YAKU
NHO: VHIN TUNG"
(JAMES)
Dao: Phung"
Yaku nho: vhin tung" wa mug: myid geim" mae byo: sin" na ko" ra" Mao"So: byu qe alhab' re tung" ke' ra" mugsug' ngad mung: lo, qaug, phug' cao" khyo we' sin: yang: mho" shid' ra" pyang dao: jham zhang: to" ra" mugsug' ngad: ra". Mugsug' tung" yaug wa lo, joe" kad' nae" we' sin" ra" pha,jhi"- Khristan qe: myid ave, qhid' mae" khyo shid' byid' ra" khyo we' ave, lo, mau" we' sin: yang: mho" shid' pyang dao: jham re kai" qhu" nae" qhid' mae" de: de: za: ngad: ra" dao: tau" myo: sho' re ci yang: tung" to" ra". Yaku wa jo,nho" qo" ru we' myaung sho" ru- ju" phyo' ru- gai: ra" lo, mau"- myo, nho khyin: ru- lam khug: ru- phug' cao" ru- nhad' sho re ci yhung" ra" khyo- pha,jhi"- myan" myo: jho" byo; ru- ngad beim" ru- nyham: khyo" ru- su gaje qere dao: phyid' ra" khyo- phug: ru nhag' lam: qhang: ru- akyu" mho' ra" khyo ru" ra" khyo jham re Khristan myao dug khyo" tung" qhu" to" ra".
Ce: vhin tung" wa Khristan: caung:pa" thung" nho: ave, lo, mau" mae lam khug: ru we' lo, mau" daga" za: akhyag: ra" khyo re qam: ke' yang: ta" to" ra".
1
1 Pho" Mao"So we' Asang Yesu Khristu nho: daui daui yaug ngad: ra" ngo Yaku wa mug: myid geim" mae byo: sin" na ko" ra" Mao"So: byu alhab' mo, re au" ke' ra".
Lam Khug: Ra" Khyo We' Nyan Pha,jhi"
2 Nga" mao:nhaung: qe we"- jham" qu" ru aja: ja: re thaung" qhug' gelao" naonhaung" zhau: vha: gai mo, ngad: ra" khyo" myid:jho: yu ge,-
3 pe"mung:ga"re naonhaung" lam khug: myid wa airu: jham" qu" ru jham re thaung" qhug' aung: pye' lao"- zang: kham: ra" qam: o: bo: li" rure naonhaung" ba: ako".
4 Naonhaung" wa daja: re: makyo: lo: bin sho' jab byang" li" nae" qhid' mae" naonhaung" zang: kham: ru wa naonhaung" re mashad' manghung: lo: khyo jao: sho' jhui" ye" li" nae" rure ba ge,.
5 Ngadqere: naonhaung" phaung mae" dayaug yaug nyan: pha,jhi" kyo: yang: ngad: re yao: wa Mao"So re akyu" mho' vashao:- Mao"So wa yao: re nyan: pha,jhi" byid' li" nae". Pe"mung:ga"re Mao"So wa byu alhab' mo, re mabyag maqhag' lo: nhag' myan: taung" byid' ra" yaug ngad: ra".
6 Ngadqere: naonhaung" akyu" mho' gelao"- aug' o: myid dajhid' re: mabo lo: lam" ra" myid bo ca" ra". Aug' o: myid bo: ra" yaug khag' ngadqere: yao: wa la: yang deim"qhui" lhau: ra" bang: lhung" we' dau: ra".
7-8 Airu" ra" nhag' lam: shid' gao bo yaug- yao: yao" nhag' lam: re maqo" myid: phyid' mung: yao" mau" zo" alhab' re mamyid: phyid' ra" yaug wa Asang: lo, mae" daja: ja: qo" khae: yu: li" nae" ein: yao: magai: myid ngad: ra".
Myaung Sho" Ru We' Jo, Nho" Qo" Ra" Khyo
9 Myaung sho" ra" Khristan wa yao: re Mao"So: yang tau: to' ke' lao" ngaui bau: ca" ra".
10 Amung: jo,nho" qo" ra" Khristan wa yao: re Mao"So: yang khyo" ke' lao" ngaui bau: qo: ra". Pe"mung:ga're jo,nho" qo" yaug wa seyo: bin: bu" we' dakhyo: sham: lo" byaug: li" nae".
11 Ba wa zho: laung: thug' li" mung:- ai: bin: gae re lhe' mhai: pye' ra". Alao" ai: bin: gae mae" bin: bu" jham sham: byid: gyo" lo" mung: yao" yaung" shab: ru alhab' byo; qeim: lo" byaug: ra". Ai we' dakhyo: jo,nho" qo" ra" yaug re: yao" phaga: mau" zo" re zaui" na: au: phyo' qheim" pye' ru qhug' li" nae".
