9
Abimeleg
1 Gidon nho: yauggai zo: Abimeleg wa yao: myhi" nho: ba nam sang: cao: alhab' na: jo; ko" ra" Shekhem vogaung: khyo ye" ra". Aimung: yao: bam re
2 Naonhaung" pe" ja: o nug ko" i? Gidon nho: yauggai zo: qe nhad' xe yaug: yang za: eib: rure o ko" i? mangad: lao" dayaug: yang za: eib: rure o ko" i? Abimeleg wa naonhaung" yao" sa: sho: ngad: rure myid: beim: ge,- ga: Shekhem vobyu qere myid: nae" qhid' mae" yao: bam re ta" ra".
3 Yao: myhi" nho: ba nam sang: cao: qe wa cekhyo we' sin: yang: yao" qhid' mae" Shekhem vobyu qere dao: jhau: ako". Shekhem vobyu qe wa yao: wa yao: bam: ba nam sang: cao: ngad: ruyang Abimeleg thao cao" nae" qhid' mae" myid: phyid' ako".
4 Yao: bam wa Bala nho: dao: thang" yham mae" ngaui nhad' xe kye' yao: re byid' ako". Ai: ngaui: yang yao: wa pe" phug' made; ra" byugao: daphung: re yao" thao cao" genae" qhid' mae" lhaung: yu: ra".
5 Yao: wa Ophra mae" yao: pho" yham khyo ye: mung: Gidon nho: yauggai zo: yao" mao:nhaung: nhad' xe yaug re laug bam dabam dao mae za: se' tam" pye' ra". Ngadqere: Gidon nho: zothao" yauggai zo: Yotham wa vho' jo, yang: se' pye' ru maqhug' ngad: ra".
6 Ai: thao Shekhem vobyu qe alhab' we' Bedmilo mae na mo, alhab' wa qhan: mung: Shekhem mae" gyang" lho" zai gae khyo ye: mung: aimae yao: bam wa Abimeleg re kho:kham kad' nhao: ako".
7 Cekhyo re Yotham the' gyo: lao"- yao: wa Gerizim bam au: mae ye ye; jo, yang:- Shekhem bao: we" tae" gyo: ge,- naonhaung" rere: Mao"So tae" gyo: vashao:-
8 Ganhae" dalhang mae sag' gae jham wa yao: bam: qhid' mae" kho:kham khyin: yu nae" ye" lo" ko" ga"- yao: bam wa zhanlun gae re- ngonhaung" kho:kham kad' wa,- ga: ta" ako".
9 Zhan:lun: gae wa naonhaung" re eib nae" qhid' mae" so jham re we' byu qere nga: yhe' rumae ci: ra" xau thug' rure ngo thang: pye' ca" ga: tau" ga".
10 Ailao" sag' gae jham wa pho' ham" gae re- nao ngonhaung" kho:kham li" kad' wa,- ein: ta" ko" ga".
11 Ngadqere: pho' ham" gae wa- naonhaung" re eib nae" qhid' mae" cug: ra" nga" shi: zaui" rure thang: pye' ca" ein: tau" ga".
12 Airumung: sag' gae jham wa sabyi naui re ngonhaung" kho:kham li" kad' wa,- ga: ta" ko" ga".
13 Ngadqere: sabyi naui wa naonhaung" re eib nae" qhid' mae" so jham we' byu qere bau: nhao: ra" nga" sabyi qang: thug' rure thang: pye' ca" nae"- ein: dam: ta" ga".
14 Ailao" sag' gae jham wa zau: kyao gae re- ngonhaung" kho:kham li" kad' wa,- ein: ta" ko" ga".
15 Aimung: ai: zau: kyao gae wa- naonhaung" ngore naonhaung" kho:kham dang za: kad' nhao nug ko" re wa- nga" ba sham re li" khug: na geri:- naonhaung" airu: makad' re wa- nga" zaui: kyin kyao jham mae" myi: thug' li" mung:- Lebanon bam mae" shaug' gae jham nga" pye' li" nae"- ein: tau" ga".
16 Yotham wa xo' yang:- ana" naonhaung" Abimeleg re kho:kham kad' nhao ko" au:- dang za: nhag' lam: din: dangman" man: ngad ko" i? Naonhaung" wa Gidon nho: myid: beim: aso: re phug' myao: mung: yao" lo, mau" we' man: qi" ra" khyo" yao" yham byu qere kad' vako" i?
17 Nga" pho" wa naonhaung" qhid' mae" gye zin: byid' lo: rure myid: beim: ge,- yao: wa Midian lo, mae" naonhaung" re khyad' yu nae" qhid' mae" yao" kao so' re dan yang: kad' lo: ra".
18 Ngadqere: ana" ba naonhaung" wa nga" pho" nho: yham byu qere gye kad' avako". Naonhaung" yao: re Shekhem kho:kham kad' nhao ko" ra" naonhaung" ba nam sang: cao: ngad: ra" daui daui okaung myhi" yang khau: ra" yao" yauggai zo: Abimeleg dayaug: mathao mae za:- yao" yauggai zo: nhad' xe yaug re laug bam dabam dao mae za: naonhaung" se' pye' ako".
