TARHA" AGYI
(JUDGES)
Dao: Phung"
Tarha" agyi mugsug' paug' wa- Israel byu qe Khanan mung" khyo jhin" vao ye" ru we' kho:kham mung"dan: yete" ra" ayo, gyo: mae boe" ra" tarha" maci lo: na: ra" Israel byu qenho: mhomyi: jham mae" zhang: yu: yang: tung" to" ra" jham: paug' ngad: ra". Ai: mhomyi: jham wa tarha" agyi qe ga: mhang" ra" byumyu" sulhe: qe: khyo mhomyi: ngad: ra". Yao: bam mae" myo: sho' mo, wa tarha" zug: qe ga" ra" tho' mae gye we' sin" ra" au: jhaung qe ngad: ra" khyo" lajheim: thug' ra". Ai bam mae" mang je: qi: yaug wa Samson ngad: ra". Yao" nho: lo, mau" jham re aso: qi: 13-16 mae tung" xam" to" ra". Ce: jham: paug' mae" zhao: yu nae" khyo aqi: wa Israel byu qe mashid na: dang: jo; ru wa Mao"So re lam khug jhaug' zaug: rumae ngha: jo, mung:- Mao"So re jhaug' mazaug lao" wa khonhae" re: kyi" khyag' qhug' nhao: ra" khyo ngad: ra". Ngadqere: amyu" byu qe Mao"So re jhaug' mazaug lo:- kyi" khyag' ru thaung" qhug' ko" au: lhao" re: yao: bam myid tha" pye' mung: yao: jhao" dam: tug' lo gelao"- Mao"So wa khonhae" re: yao" byu qere khyad' yu nae" jin" jin" ngad: na: ra" khyo wa ceru tho' je: ra" khyo ngad: ra".
1
Yuda We' Simon Amyu" Yang Adonibezeg Re Aung: Yu: Ru
1 Yoshu shid: byaug thao- Israel amyu" byu qe wa Asang re- ngonhaung" mae" kho: amyu" kaung qe shi" sao qhid' ye: yang: Khanan byu qere gye yezin: nae" i? ga: myid' ako".
2 Asang wa Yuda amyu" kaung qe sao qhid' ye" li" genae". Mung"dan: re eib nae" ngo yao: bam: lo, mae byid: nae" ga: tau" ra".
3 Ailao" Yuda amyu" qe wa Simon amyu" qere- ngonhaung" re kho' byid' to" ra" mug: myid khyo ngonhaung" we' daga" cao: li" gela, amung: Khanan amyu" qere ngonhaung" daga" gye zin: nae" ngad: ra". Ai: thao ngonhaung" re: naonhaung" re kho' byid' to" ra" mug: myid khyo naonhaung" we' ye: nae" ngad: ra" ga: ta" ako". Airumung: Simon amyu" kaung qe we' Yuda amyu" kaung qe wa gye daga" yekhe' ako".
4 Asang wa yao: bam re Khanan byu qere we' Perizi byu qere aung: pye' nhao: ra". Amung: yao: bam wa Bezeg mae byu datug re khe' aung: pye' ako".
5 Yao: bam ai: mae Adonibezeg re the' myao gemung: yao: re khe' zin" ako".
6 Yao: wa tao" phao: lo" ra"- ngadqere: yao: bam yao: re cao" khe' mung: the' taung" yu" yang: yao" lo, mo" cae we' khyid mo" cae: jham re phyid' pye' byid' ako".
7 Ailao" Adonibezeg wa yao: bam: khyid mo" cae: we' lo, mo" cae: phyid' pye' qhug' ko" ra" kho:kham nhad' xe yaug wa nga" saboe" qao: mae zosheim ce' gaug zo" ako". Ana" Mao"So wa ngo yao: bam re kad' lo: ra" khyo: ngore kad' ava"- ga: ta" ra". Yao: wa Yerusalem khyo jhui" lo" ru qhug' mung: aimae shid: lo" ra".
