16
Samson Gaza Mae Ye" Ra" Khyo
1 Daba mae Samson wa Philisti vomo" Gaza khyo ye: mung: aimae shava myhi" dayaug we' yeqhug' yang: yao: we' yeyab: ra".
2 Gaza vobyu qe wa Samson aimae na: rure ba gemung:- yao: bam wa ai: jo, qo re vang" to: mung: kham: mo" dung: mae Samson re damyi khyeim lao" na: ako". Yao: bam wa ngonhaung" mug: bo" sho' lao" mung: yao: re se' pye' nae" ga: myid geyang: yao: bam damyi khyeim sae za: na: jo; ako".
3 Ngadqere: Samson wa gae gaung: myi: joe" sho' za: yab qo mae na: jo; ra". Ai: thao yao: to" mung: vomo" kham: re zaui: yang: kham:- kham: baung kham: kyao" jham alhab' re yao" lao" phan" pye' ra". Yao: wa aijham re yao" lo, sin dao mae gaug: vo; mung: Hebron re myao: ra" bug khyo joe" sho' vo; lo" ra".
Samson We' Delila
4 Ceru: boe" thao- Samson wa Soreg lao: khaung: mae na: ra" Delila ga: mang: ra" myiqe: dayaug we' jho" jhid'de; ako".
5 Philisti kho:kham ngo" yaug wa yao: jhao" ye: mung:- yao: pe"mung: ai qhi" sho' qam: bo: ra" khyo we' ngonhaung" yao: re pe" ru: qo" aung: pye' nae" khyo re nao re ta" kyo: sho' nyan: mung:- yao: re taui: wa,- amung: qam: nang: sho' kad' wa,- ngonhaung" yaug khao: ngo" yang nao re ngaui dataung: dayo yo byid: nae"- ga: ta" ako".
6 Airumung: Delila wa Samson re- jeju khyo" nao re pe" yang gyai qam: bo nhao: ra" khyo ngore ta" kyo: la,- dayaug yaug nao re taui: mung: qam: nang: nhao nug yang: ngad: re yao: khoru: gai: kad' nae" i? Ngo re ta" kyo: la,- ga: myid' ra".
7 Samson wa- yao: bam ngore makyaug' shi" ra" lo, la: pyi" nhad' khe' yang taui: ko" ngad: re ngo wa gatau qe we' dakhyo: qam nang" lo" li" nae"- ga: tau" ra".
8 Airumung: Philisti kho:kham qe wa makyaug' shi" ra" lo, la: pyi" nhad' khe' Delila jhao" cili" byid' ako". Alao" yao: wa Samson re taui" ra".
9 Yao: wa gatau daqe, mae yauggai daqhae: re lao" nhao: to: mung: Samson we"- Philisti byu qe li" na: ako" ga: hug' ke' ra". Ngadqere: Samson wa ai: lo, la: pyi" jham re khyang re myi" yang tin" ke' re byid: lo" ru we' dakhyo: lao" phyid' pye' ra". Airumung: yao: bam wa Samson nho: qam: bo: ra" khyo anyham re maba shiko" ngad: ra".
10 Delila wa Samson re qu" wa,- nao wa ngore mhug' pyag' na mung: dangman" ru ngore mata" kyo: ngad: ra". Jeju khyo"- dayaug yaug nao re khoru: qo" taui: nae" khyo ngore ta" kyo: la,- ga: ta" ra".
11 Yao: wa yao: bam ngore maci qu" shi" ra" taui: sag' jham: yang taui: ko" ngad: re wa gatau qe we' dakhyo: qam: nang: yaug ngad nae"- ga: tau" ra".
12 Airumung: Delila taui: sag' jham qho: yu mung: yao: re taui" ra". Aimung:- Samson we" Philisti byu qe li" na: ako" wo"- ga: hug' ra". Yauggai qe wa gatau: qe, mae lao" na: bam: ako".
Ngadqere: yao" lo,pau" mae" taui: jham re khyang jham re we' dakhyo: lao" phyid' pye' ra".
13 Ailao" Delila wa Samson re- nao wa ana" re: mhug' na: ashi"- dangman" ru ngore mata" kyo: ngad: ra". Dayaug yaug nao re khoru: qo" taui: nae" khyo ngore ta" kyo: la,- ga: myid' ra". Samson wa- nao nga" xae nhad' shaug' re qo, gin: mae bo qo, mung: aire daung" zang: yang tang za: kad' to" re ngo wa gatau qe we' dakhyo: qam: nang: yaug ngad nae" ga: tau" ra".
14 Ailao" Delila wa Samson re jhui" yhab' mung: yao" xae nhad' shaug' re yu yang: qo, gin: mae boke' qo, mung: daung" zang mae tang za: kad' to" ra". Amung:- Samson we"- Philisti byu qe li" na: ako" wo"- ga: hug' ra". Ngadqere: yao: so" li" mung: yao" xae jham re qo, gin: mae" lao" pheim: yu: ra".
15 Airumung: yao: wa Samson re- nao ngore mangaui majhid' lo: nao ngore jhid'de; ein: khoru: qo" ta" i? Nao ngore mhug' pyag' ru sam lhang ngad: ava". Nao re gyai qam: bo nhao: ru pe" ngad: ra" khyo nao ngore ana" joe" sho' mata" kyo: shi ngad: ra"- ga: ta" ra".