Jham" Qu" Ru We' Ju" Phyo' Ru
12 Jham" qu" qhug' rure malaui: lo: tang za: qhao" ye; jo; ra" yaug wa ngaui lho" ra". Pe"mung:ga"re yao: wa airu" ra" jham" qu" qhug' rure zang" aung: pye' lao" Mao"So wa yao: re jhid'de; ra" mo, re byid' nae"- ga: dao:so: byid' to" ra" kaoso' jhaung qhu" re yao: qo" khae: yu: li" nae".
13 Byu dayaug yaug wa airu" ra" jham" qu" qhug' ruyang ju" phyo' ru qhug' yang: ngad: re yao: wa- ceru wa Mao"So: yang ju" phyo' ru ngad:- ein: magai: ta" ngad: ra". Pe"mung:ga"re makhyang: mashab: ruyang Mao"So re maqo" gai: ju" phyo' ngad: ra". Amung: yao: wa khag' rere: maju" phyo' ngad: ra".
14 Ngadqere: yao: yao" makhyang" ra" kao bau myid o: ra" shad' khyo cao" bo: lo" mung: ai: yang myhi" pye' ru qhug' lao"- yao: wa ju" phyo' qhug' ru ngad: ra".
15 Ai: yao" makhyang" ra" kao bau myid: o: ru wa zo: de; li" mung: qobo re khau: ke' ra". Ai: qobo wa qi" qhang: li" lao" shid: rure khau: ke' ra".
16 Nga" jhid'de; ra" mao:nhaung: qe we"- damyid: nghung: ge,-
17 gai: ra" jeju jhaung qhu" we' jab byang" ra" jhaung qhu" ja: khao: ngo" wa mug:gaung mae" ngad: ra". Aiwa mug:gaung: mug: bo" re phan" to: yaug ngad: ra". Yao: wa malai: matha"- mangad: lao"-lhang: na: ruyang mug: cad' maboe" nhao ngad: ra".
18 Mao"So yao" yang phan" phaug' to" ra" ja: cao jab alhab' mae zoqhid' boe" genae" qhid' mae" yao: yao" myid o: ru we' dakhyo: dangman" ra" mungdao: khyo" yang ngonhaung" re myhung: ke' ra".
Gyo" Yu: Ru We' Zaui: So" Ru
19 Nga" jhid'de; ra" mao:nhaung: qe we"- ceru re xam" ci ge,- yaug khao: ngo" wa tae" gyo: nae" qhid' mae" phyad ca" ra". Ngadqere: dao: jhau nae" we' nhag' yo: nae" rumae wa magai: phyad ngad: ra".
20 Byu: nho: nhag' yo" ru wa Mao"So: din:man" ra" myid: yaung: ra"khyo re maqo" zai" boe" ngad: ra".
21 Airumung: masan masin" ra" ave, ja: khao: ngo" re we' makhyang" ra" lo,mau" alhab' re shapye' pye' ge,- Mao"So: yang eib: rure kham: yu mung: Mao"So: yang naonhaung" aung khug: nhag' lam: mae qho" to: byid' ra" mungdao: re khae: yu ge,- ai wa naonhaung" re qo" khyad' yu: ra".
22 Yao" mungdao: re gyo: za: tae" gyo" ra" khyo" naonhaung" yao" gaung re damhug' pyag' pye' ge,- ai: atha" ai: mungdao: re lo, joe" phug' cao" ge,-
23 Aimung dao: re gyo: za: tae" gyo" yu mung: lo, joe" maphug' cao" ra" yaug khag' ngadqere: yao: yao" myo,khung: re bao tang" mae qu" mung:-yao: yao" gaung re myao: ra" yaug we' dau ra".
24 Yao: wa yao: yao" gaung re nyang" za: qu" yu yang: thug' ye" lo" mung: ai lao" jao" yao: yao" bao lho re to" myhid' pye' ra".
25 Ngadqere: byu re loe; beim nhao: ra" jab byang" ra" tarha" re tin: te' qu" zhao: yu yang: aire xo' yang: qu" te' to: mung: ai: mungdao: reyao: tae" gyo" yu yang: ai: thao re mato" myhid' pye' lo: lo, joe" phug' cao" ra" yaug khag' ngadqere: yao: wa Mao"So: khug mae yao: zaui: so" ra" lo,mau" mathao mae shaman" byid' ru qhug' li" nae".
26 Byu dayaug yaug yao: wa caung:pa" thung" kao bau lam khug yaug ngad: khyo" myid: jho: ra" i? Yao" sho re makhang" ngad: re wa yao" caung:pa" thung" wa akeim ngad mung: yao:yao" gaung re mhug' pyag' ra" yaug ngad: ra".
27 Pho" Mao"So: yang sun" yu: ra" san sin" ru we' caung:pa" thung" aman" wa ceru ngad: ra". Aiwa qug: khai: qhug' na: ra" cug' zo: qere we' cug' mo" qere gun caung byid: mung:- yao: yao" gaung re myidgaung dao mae" masan masin" ruyang abe, alhau: maboe" nhao lo: lha" ra" khyo ngad: ra".