37
1 La qam" wa nga" sang: re phabau: phaxe' sang: gaug: thaung: nhao: ra".
2 Naonhaung" alhab' Mao"So: thoe re tae" gyo" qu" shige,-
yao" nhad' mae" thug' li" ra" mug: gyug: re tae" gyo: ge,.
3 Yao: wa- myidgaung athao dashad' mae" gatau athao dashad' joe" sho'
mug:gaung khyo" lhe' cad' re nhao: ke' ra".
4 Ailao" yao: myang: ra" thoe re the' gyo" ra"
phung bo: ra" mug: gyug: myang thoe the' gyo" ra".
Aimung: ai: au: yao: khyao za: lhe' cad' cad' ra".
5 Mao"So amyin" byid' ke' lao" mug' pho: mau" jham boe" lo: ra"
ngonhaung" matho' ba: gyo" ra" mug' ja: jham boe" thug' lo: ra".
6 Yao: wa- gyu: re myidgaung khyo gyo" nhao mung:
taung byaung: byaung: sho' mug: qu: yang bab bab jhug' nhao: ra".
7 Yao: wa byu qenho: mau" re tam" pye' byid' ra".
Yao: wa yao: qo" kad' rure qhu" byid' ra".
8 Gug'nyhug' lhe: jham wa yao: bam yao" khyaung khyo phao: vao lo" ako".
9 La qam" wa mug: thao shad' khyo" lo mung:
gyai ngin" ra" la ngin" wa mug: am: khyo" lo: ra".
10 Mao"So: so' wa qid re khai" lo" nhao: ra".
Aimung: aijham re gyukhai" boe" lo" nhao: ra".
11 Jham thaui: jham mae" lhe' cad' thug' li" ra".
12 Jham taui: jham wa Mao"So myid: o: ra" khyo" qui" qin" ako".
Jham thaui: jham wa Mao"So amyin" byid' to" ru alhab' re
myidgaung khyi" khao: ngo" cao" kad' ako".
13 Mao"So wa myidgaung re qid dag nhao nae" qhid' mae" mug: qu re nhao: ke' ra".
Yao: wa byu qere qobo dae byid: nae" qhid' mae" ngad ngad-
yao: bam re jeju byid: nae" qhid' mae" ngad ngad ai: rure nhao: ke' ra".
14 Yoba we"- dazab: thang mung: tae" gyo: wa,-
Mao"So kad' ra" mug' pho: jham re myid: ke' qu" wa,-
15 Mao"So khoru: amyin" byid' ke' ru we'
jham thaui: jham mae" lhe' cad' thug' li" rure nao ba: i?
16 Jham thaui: jham mug:gaung mae khoru: lhu: qin" ru-
Mao"So: mug' pho: laba lajhao mau" re nao ba i?
17 Mangad:- mug: thao khyo" lo: ra" la: yang
myidgaung re nug: khyo: hug' zag: nhai" au: re nao wa laung thoe za: athe' gyo" ke' ra".
18 Nao wa Mao"So re mug:gaung re phyid: lhu nae" qobo dae byid: nae" i?
aimung: aire boe; yaung" to" ra" to' we' dakhyo: qao sho' qo" bobao" kad' nae" i?
19 Mao"So re pe" ta" nae" ru ngonhaung" re mho" byid: la,
Ngonhaung" myid mae akeim ngad: ra" ngonhaung" ta" nae" pe" maqo"-
20 Ngo wa Mao"So we' jho" jhau: nae" qhid' mae" mamho' nae".
Yao" yang ngore phyo' qheim" pye' nae" akhang" yao: re ngo pe"mung: ba: byid: nae" i?
21 Aimung: ana" wa- mug:gaung mae" bo" bao wa qhi qhi mung: bao: ra".
Airu: saung" bao mung: aire ngonhaung" matho' qu"-
aimung: la: yang mug:gaung re hug' khyad' san: pye' ra".
22 Mug: am: shad' khyo qu" ke' re qhang ru: bao: jo; ra".
Aimung: Mao"So: phungbao wa ngonhaung" re gyaug: mug' byaug nhao: ra".
23 Mao"So: kheim: so' wa saung" thin mung: yao" nhae khyo ngonhaung" maqo" ye:-
Yao: wa din:man: mung: byu qere tarha" nyang: ra" khyo" zam" khug: ra".
24 Aimung: yaug khao: ngo" yao" qhid' kheim: mae gyaug: mug' ye; jo, ako".
aimung: yao: wa pha,jhi" bo: ga: mo, re pe" xan: masun: ngad: ra".