19 Amung: ana" ba naonhaung" Gidon we' yao" yham byu qere kad' ra" lo, mau" wa nhag' lam: dangman" yang: ngad ko" re wa- Abimeleg we' daga" ngaui bau: ge,- yao: rere: naonhaung" we' daga" ngaui bau: nhao ge,.
20 Ngadqere: airu: mangad: re wa Abimeleg mae" myishae thug' li" mung: Shekhem we' Bethmilo bao: re nga" pye' vashao:- Shekhem: we' Bedmilo bao: mae" myishae thug' li" mung: Abimeleg re nga" pye' vashao:- ga: ta" ra".
21 Ai: thao Yotham wa yao" mao:nhaung: pho" Abimeleg re gyaug mung: yang: phao: lo" mung: Bera mae lo" na: ra".
22 Abimeleg wa Israel mung" re sam zin eib: ra".
23 Ai: thao Mao"So wa Abimeleg we' Shekhem bao: re yao: cao: gye jho" boe" nhao: ra". Amung: yao: bam wa Abimeleg re gye kad' tau: lhan" ako".
24 Ceru: boe" ru wa Abimeleg we' Gidon nho: yauggai zo: nhad' xe zo: re se' nae" yao: re qam: byid: ko" ra" Shekhem bao: re yao: bam se' da: be, khyad' mau" qhid' mae" aphug' tug' byid: nae" qhid' mae" boe" ru ngad: ra".
25 Shekhem bao: wa Abimeleg re gye kad' yang bam nyaug jham mae byu qere lham nhao: ako". Yao: bam wa lai: lo" mo, yaug khao: ngo" re damya, kad' ako". Cekhyo re Abimeleg re ta" kyo" ako".
26 Ai: thao Ebed yauggai zo: Gela wa yao" mao:nhaung: bam we' Shekhem khyo joe" li" mung:- Shekhem bao: wa yao: re lham: lam: ako".
27 Yao: bam alhab' mo, yao: bam: sabyi khyae jham khyo ye: mung: sabyi shi: jham re ye phyo' yu yang: aijham re sabyi qang: kad' yu mung:- poe kad' ako". Yao: bam wa yao: bam: so yham khyo vao ye: yang: aimae zo shaug' mung: Abimeleg re qi: jung" pye' ako".
28 Gala wa ngonhaung" Shekhem bao: wa pe" ru" mo, ngad: i? Ngonhaung" pe"mung: Abimeleg re caung da" na: bam: i? Gidon nho: yauggai zo: wa pe" ru" yaug ngad: i? Zebu wa yao" amyin" ci yaug ngad: ra". Ngadqere: ngonhaung" pe"mung: yao: re caung da" nae" i? Naonhaung" amyu" kaung ajhaung ngad: ra" naonhaung" phug' pho" Hamo re phug' myao: caung da" ge,.
29 Cebyu qe: au: jhaung ngo ngad: qa: we"- ngo wa Abimeleg re yu: pye' nae"- ngo wa yao: re ni" gyetab re gyezo: laung: yang: thug' li" yang: li" zin: wa, ein: ta" nae"- ga: ta" ra".
30 Vogaung: zug: pho" Zebu wa Gala ta" ra" dao: re the' gyo: lao" nhag' yo" ra".
31 Yao: wa Aruma mae na: ra" Abimeleg jhao" lagyo: jham re nhao: ke' mung: Ebed yao: zo: Gala we' yao" mao:nhaung: qe wa Shekhem mae li" joe" na gemung:- yao: bam wa nao re vogaung: khug khyo mavao nhao genae" ga" ga: ta" ke' ra".
32 Airumung: ana" nao we' ni" byu qe wa myi" re qui" li" mung: pa: din" jham mae li" vho' jo, geri:-
33 Ne, kao to" li" mung: ba thug' so' re nyag din taung" vogaung: re li" khe' zin: geri:- aimung: Gala we' yao" byu qe nao re gye li" zin: gelao"- naonhaung" gai boe" ra" qhi" mhan" kad' pye' wa,- ga: ta" ra".
34 Airumung: Abimeleg we' yao" byu qe wa myi" re qui" li" mung: byid phung: kad' yang:- Shekhem vogaung: taung gaung shad' mae li" vho' na: ako".
35 Abimeleg we' yao" byu qe wa Gala thug' li" mung: vogaung: kham mo" mae li" ye; jo; rure myao gelao"- yao: bam wa yao: bam vho' jo; ra" jo, qo mae" to" ako".
36 Gala wa yao: bam re the' myao mung: Zebu re- qu" ke' wa,- bam nyaug jham mae" byu qe gyo" lo: na: ako"- ga: ta" ra".
Zebu wa byu qe mangad: bam jham mae bao qab gyo" zao" ru angad: ra"- ga: ta" ra".
37 Gala wa- qu" ke' wa,- yao: bam wa bam nyaug mae" gyo" lo: na: gemung:- daphung: wa geim phan" phan" yaug: nho: zai gae khyo cao" yang: li" na: ako" ga: dam: ta" ra".
