12
Yoba
1-2 Ngad va"- naonhaung" wa mo, byu qenho: dao: thoe ngad: ako".
Naonhaung" shid: lo" re pha,jhi" re: naonhaung" we' daga" bo: shid: lo" li" genae".
3 Ngadqere:- naonhaung" qhi" za: wa ngore: ba: myid: qu".
Ngo wa khoshad' khyo" re: naonhaung" o mae mamyham: gyo"-
naonhaung" ta" ru alhab' re yaug khao: ngo" ba: ako".
4 Ana" nga" ba nam qelhao" re: ngore qi: jung" pye' ako".
Ngo wa din:man: yaug we' qobo vhin khyo pe" majo, ngadqere:- yao: bam ngore qi: jung" pye' ako".
Ngadqere:- nga" akyu" mho' thoe jham re Mao"So tau: byid' ra" ayo, jo; ra".
5 Naonhaung" wa qug: khai: maqhug' mung: ngore qinug tu" pye' ako".
Naonhaung" wa gyang: lang" lo" na yaug re ceim" thaung" ako".
6 Khug' hab' qe we' Mao"So mabo mo, wa-
yao: bam yao" qam: wa yao: bam yao" so ngad sho' ngadqere: yaug yo cae tae" ru we' qo" na: ako".
7 Ngho' jham we' gug'nyhug' jham lhao" re:- nao re mho" shid' nae" ru gyai qo" ako".
8 Myidgaung we' panglai: mae phan" to" ra" gug'nyhug' jham re- yao: bam: pha,jhi" myid' yu wa,-
9 Asang: lo; yang yao: bam re phan" phaug' to" rure yao: bam alhab' ba: ako".
10 Mao"So wa yao: phan" phaug' to" ra" daui nam alhab' re khyoshid' yaug ngad: ra".
Yaug khao: ngo" nho: kao so' wa yao" qam: so' khug mae bo: jo; ra".
11 Ngadqere:- naonhaung" sho wa myho' ra" zoxeim: re o: ru we' dakhyo:-
ni" nokhye' jham re: jhau dao: kheim: jham re gyo" o: ra".
12-13 Phug' mao: qe wa- pha,jhi" bo: ako".
Ngadqere: Mao"So wa pha,jhi" we' kheim: so' bo: ra".
Phug' mao: qe wa- nhag' lam: sozo: du" ako".
Mao"So wa nhag' lam: sozo: du" ru we' kad' boe" nae" kheim: so' bo: ra".
14 Mao"So: yang phyo' pye' re khag' dam: qo" zhaug' to: nae" i?
Aimung:- Mao"So yang thaung: lhaung" to" ru qhug' yaug re khag' yang qo" lhoe' ke' nae" i?
15 Mao"So: yang mug: qu re tam" to: lao"
myidgaung kyaug' ho: lo" ra"- yao" yang qid phung" thug' ke' re qid je" li" ra".
16 Mao"So wa qam: bo mung: khonhae" re: aung doe; ra".
Mhug' pyag' qhug' yaug we' mhug' pyag' yaug shid' zo" geim" Mao"So: kheim: so' khug mae ngad: ako".
17 Yao: wa mung" eib zug: qenho: pha,jhi" re yu: pye' byid' ra". Aimung:-
au: jhaung qere kopyad' jham we' dakhyo: ko" qin" nhao: ra".
18 Yao: wa kho:kham jham re aya: khyo" pye' mung: kyam: byu boe" nhao: pye' ra".
19 Yao: wa khinjaung qe we' kheim: so' qo" ra" mo, re deim" khyo" pye' ra".
20 Yao: wa- su: yang myid: lam: to" ra" mo, re sae za: tae" byaug nhao: ra".
Aimung: phug' mao: qenho: pha,jhi" re yu: pye' byid' ra".
21 Yao: wa kheim: so' qo" to: mo, re nga: yeim nhao: ra".
Aimung: mung" eib zug: qe: qam: re thao" lo" nhao: ra".
22 Yao: wa shid: ru we' dakhyo: cad' no; ra" jo, qo jham khyo bo" bao re nhao: ke' byid' ra".
23 Yao: wa byumyu" mung"dan: jham re qam: bo mung: qi" qhang nhao: ra".
Ngadqere: ai:thao yao: bam re seim" nhao mung: phyo' qheim" pye' ra".
24 Yao: wa yao: bam: au: jhaung qere kopyad' boe" nhao: ra".
Aimung: yao: bam re athaui: anhaung" du" dae" lo" nhao: mung: byaug lo" nhao: ra".
25 Yao: bam wa mug: cad' yo mae soe' du" qin" mung: yhid yid mo, we' dakhyo: gyang: be; qin" ako".