13
Samson Khau: Ra" Khyo
1 Israel byu qe wa Asang re qobo dam: shad' lhoe" ako". Aimung: yao wa byid xe zin lam: lam: Philisti byu qere yao: bam: dao mae eib zo: nhao: ra".
2 Ai: ayo, mae Zoa vogaung: mae" Mano ga: mang: ra" byu dayaug na: ra". Yao: wa Dan amyu" kaung mae bobo yaug ngad: ra". Yao" yham sang myhi" wa khonhae" re: zo: makhau: qu" ngad: ra".
3 Asang: mug: lagyo: wa yao: re li" na: qhu" mung:- nao wa khonhae" re: zo: makhau: qu" ngad: ra". Ngadqere: nao wa mataung" myao" re gaung la" li" mung: yauggai zo: dayaug khau nae"- ga: ta" ra".
4 sabyi qang:- yhid phai: kham" to" ra" zo:ve daja: rere: mazo: mashaug' nae" qhid' mae" lha" wa,-
5 Ni" yauggai zo: khau thao yao" xae re khonhae" re: magai: phyid' nae" ngad: ra". Pe"mung:ga"re yao: khau: ra" ba na Naziri dayaug khyo" Mao"So re qhaug' byid: to: qhug' yaug ngad: li" nae". Yao: wa Israel byu qere Philisti byu qe: lo, mae" khyad' yu: ra" mau" re zaui" li" nae"- ga: ta" ra".
6 Ailao" ai: myiqe: wa yao" yham sang pho" jhao" ye: mung: Mao"So: byu dayaug ngojhao" joe" li" ra". Yao: wa gyaug phug' tho' ra" Mao"So: mug: lagyo: dayaug ru" ru ngad: ra". Yao: khai: mae" joe" li" rure ngo yao: re maqhug' myid:- amung: ngore yao" mang mata" kyo: ngad: ra".
7 Ngadqere: ngo wa gaung la" li" mung: yauggai zo: dayaug khau nae" ga" ru kam" wa yao: ngore ta" ra". Yao: wa ngore sabyi qang:- yhid phai: we' kham" to" ra" zo:ve pe" re: dazo: dashaug' wa,- pe"mung:ga"re yao: kao so' daui: na: ra" ayo, myhao"- Naziri dayaug khyo" Asang re qhaug' byid' to: ca" yang: ngad: ra"- ga: ta" ra".
8 Ailao" Mano wa Asang re- Asang we"- jeju khyo" nao nhao: ke' ra" Mao"So: byu re nga" shid' tao jhao" dam: nhao: ke' byid: mung:- ai: yauggai zo: khau: ra" au: re nga" shid' tao pe" kad' ca" rure ta" kyo: nhao la,- ga: akyu" mho' ra".
9 Mao"So wa Mano mho' rure kad' byid: mung: ai: myiqe: yo mae zaung: jo; au: yao" mug: lagyo: ai: myiqe jhao" dam: joe" li" ra". Yao" yham sang pho" Mano wa yao: we' daga" mangad: ngad: ra".
10 Airumung: yao: wa ailao" jao" tao" lo" mung: yao: re- qu" wa,- daba: ne, ngojhao" joe" li" ra" yaug ngojhao" li" dam: na: qhu" ava"- ga: ta" kyo" ra".
11 Mano wa to" mung: yao" yham sang myhi" thao cao" ye" lo" ra". Yao: wa byu aiyaug jhao" ye: yang: nga" yham sang myhi" re dao: jhau yaug nao ngad: i? ga: myid' ra".
Yao: wa- ngo ngad: ga: tau" ra".
12 Ailao" Mano wa ana"- ailao" wa ni" dao: dang: li" lao"- ai: yauggai zo: pe" kad' ca" nae" i? Yao: pe" ru: kad' ca" nae" i? Yao: pe" ru: kao so' daui ca" nae" i? ga: myid' ra".
13 Asang: mug: lagyo: wa- ni" yham sang myhi" wa ngo yao: re ta" to" ru ja: khao: ngo" re lha" yang: kad' ca" nae".
14 Yao: wa sabyi naui mae" zaui" li" rumae" pe" re: magai: zo: nae"- yao: wa sabyi qang:- yhid phai: we' tam" to" ra" zo:ve pe" ja: re: magai: zo: nae". Yao: wa yao: re ngo ta" to" ru ja: khao: ngo" re kad' ca" nae"- ga: ta" ra".
15-16 Mano wa mug: lagyo: ngad: rure maba lo:- yao: re- jeju khyo" dalo" shi: wa,- ni" qhid' mae" cad' be, nau" dadau: se' yang: nga" shid' tao re yhaung" nhao la,- ga: ta" ra". Ngadqere: mug: lagyo: wa- ngo ta" nae"- ngo thang: na ngadqere: ni" zo:ve re ngo mazo: nae". Ngadqere: nao jaung byid: nug yang: ngad: re wa Asang re qhaug' byid' ra" xeim: khyo" phad' ngaui" byid: wa,- ga: ta" ra".
17 Mano wa- ni" mungdao: jham dang: li" lao" nga" shid' tao nao re nga: qo" yhe' byid: sho' ni" mang nga" shid' tao re ta" kyo: la,- ga: phaug' tau" ra".
18 Mug: lagyo: wa nao nga" mang pe"mung: ba: nug i? ga: myid: mung: ai wa mug' pho: mang ngad: ra"- ga: ta" ra".
19 Airumung: Mano wa cad' be, nau" dadau: we' cin man" dajhid' re yu mung: aijham re laug phan dao mae kai: yang: mug' pho: mau" jham re kad' yaug ngad: ra" Asang re ngaui" byid' ra".
20-21 Phan mae" myishae: jham de; do, li" au:- Mano we' yao" yham sang myhi" wa Asang mug: lagyo: myishae khug mae mug:gaung khyo do, lo" rure myao: ako". Ailao" Mano wa byu aiyaug wa Asang: mug: lagyo: ngad: lo: rure beim" li" mung: yao: we' yao" yham sang myhi" wa- lamhaung: lagoe, goe, mung: myid gaung khyo gyaug: goe; lo" ako". Yao: shid' tao wa mug: lagyo: re khonhae" re: madam: the' myao loko" ngad: ra".
22 Mano wa yao" yham sang myhi" re- nga" shid' tao wa Mao"So: re myao va" ruyang dang za: shid zai va"- ga: ta" ra".
23 Ngadqere: yao" yham sang myhi" wa- Asang nga" shid' tao re se' pye' nug: re wa yao: wa nga" shid' tao: nho: ngaui" xeim: re khae: yu nae" mangad: cegu: alhab' re nga" shid' tao re yao: qhu" byid: nae" mangad: ce: ayo, mae airu" ru nga" shid' tao re ta" nae" mangad:-
24 Ai: myiqe: wa yauggai zo: dayaug khau mung: yao: re Samson ga: mang mhang" byid' ako". Ai: zoshao wa qi" li" mung: Asang wa yao: re shaman" byid' ra".
25 Zoa we' Eshtao agyo: mae" Dan amyu" kaung qenho: Jamu mae yao: na: jo; au:- Asang: qam: so' wa yao: re qam: ke' bao nhao: ra".