38 Ailao"- Zebu wa yao: re- nao gyai phug: ta" ra" dao: wa ana" khai: mae i? Nao wa ce: Abimeleg re ngonhaung" pe"mung: caung da" byid: ang: nae" i? ga: myid: yaug ngad: ra". Aibam wa nao: yang qi: jung" pye' ra" mo, ngad: ako". Ana" thug' ye: mung: yao: bam re yezin: se,- ga: ta" ra".
39 Gala wa Shekhem bao: re jhui" thug' ye: mung: Abimeleg re yekhe' zin" ra".
40 Abimeleg wa Gala thao cao" khe' mung: Gala wa tao" phao: lo" ra". Vogaung: kham mo" mae za: lhao" re:-myo: sho' dae de; ako".
41 Abimeleg wa Aruma mae na: jo, mung: Zebu wa Gala we' yao" mao:nhaung: qere Shekhem vogaung: mae" khe' thug' pye' yang: yao: bam aimae maqo" na: jo, loko" ngad: ra".
42 Thao:ba Abimeleg wa Shekhem vobyu qe pa: din" khyo ye: nae" yaung: to: ko" rure ba mung:-
43 Yao" byu qere jhui" yu yang: ai bam re sam phung: kho' mung: pa: din" mae vho' yang: lham: na: nhao ra". Vobyu qe vogaung: mae" thug' li" ko" rure yao: myao lao"- yao: wa vho' jo; rumae" thug' li" mung: ai bam re se' pye' ra".
44 Abimeleg we' yao" phung: qe vomo" kham: re ye zaung" nae" qhid' mae" tao" ye" lo" na ko" au:- gatau shid' phung: wa pa: din" mae vobyu qere khe' zin: mung: yao: bam alhab' re se' pye ako".
45 Gyekhe' poe wa ba gyam ngad: ra". Abimeleg wa vogaung: re aung: yu mung: vobyu qere se' pye' yang: vogaung: re phyo' sin" pye' ra". Myid gaung: geim" re xo: za: phyu mung: kad' pye' ra".
46 Cekhyo re Shekhem gye khug zaung mae na: jo; ko" ra" au: jhaung qe alhab' the' gyo: gelao"- yao: bam wa Bala dao: thang" yham mo" mae gyetab, kad' yang: yekhug: na: ako"
47 Yao: bam ai tau mae ham: na: bam rure Abimeleg the' gyo: mung:-
48 Yao" byu qe we' daga" Zalmon bam khyo do, ye" lo" ra". Ai mae yao: wa vozaung: daphau: re yu yang: sag' kaung jham thau: yu mung: yao" lo, sin mae vo; ra". Yao: wa yao" byu qere airu: phyad phyad kad' genae" qhid' mae" ta" ra".
49 Aimung: yaug khao: ngo" wa sag' kaung jham re thau: yu yang: Abimeleg thao cao" ye: mung: aijham re gye khug jo, qo mae yebam: to" ako". Byu jham akhug mae laung" jo, zang yao: bam wa aire myi: ngha" ke' ako". Gye khug jo, qo mae na mo, alhab' shid: ako". Aibam wa yauggai myiqe: dataung yaug ko ngad: ako".
50 Ai: thao Abimeleg wa ai: vogaung: re lhang" gam" to" ra" Thebeza khyo ye: mung: aire ye aung: pye' ra".
51 Ai: mae gyai gang" ra" gyebyu zaung jo; ra"- aimung: ai: vogaung: mae" myiqe: yauggai alhab' mo,we' au: jhaung qe wa ai: khug khyo tao" vao ye" ako". Yao: bam yao: pyid' lhaung" yu mung: khaung dao khyo do, lo" ako".
52 Ai: gyebyu zaung re Abimeleg li" khe' zin: lao"- yao: wa kham: zang khyo do, ye: mung: gyebyu zaung re myi: ngha" pye' ra".
53 Ngadqere: myiqe: dayaug wa laug lhang laug zang yao" au: dao khyo pye' khyo" ke' mung: Abimeleg au: pye' khyoe' pye' ra".
54 Ailao" yao: wa yao" shae lhae ci byid' ra" zolau: pho" re phyad phyad khai: yu mung: ni" shae she: yu yang: ngore se' la,- ngore myiqe" yang se' pye' genae" rure ngo ma o- ga: yao: re ta" ra". Airumung: ai: zolau: pho" tao" ye: mung: thug' kyao" se' pye' ra".
55 Israel byu qe wa Abimeleg shid va" rure myao gelao"- yao: bam alhab' mo, yham phao: lo" ako".
56 Mao"So airu: Abimeleg re yao" mao:nhaung: nhad' xe yaug re se' mung: yao: pho" re gye kad' shad' lhoe" ra" qobo qhid' mae" qobo dae tug' byid' ra".
57 Gidon nho: yauggai zo: Yotham yao: bam re nhang: kheim: ke' ru we' dakhyo:- Mao"So wa Shekhem bao: rere: yao: bam: makhyang" ra" mau" qhid' mae" qug: khai: kham zo: nhao: ra".