20
Zopha
1-2 Yoba we" nao wa ngore myid myo: nhao: ra"- ana" ngo phaug' tau: nae" rure matho' zang" cilo:-
3 Nao ta" lai: lo: ru wa roe" ru yao: ngad: ra".
Ngadqere: nao re khoru: phaug' tau: nae" rure ngo ba:-
4 Gaigai: yao: ganhae" gaco' myidgaung: dao mae
byu re nha: qhid: to" au: mae"-
5 Makhyang: mashab: ru khag' re: myao" sho' maqo" ngaui pyo" na: qu" rure nao ba: ra".
6 Yao: wa jham thaui: jham mae yao" au: zao" tin: sho'
mug:gaung dao khyo qi" qhang: lo" qere:-
7 Yao: re phalhug badan we' dakhyo: mad: tao" pye' ru qhug' li" nae".
Yao: re lhaung" ba mo, wa
yao: khai: khyo lo" byaug: laug ga: mug' li" genae".
8 Yao: wa- yabmo, we' dakhyo: myi" ayo, mae" qhu" lho daja: we' dakhyo: baui" lo" byaug mung:-
khonhae" re: mathe' myao lo nae".
9 Yao: wa- yao: lhaung" na: ra" jo, qo mae" byaug: byaug nae".
10 Aimung: yao" yang myaung mo, mae" khug' yu: to" rure yao" yauggai zo: qeyang gai: ru dam: kad' li" genae".
11 Yao" nho: gaung khyao wa mag mag mung: qam: mo" lhaung" bo: ra".
Ngadqere: mamyao" re aiwa phalhug boe" lo" li" nae".
12-13 Yao" qhid' mae" makhyang: mashab: rure myho' thoe gyo" ra".
Aimung: yao: wa zo" keim" nae" qhid' mae" yao" nhad' khug mae ke' ci: ra".
14 Ngadqere: ai: zo:ve wa yao" vae: dug: khug mae kho" byaug: ra"
khin cid' we' dakhyo: yao: kyid kyid kho" ra".
15 Makhyang: mashab yaug wa yao: khug' yu: to" ra" jo,nho" re daug: phoe" pye' ra".
Mao"So wa- aire yao" vae: dug: mae" lhao" re: tug' yu: pye' ra".
16 Makhyang: mashab yaug myug: pye' ra" ja: wa khin cid' we' dakhyo: ngad: ra"
aiwa daug thin: ra" lhao maui dadau: we' dakhyo: yao: re thoe" se' pye' ra".
17 Yao: wa zhanlun xau qid gyaung: jham re the' myao sho' daui: na nae" mangad:
nung: nug' we' byoyhid yug: ra" qid gyaung: zo: qe rere: myao co' nae" mangad:-
18 Yao: wa- yao: mau" khao" yang: qo" yu: to" ru alhab' re to: co' ca" li" nae".
Yao: wa yao" jo,nho" re myan myan qo" ci yhung: nae" mangad:-
19 Pe"mung:ga"re- yao: wa myaung mo, re zag zo: mung:
pe" shui manho kad' yang: gatau dayaug: yang zhaug' to" ra" yham jham re lhad' sang: pye' byid' ra".
20 Yao" nho: so' kho' myid wa khonhae" re: nhag' matho' dag ngad: ra".
21 Yao: zo" au: pe" mazo" tang" ngad: ra".
Ngadqere:- ana" wa yao" jo,nho" thao" byaug va".
22 Yao: nghau: nghau: aung doe; ra" au: re
kaug' qhui: ra" qola: alhab' wa yao: re khyoe' kad' pye' li" nae".
23 Yao: o: ru alhab' zo: vashao:
Mao"So wa nhag' jam: yo" ruyang yao: re qobo dae byid' li" nae".
24 Yao: wa jo, to' shae pyang: mae" phao: loe, nae" phin" re
gyid: bo" lo,la: wa yao: re bag: lhang" ke' li" nae".
25 Myo: dakhe' wa yao" gaung re thug' kyao" pye' mung:
ai: myo: nho: qhi qhi mung: ra" myo: au: wa yao" sa: mae jam yang:
yao" kheim ce' mae gyaug: din: ru boe" lo: li" nae".
26 Yao: qaung" to" ru ja: khao: ngo" wa phyo' qheim" pye' ru qhug' mung:
byu: yang mamad: te' ra" myi: wa
yao: we' yao" yham byu qere nga" pye' li" nae".
27 Mug: khaung wa ceyaug: nho: qobo re pheim: qhu" byid: mung:
myidgaung wa yao: re ngag: thaug' ra" sagse: kham byid' ra".
28 Yao" jo,nho" alhab' wa
Mao"So: nhag' yo: daqid tham: mae phyo' qheim" pye' ru qhug' li" nae".
29 Ceru wa makhyang: mashab mo; nho: au: pa lo, kyo' ngad: ra".
Mao"So yang yao: bam re kho' gae: to" ra" au: pa lo, kyo' ngad: ra".