16 Yao: wa airu: ba khao: ba ngo" myid' na: ra". Airumung: yao: wa ai: khyo we' sin: yang: yao" yang phabau: phaxe' kad' na: ruyang gyai gyo" nghang" li" mung:-
17 Samson wa lo" thao" mae ai: dangman" rure yao: re ta" kyo" pye' ra". Yao: wa nga" xae khonhae" re: maphyid' qu"- ngo khau: ra" ayo, mae"- Naziri dayaug khyo" Mao"So re qhaug' byid' to: va" yaug ngad:- nga" xae jham re phyid' pye' ngad: re- nga" qam: nang" lo" byaug mung: gatau qe we' dakhyo: qam: nang" lo" li" nae"- ga: ta" ra".
18 Samson dangman" rure ta" ra" khyo re yao: ba lao"- Philisti kho:kham qejhao" byu nhao: ke' yang: dalhang: dam: li" shi: geri: yao: wa ngore dangman" ru ta" kyo" ava" ga: ta" nhao: ke' ra". Ailao" yao: bam wa yao: bam we' daga" ngaui vin: li" ako".
19 Delila wa yao" tao: kheim" mae Samson re yab sho' jhui" yhab' mung: byu dayaug re khai: yu yang: aiyaug wa Samson nho: xae nhad' shaug' re phyid' pye' ra". Ailao" Delila wa Samson re yhin" ra". Pe"mung:ga"re yao: wa qam: nang" byaug: ava".
20 Airumung: yao: wa- Samson we"- Philisti byu qe li" na: ako" wo"- ga: hug' ra". Yao: so" li" mung:- ngo wa ganhae" we' dakhyo: khao" khyad' pye' yang: loe; phao nae"- ga: myid ra". Asang yao: re shapye' co' ra" rure yao: maba ngad: ra".
21 Philisti byu qe wa yao: re taung" yu yang: yao" myo, jid' re kyaung" thad' pye' ako". Yao: bam wa yao: re Gaza khyo jhui" lo mung: gyid ne jao co" yang taui" to: mung: thaung: khug mae laug lhang gyag mau" kad' nhao: ako".
22 Ngadqere: yao" xae jham dam: yaug: li" na: ako".
Samson Shid: Ra" Khyo
23 Philisti kho:kham qe wa daga" poe kad' mung: yao: bam: so Dagon re xeim: ngaui" byid' ako".
Yao: bam wa- ngonhaung" so wa ngonhaung" gyevo Samson re aung doe; nhao ava"- ga: nghaui" caung" ako".
24-25 Yao: bam wa zo: pyo: shaug' pyo: mung: Samson re yekhai: lo geri:- ngonhaung" re shapyo: nhao gelang:- ga: re: yao: bam ta" ako". Yao: bam Samson re thaung: mae" jhui" thug' lo gelao"- yao: re yao: bam re shapyo: nhao mung: yao: bam wa yao: re zang baung: jham: agyo: mae ye; jo, nhao: ako". Mo,byu qe yao: re myao gelao"- yao: bam wa yao: bam: so re ngonhaung" so wa ngonhaung" byu myo: sho' re se' pye' yang ngad: ra". Ngonhaung" gyevo pho" re aung doe; pye' nhao: ava"- ga: nghaui" caung: khin" ako".
26 Samson wa yao: re lo; yang jhui" she: ra" zolau: nau" re- ce: yham mo" re vin: ci: ra" zang baung: re zaui: nhao la,- ngo aijham re nga: jo, nug: ra"- ga: ta" ra".
27 Ai: yham mo" wa yauggai myiqe: qe to, za: na: jo; ako". Philisti kho:kham ngo" yaug: geim" re: aimae na: jo; ako". Ai: yham tho' pyae mae myiqe: yauggai sam taung yaug ko Samson shapyo" na: rure qu" na: bam: ako".
28 Ailao" Samson wa- Myao: thao" ra" Asang we" jeju khyo" ngore myid: beim: la,- Mao"So we" jeju khyo" nga" qam: re ce dalhang za: dam: byid: la,- airulao" ce dalhang: yang nga" myo,jid' kyaung" thad' pye' byid: ko" ra" qhid' mae" Philisti byu qere qo" yu: pye' nae" ngad: ra" ga: akyu" mho' ra".
29 Ailao" Samson wa yham mo" re vin: ci: ra" agaung: mae" zang baung: re zaui" ra". Dazang re dalo, zaui: mung: deim: yang: Philisti byu qe we' daga" ngore shid nhao la, wo" ga: hug' ra".
30 Yao: wa ai: yham mo" re yao" qam: bo: thao" mae" deim" khyug' khyang: ke' ra". Yham mo" wa ai: kho:kham ngo" yaug: dao mae we' yaug khao: ngo" dao mae gyo" nhai" lo" ra". Samson wa byu qere yao: daui: na: ra" ayo, gyo: mae tho' yao: shid: ra" au: je: qo" se' pye' ra".
31 Yao: nhaung: bam we' dang: ra" yao" yham byu qe gyo" ye: mung: yao" mao gaung re ye: gaug: yu: ako".
Yao: bam wa Zoa we' Eshtao agyo: mae jo; ra" yao: pho" Mano nho: lab khyo dao: lo mung: nyhab' pye' ako". Yao: wa Israel byu qere shid' xe zin au: jhui" she: ra".