Yuda Amyu" Yerusalem We' Hebron Re Aung: Pye' Ru
8 Yuda kaung mae" mo, wa Yerusalem re gye yezin: mung: aire aung: yu: pye' ako". Yao: bam wa ai: vobyu qere se' pye' mung: vogaung: mo" re myi: ngha" pye' ako".
9 Ai: thao yao: bam wa bam mug: mae bam khyid mae kyaug' ho: ra" mug: thao shad' mae na ko" ra" Khanan byu qere gyekhe' zin: nae" ye" ako".
10 Yao: bam wa Kiriad Arba ga: lhaung" mhang" ra" Hebron vogaung: mae na ko" ra" Khanan byu qere gye yezin" ako". Aimae yao: bam wa Sheshai- Ahiman- Talmai kaung qere aung: pye' ako".
Othnie Debi Vogaung: Re Khe' Aung: Pye' Ra" Khyo
(Ysh 15.13-19)
11 Yuda byu qe wa ai: jo, qo mae" ai: ayo, mae Kiriad Sephe ga: mhang" ra" Debi vogaung: re gye yezin" ako".
12 Yao: bam mae" Khaleb ga: mang yaug wa Kiriad Sephe vogaung: re khe' aung: yu: ra" yaug re nga" myiqe: zo: Agsa re byid: zho: nae"- ga: ta" ra".
13 Khaleb nho: yao: nhaung: Kena nho: yauggai zo: Othnie wa ai vogaung: re khe' aung: yu: ra". Airumung: Khaleb wa yao" myiqe: zo: Agsa re yao: re byid: zho" ra".
14 Othnie wa lo,xo' xo' ra" ba mae yao: pho" re yo dakhyao: mho' nae" qhid' mae" Agsa re jhan" ra". Aimung: yao: wa yao" loze dao mae" gyo" ra". Khaleb wa yao: re pe" o: ga: myid' ra".
15 Yao: wa ngo qid thug' tham: daqhae: re o: ra". Nao yang ngore byid' to" ra" mug: myid wa mug: kyaug' ngad: ra" ga: phaug' tau" ra". Airumung: Khaleb wa tho' mae" qid thug' we' o mae" qid thug' jham yao: re byid' ra".
Yuda Amyu" We' Benyamin Amyu" Qenho: Aung Doe; Ru
16 Moshe nho: yaug pho" nho: amyu" myid:zo: Keni wa Laso' gae vogaung: Yerikho mae" Yuda byu qe we' daga" Arad mug: thao shad' Yuda din"pyad' yo khyo cao: ye" lo" ra". Yao: bam wa ai tau Amaleg byu qe: phaung mae yethang: na: ako".
17 Yuda amyu" qe wa Simon amyu" kaung qe we' daga" cao" ye: mung: Zephad vogaung: mae na ko" ra" Khanan byu qere daga" yekhe' aung: pye' ako". Yao: bam wa ai vogaung: re nhang" pye' ru we' phyo' paui" pye' mung: aire Horma ga: mhang" pye' ako".
18 Yuda byu qe wa Gaza we' yao" mug: myid- Ashkelon we' yao" mug: myid re we' Ekron we' yao" mug: myid rere: sang: yu: pye' ako".
19 Asang wa Yuda amyu" kaung qe we' daga" ngad mung: bam mug: re qo" sang: yu ako". Ngadqere: Pang:lai:: qid yae cao" yang: na ko" ra" mo, byu qere maqo" khe' thug' ngad: ako". Pe"mung:ga"re: yao: bam jo, to' lhin" qo" geyang: ngad: ra".
20 Moshe amyin" byid' to" ru we' dakhyo:- Anag nho: myid:zo: qemae" ngad: ra" amyu" kaung sam kaung re ai: vogaung: mae" khe' thug' pye' yang: ngad: ra". Khaleb re Hebron vogaung: byid' ako".
21 Ngadqere: Benyamin amyu" kaung qe wa Yerusalem mae na: jo; ko" ra" Yebusi byu qere makhe' thug' pye' ngad: ako". Ai: ayo, mae" Yebusi byu qe wa Benyamin amyu" kaung qe we' daga" xo' yang: na: lo: ako".
