YOHAN
NHO: VHIN TUNG" DALAM:
(1 JOHN)
Dao: phung"
Yohan nho: vhin tung" dalam: ein: lam: mae akhyag: ra" au: qang khyo shid' ja: bo: ra". Ai: shid' ja: wa- mugsug' nghe' ra" mo, re Mao"So we' re: yao" yao: zo: Yesu Khristu we' re: jho" xo' zam" khug: na genae" qhid' mae" we' ce: jho" xo' zam" khug: ra" khyo re byo; qeim: lo" nhao: ra" mho" shid' khyo apyag' re macao" genae" qhid' mae" ta" peim: byid' ra" khyo" tung" ru ngad: ra". Ce: mho" shid' khyo apyag' wa- makhyang" ra" khyo wa gaung sho: we' sin" ra" mug: myid we' jho" xo' ra" khyo" boe" li" ru ngad: ga" ra" lam khug: khyo mae aqao: zhaug' to" ru ngad: ra". Aimung: Mao"So: yao: zo: Yesu wa xao su byu agyang" magai: boe" ngad: ra"- ga: mho" shid' ako". Ai: mho" shid' khyo wa- khyad' yu qhug' ru ga" ru wa mug: myid dao mae" li khyo" kaoso' daui: rumae" loe; beim: ru ngad: ga: mho" shid' ako". Amung: yao: bam wa khyad' yu: ru wa byu: ave, akyang we' re:- yao: cao: jhid'de; ra" tarha" we' re: pe" majho" sin: ga: mho" shid' ako".
Mugsug' tung" yaug wa ce: mho" shid' khyo re vha: ra" khyo"- Yesu Khristu wa xao su byu agyang" ngad: rure de: de: za: sho' kyo" to" ra". Amung: Yesu re lam khug: ra" mo, alhab' we' Mao"So re jhid'de; ra"mo, alhab' wa yao: cao: jho" jhid'de; qo: ra" khyo re aqao: to: yang: ta" to" ra".
1
Kaoso' Mungdao:
1 Ngonhaung" wa sao qhid' maqhid mae" jo; jo; ra" kaoso' mungdao: khyo re naonhaung" re tung" vhin: ke' ra". Aimung dao: re ngonhaung" the' gyo: va"- ngonhaung" yao" myo; yang yao: the' myao va"- ngad: va"- ai re ngonhaung" the' myao va"- ngonhaung" yao" lo; yang yao: aire the' tin: va".
2 Ce: kaoso' myao: thug' li" au: ngonhaung" myao: lo: bam va". Airumung: ai: khyo re ngonhaung" jhau mung: Pho" we' daga" na yang: ngonhaung" re qhu" byid' ra" apyad ato: kaoso' khyo we' sin: yang: naonhaung" re ta" hau" kyo: byid' ra".
3 Ngonhaung" wa Pho" we' yao" Yao: Zo: Yesu Khristu we' jho" zam" khug: ra" khyo qo" yu va" rumae naonhaung" re: ngonhaung" we' daga" qo" bobo genae" qhid' mae" ngonhaung" the' myao va" ru we' ngonhaung" the' gyo" yu va" gu: re naonhaung" rere: ta" hau" kyo: byid' ra".
4 Ngonhaung" nho: ngaui bau" ru jab byang" sho' boe" nae" qhid' mae" ce: vhin tung" re ngonhaung" tung" ke' ru ngad: ra".
Mao"So Wa Bo" Bao Ngad: Ra" Khyo
5 Mao"So wa bo" bao ngad: ru we' yao: mae mug: cad' dajhid' re: mabo ga" ra" ce: mungdao: re yao" Yao: Zo: mae" ngonhaung" the' gyo" yu mung: naonhaung" re ngonhaung" ta" hau" ra".
6 Airumung: ngonhaung" wa yao: we' daga" zam" khug: na: ru ngad: ga: ta" ngadqere: mug: cad' khug mae na: jo; ngad: re wa ngonhaung" wa nhad' dao: thoe we' lo, mau" shid' ja" geim" mae mhug' na mo, ngad: ra".
7 Ngadqere: yao: wa mug: bo" mae na: ru we' dakhyo: ngonhaung" wa mug: bo" mae na: bam: ngad: re ngonhaung" wa yao: cao: jho" zam" khug: na mo, ngad: ra". Amung: yao" Yao: Zo: Yesu Khristu nho: sa" yang qobo ja: khao: ngo" mae" ngonhaung" re kyang" san: pye' byid' ra".
8 Ngonhaung" qobo maqo" ein: ta" bam: ngad: re ngonhaung" wa yao: yao" gaung re mhug' pyag' mo, ngad mung: ngonhaung" khug mae dangman" ru mabo ngad: ra".
9 Ngadqere: ngonhaung" nho: qobo jham re lhang: yu: bam: ngad: re kam" wa yao: wa yao" dao:so: re dang sho' kad' mung: din: vang" ra" khyo" kad' li" li" nae". Yao: wa ngonhaung" nho: qobo jham re khyad' pye' byid: mung: ngonhaung" shad' nghung" ra" qobo jham alhab' rere: kyang" san: pye' byid' li" nae" ngad: ra".
10 Ngonhaung" wa qobo makad' lai: lo ein: ta" bam: ngad: re ngonhaung" wa Mao"So re mhug' hab' khyo" toe' pye' yang: yao" dao: wa ngonhaung" khug mae mabo ngad: ra".