" nae".
Ngadqere:- ngo wa nao re tarha" din: nyang: ru we' sin: yang: dao: myid: myid: nug: ra".
Makhyang: mashab mo, wa pe"mung: gyai na: qo" na dai ko" laug i?
Madin: man" ra" byu qe pe"mung: aung doe, ko" laug i?
2 Nao wa yao: bam re qho" to: mung:- yao: bam agyi: yaug: cin" li" ako".
Yao: bam yaug: qi" li" mung: ashi: zaui" ako".
Yao: bam wa ni" khyo re khonhae" re agai za: ata" ako".
Ngadqere:- gaigai: ga" re pe" shui manho pe" xan: masun: ngad: ako".
3 Ngadqere: Asang we"- nao wa ngore ba: ra" ngo pe" kad' ru nao myao byid' ra".
Aimung: nao re ngo khoqhi" jhid'de; rure nao ba: ra".
Se' pye' nae" yao jham re we' dakhyo: ce: makhyang: mashab: ra" byu qere: she: khyad' thug' pye' byid: la,.
Yao: bam re se' pye' nae" ayo, joe" sho' yao: bam re lhaug' na byid: la,.
4 Ngonhaung" nho: mug: myid wa- khomyhao" myao" sho' kyaug' ho: jo, mung:-
yo khyao: khao: ngo" mae" vohau: jham wa khomyhao" joe" sho' kyaug' ho jo, genae" i?
Ngonhaung" pe" kad' na: rure Mao"So mathe' myao ngad: ra" ga: ta" na ko" ra".
Ngonhaung" byumyu" qenho: nhag' lam: kaui: ra" khyo mathao mae gugnyhug' jham we' ngho' jham shid: dam" lo" na: avako" ein: myid: va".
5 Asang ta" ra".
Yeremia we"- nao wa byu qe: thao cao" khe' yang: khe' nghang" lo:ngad: re- myao: jham we' khoru: qo" jho" tao: nae" i?
Nao wa jao: dae vogaung: mae maqo" na: jo, re- Yodan gyaung: nhae mae" seyo mae khoru: qo" daui: na nae" i?
6 Nao yao" mao:nhaung: sang qe we' ni" yham byu qe yao: lao" re: nao re ab pye' ako".
Yao: bam wa- nao re khe' zin: mo, jhao" bobo: ako".
Yao: bam wa jhid'de; nau" nhae" taung" dao: myan li" jhau gengadqere:- yao: bam re dalam" lhe".
Asang Wa Yao" Byumyu" Qe: Mathao Mae Nhag' Kaug' Ru
7 Asang ta" ra". Ngo wa Israel re shapye' co' va".
Ngo khyin: yu: to" ra" byumyu" re ngag: lhaui" pye' va".
Ngo jhid'de; ra" byumyu" re yao: bam: gyevo qe: qam: so' khug khyo byid' pye' va".
8 Nga" nho: khyin: yu: to" ra" byumyu" wa ngore gye tug' kad' avako".
Seyo mae" khang khyi dadau: we' dakhyo: yao: bam wa ngore kyid' ako".
Aimung: yao: bam re ngo nghang" ra".
9 Nga" nho: kyin: yu: to" ra" byumyu" wa zeim baung: jham: yang shad' khao: ngo" khyo" ceim" khe' kung" ru qhug' ra" ngho' dadau: we' dakhyo: ngad: ako".
Ai: zo: shaug' poe mae bocao: bo nae" qhid' mae" gug'nyhug' lhe: jham re khai: ke' ge,.
10 Taungbug zug: kho:kham myo: sho' mo, wa nga" sabyi yo re phyo' qheim" pye' ako".
Yao: bam wa nga" nho: yo re zab: nhae" pye' ako".
Yao: bam wa- nga" nho: yaung" ra" mug: myid re din"pyad' yo boe" nhao: pye' ako".
11 Yao: bam wa- aire seyo din"pyad' kad' pye' avako".
Aiwa nga" nho: qhid' kheim: mae cae: jhug tag myid gaung boe" jo; ra".
Damung" dan: geim" wa din"pyad' yo boe" byaug va".
Aimung: khag' re: pe" maqu" gaung yug byid: ngad: ako".
12 Byu jham wa- lhad' paui: yu nae" qhid' mae" din"pyad' yo bam khaung: jham mae joe" lo: ako".
Ngo wa damung" dan: geim" re phyo' qheim" pye' nae" qhid' mae" mang: zin" rure nhao: ke' byid: va".
Khag' re: ngaui pyo: yaug yo taung" ruwe' maqo" na ngad: ako".
13 Nga" byumyu" qe wa jung: gaug re qho: ngadqere:- myo, re za: qo" yad: yu: ako".
Yao: bam mau" jam: phin" khao" gengadqere:- ai: qhid' mae" pe" mathe' yu ngad: ako".
Nga" nho: nhag' yo" ra" mathao mae yao: bam: qhovo: qhoshi: jham seim: byaug: ako".
Israel Nho: Yham Kyo: Qere Asang Byid' Ra" Dao:so:
14 Asang ta" ra"- nga" nho: byumyu" Israel qere ngo byid' to" ra" mug: myid re phyo' qheim" pye' va" Israel nho: yham kyo: cao: qere ngo ta" nae" daja: qo"- ngo wa ai: makhyang: mashab nhag' lam: kaui: ra" byumyu" qere- agyi: mae" ban" lo" ra" sag' gae re we' dakhyo: yu: pye' nae". Aimung: ngo wa Yuda re yao: bam mae" khyad' yu nae".
15 Ngadqere: yao: bam re ngo yu: pye' thao yao: bam re ngo nhag' khyag' yu nae". Ngo wa byumyu" khao: ngo" re yao: bam yao" mug: myid khyo we' yao: bam yao" mung"dan: khyo jhui" lo" nae".
16 Yao: bam re- ganhae" dalhang yao: bam nga" byumyu" re Bala mang khyo" jham tang: nhao: ru we' dakhyo: nhag' lam: alhab' yang Israel byumyu" nho: lalam lakhug re khae: yu mung:- Asang kao so' daui: na: ra" ga: jham tang: ko" ngad: re- yao: bam nga" byumyu" qe mae dadau dakhyae: khyo" bobo mung: na: dai: li" genae".
17 Ngadqere: byu damyu" myu" qe maphug' cao" ko" ngad: re- ngo wa ai: byumyu" re bin sho' phan" pye' mung: phyo' qheim" pye' nae". Ngo Asang ta" to: va"- ga: ta" ra".