Ephrim Kaung We' Manashe Kaung Qe Bethela Re Aung: Yu: Ru
22-23 Ephrim amyu" kaung qe we' Manashe amyu" kaung qe wa ai: ayo, mae Luza ga: mhang" ra" Bethela vogaung: re gye yezin" ako". Asang wa yao: bam re bao" thaug' byid' ra". Yao: bam wa vogaung: khyo jin" byu qere nhao: ke' mung:-
24 Vogaung: mae" thug' lo" na: ra" byu dayaug re myao lao"- yao: re ngonhaung" re vogaung: khug: khyo khoru: vao ye: nae" khyo shid' byid: la,. Ngonhaung" nao re pe" dae mate' nae" ga: ta" ako".
25 Airumung: yao: wa yao: bam re khyo shid' byid: mung: Ephrim amyu" kaung we' Manashe amyu" kaung qe wa ceyaug we' yao" yham byu qe mae" jeyang: vogaung: khug mae" yaug khao: ngo" re se' tam" pye' ako".
26 Thao re yao: wa Hiti mung" khyo ye: mung: vogaung: dalam: yete: yang: aire Luza ga: mhang" ra". Ana"ba joe" sho' mang: jo; ra".
Israel Byu Qeyang Makhe' Thug' Ke' Ko" Ra" Byumyu" Qe
27 Manashe amyu" kaung qe wa Bed shan- Tanag- Do- Ibleam- Megido vogaung: jham we' ai: nhae mae" vogaung: jham mae na ko" ra" mo, re makhe' thug' pye' ngad: ako". Khanan byu qe wa xo' yang: ai: mae na: jo; ako".
28 Israel byu qe qam: qi" li" gelao" Khanan byu qere yao: bam: qhid' mae" mau" zaui: byid: nae" deim" zag: nhao zo" ako". Ngadqere: yao: bam wa ai bam re alhab' jhad' sho' maqo" khe' thug' ke' ngad: ako".
29 Ephrim amyu" kaung qe wa Geze vogaung: mae na ko" ra" Khanan byu qere makhe' thug' pye' ngad: ako". Airumung: Khanan byu qe wa aimae yao: bam we' daga" xo' yang: na: ako".
30 Zebulun amyu" kaung qe wa Kitron we' Nahala vogaung: jham mae na ko" ra" byu qere makhe' thug' pye' ngad: ako". Airumung: aimae yao: bam we' daga" xo' na: jo, mung:- yao: bam: qhid' mae" mau" zaui: byid: nae" deim" zag: nhao zo" ako".
31 Ashe amyu" kaung qe wa Akho- Sidon- Ahlab- Akhzib- Helaba- Apheg- Rehob- vogaung: jham mae na ko" ra" mo, re makhe' thug' pye' ngad: ako".
32 Ashe amyu" kaung qe wa Khanan byu qere makhe' thug pye' ruyang na xug' Khanan byu qe we' daga" na: jo; ako".
33 Nabhtali amyu" kaung qe wa Bed Sheme we' Bethanad vogaung: jham mae na ko" ra" mo, re makhe' thug' pye' ngad: ako". Nabhtali amyu" kaung qe wa na xug' Khanan byu qe we' daga" na: jo; ako". Ngadqere: ai bam re yao: bam: qhid' mae" mau" deim" zag: zaui: nhao: ako".
34 Amori byu qe wa Dan amyu" kaung qere bam mug: khyo khe' ke' mung:- nyam" khyo magyo" lo nhao ngad: ako".
35 Amori byu qe wa Hare bam we' Aiyalon- Shalbim we' bam khaung: mae xo' yang: na: jo; ako". Ngadqere: Ephrim amyu" kaung qe we' Manashe amyu" kaung qe wa yao: bam eib: ra" qao: mae ai bam re nha: to: mung:- ai bam re yao: bam: qhid' mae" mau" deim" zag: zaui: nhao: ako".
36 Edom byu qenho: mug: kyo: wa Sela mug: am: Akrabim bam gyo: khyo" lai: phyid' lo" ra".